Mon ti ne Saxony, en pti lavil dan sa ki avan ti apel Repiblik Demokratik Lalmanny (oubyen GDR). I ti annan en bon latmosfer dan lakour e mon paran ti ansenny mwan bann bon valer moral. Pour bokou dimoun ki ti viv Saxony, larelizyon pa ti enportan akoz GDR ti en leta kominis e pour mwan, Bondye pa ti egziste. Pandan sa premye 18 an mon lavi, mon ti en kominis e mon pa ti krwar dan Bondye.

Akoz kominizm ti enteres mwan? Mon ti kontan sa nide ki tou dimoun i egal. Mon ti osi krwar ki tou propriyete i devret ganny partaze dan en fason zis vi ki sa ti pou met en lafen avek bann dimoun ki vreman ris ek bann ki vreman pov. Alor mon ti kit mwan okipe dan en lorganizasyon kominis pour bann zenn. Ler mon ti annan 14 an, mon ti pas bokou letan pour travay lo en proze lanvironnman pour resikle bann vye papye. Bann lotorite dan lavil Aue ti telman kontan avek zefor ki mon ti mete dan sa proze ki zot ti donn mwan en pri. Menm si mon ti zenn, mon ti deza konn serten politisyen dan GDR. Mon ti santi ki mon ti lo sa bon semen e ki mon ti annan en bon lavenir devan mwan.

Apre, sityasyon ti sanz en sel kou. An 1989, Miray Berlin ti tonbe ansanm avek bann pei kominis dan Les Lerop. Mon ti vreman soke par bann keksoz ki ti arive. Mon ti deswit dekouver ki i ti annan lenzistis dan Repiblik Demokratik Lalmanny. Par egzanp, bann dimoun ki pa ti siport kominizm ti ganny trete konman enferyer. Ki mannyer sa ti posib? Eski konman bann kominis, nou pa krwar ki tou dimoun i egal? Eski kominis ti zis en rev? Traka ti anvair mwan.

Alor mon ti sanz mon priorite e konsantre lo lanmizik ek lar. Vi ki mon ti etidye kot en lakademi lanmizik avek bi pour al liniversite, mon ti anvi vin en mizisyen ek artis. Deplis, mon ti abandonn bann valer moral ki mon ti aprann ler mon ti zanfan. Sa ki ti pli enportan pour mwan aprezan, i ti pou anmize e sa ti enkli annan plizyer girlfriend. Me lanmizik, lar ek viv en lavi lib pa ti diminyen mon traka. Menm bann portre ki mon ti penn ti fer per. Ki lavenir i rezerve pou mwan? Ki bi lavi?

Mon ti sirprann ler mon ti trouv larepons sa bann kestyon  ki mon ti pe demande. En zour swar kot lakademi, mon ti asiz avek en group etidyan ki ti pe diskit lo lavenir. Mandy * ti en etidyan e osi en Temwen Zeova. Sa zour swar, Mandy ti donn mwan en bon konsey. I ti dir: “Andreas, si ou anvi larepons pour ou bann kestyon lo lavi ek lavenir, al get dan Labib.”

Mon pa ti tro krwar sa ki Mandy ti dir mwan akoz mon ti annan dout me mon ti anvi konn plis. Alor mon ti deside pour al get dan Labib pour ganny larepons. Mandy ti montre mwan Danyel sapit 2 e sa ki mon ti lir dan sa sapit ti sirprann mwan. Sa profesi i koz lo diferan pouvwar mondyal ek gouvernman ki ti pou annan en lenpak lo lemonn ziska dan nou letan. Mandy ti osi montre mwan lezot profesi konsernan lavenir. Finalman, mon ti pe trouv larepons pour mon bann kestyon! Me lekel ki’n ekrir sa bann profesi e lekel ki’n kapab predir lavenir dan en fason sitan egzakt? Apre tou, eski i kapab ki Bondye i egziste?

Mandy ti fer mwan zwenn Horst ek Angelika, en koup Temwen Zeova ki ti ed mwan konpran Parol Bondye pli byen. Mon ti deswit rekonnet ki Temwen Zeova i sa sel lorganizasyon relizye ki toultan servi e fer dimoun konn non Bondye. (Psonm 83:18; Matye 6:9) Mon ti aprann ki Zeova i ofer imen sa posibilite pour viv pour touzour lo later. Psonm 37:9 (NWT) i dir: “Sa bann ki met zot konfyans dan Zeova pou reste lo later.” Mon ti vwar sa enteresan ki tou dimoun ki viv dapre standar Bondye ki dan Labib i annan sa posibilite anvi viv loportinite pour viv pour touzour lo later.

Par kont, i ti difisil pour sanz mon fason viv pour viv en lavi ki an armoni avek sa ki Labib i dir. Konman en artis ek mizisyen, mon ti pe ganny bokou sikse e sa ti fer mwan fyer alor mon ti bezwen aprann pour annan limilite. Deplis, i pa ti fasil pour mwan abandonn sa kalite lavi ki mon ti pe viv. Mon vreman rekonesan ki Zeova i demontre pasyans ek konpasyon anver bann ki esey fer zot mye pour fer sa ki Labib i dir e ki i vreman konpran zot.

Pandan 18 an, mon’n viv konman en dimoun ki pa krwar dan Bondye e mon’n asosye mwan avek kominizm me depi ki mon’n etidye Labib, sa in sanz mon lavi. Mon ti aprann pour fer fas avek mon traka lo lavenir e sa in donn mwan en bi dan lavi. An 1993, mon ti batize konman en Temwen Zeova e an 2000, mon ti marye avek en ser byen devoue ki apel Tabitha. Nou ti pas bokou nou letan pour ed lezot dimoun konn Labib. Bokou sa bann dimoun ki nou ti zwenn ti annan bann nide kominizm oubyen zot pa ti krwar dan Bondye parey ki mon ti ete avan. Mon ti ganny bokou satisfaksyon ler mon ti montre zot ki mannyer pour konn Zeova.

Premye fwa ki mon ti konmans asosye avek Temwen Zeova, mon paran ti ganny sok. Par kont, depi sa letan, zot in vwar lefe pozitif ki sa in annan lo mon lavi letan mon’n asosye avek Temwen Zeova. Mon vreman kontan ki aprezan zot pe lir Labib e asiste bann renyon Temwen Zeova.

Mwan ek Tabitha, nou annan en bon lavi maryaz akoz nou esey swiv konsey Labib pour bann koup marye. Par egzanp, konsey ki Labib i donnen lo fidelite dan maryaz i fortifye nou maryaz ler nou aplik li.​—Ebre 13:4.

Mon nepli annan lafreyer dan lavi e nepli fatig mwan avek lavenir. Mon form parti en fanmir frer ek ser dan lemonn antye ki rezouir vre lape ek linite. Dan sa fanmir nou tou nou egal. Sa i en keksoz ki mon’n toultan krwar ladan e ki mon’n anvi tou mon lavi.