Bebe ti vreman pros avek son Papa. Sa remark ti ganny fer avek en bon lentansyon par en zanmi dan lafanmir me Bebe ti santi li blese dan plas ganny rekonforte. I ti kontinyelman dir dan li menm ki mannyer lanmor son papa i kapab en bon keksoz. Ler Bebe ti rakont sa lensidan dan en liv plizyer lannen apre, i ti kler ki i ti ankor dan sagrinasyon.

Parey Bebe in realize, i kapab pran en kantite letan pour en dimoun fer fas avek sagrinasyon, espesyalman ler sa enn ki dan dey ti pros avek sa dimoun ki’n mor. Dan Labib, lanmor in ganny dekrir konman “dernyen lennmi.” (1 Korentyen 15:26) I kapab boulvers nou lavi e nanryen pa kapab anpes li. Souvan i arive kan nou pa pe ekspekte e i pran bann ki nou vreman kontan. Personn pa ganny eparnyen avek lefe ki lanmor i anmennen. Alor, i pa sirprenan si nou santi ki nou pa konnen ki mannyer pour fer fas avek lanmor ek son lefe.

Petet ou kapab mazinen: ‘Konbyen letan i pran pour aret sagren? Ki mannyer en dimoun i kapab fer fas avek sagrinasyon? Ki mannyer mon kapab rekonfort lezot ki dan dey? Eski i annan okenn lespwar pour bann dimoun ki nou kontan ki’n mor?’