LO KOUVERTIR | BANN VIZYON I ED NOU KONPRAN KI PE PASE DAN LESYEL
Lekel ki reste dan lesyel?
Eski ou’n deza esey mazinen ki mannyer i ete dan lesyel e lekel ki reste laba? Bokou dimoun in esey fer sa. Pour plizyer milye lannen, i’n annan diferan lopinyon lo la size. Serten i krwar ki zot bann zanset i reste dan lesyel e alor zot devret ganny onore. Lezot i mazin lesyel konman en landrwa kot i anpe, kot bann lanz ek bann bon dimoun ki’n mor i reste. I annan lezot ankor ki vwar lesyel konman en landrwa kot plizyer milyon bondye i reste.
Bokou dimoun i dir ki nou pa kapab konn nanryen konsernan lesyel akoz napa personn ki’n deza sorti laba pour rakont nou ki mannyer i ete. Me sa fason panse i mal. Zezi Kri ti viv dan lesyel avan ki i ti vin lo later. I ti dir bann sef relizye dan premye syek: “Mon’n desann sorti dan lesyel, pa pour fer mon prop lavolonte me pour fer lavolonte sa enn ki’n anvoy mwan.” Alor Zezi ti pe koz dapre sa ki i ti konnen kan i ti dir avek son bann zapot: “Dan lakaz mon Papa, i annan en kantite landrwa reste.”—Zan 6:38; 14:2.
Byensir, Papa Zezi i Bondye, ki apel Zeova e “lakaz” Zeova i dan lesyel. (Psonm 83:18, NWT) Alor, Zeova ek Zezi i dan sa pli bon pozisyon ki okenn dimoun pour eksplik nou ki mannyer i ete dan lesyel. Zot in donn bann serviter fidel bann vizyon ekstraordiner ki ed nou konpran ki pe pase dan lesyel.
Dan sa lartik ki swiv nou pou diskit lo serten sa bann vizyon ki’n ganny ekrir dan Labib. Anmezir ki nou koz lo sa bann vizyon, mazin byen ki lesyel pa en landrwa fizik avek bann keksoz ki nou kapab vwar oubyen touse. Dan plas eksplik nou ki mannyer lesyel i ete dan en fason ki zis bann lanz ki kapab konpran, Bondye in servi bann keksoz ki nou konnen dan sa bann vizyon. Sa bann vizyon pou ed ou konpran plis lo lekel ki reste dan sa “kantite landrwa reste” dan lesyel.
