Bann Pwen enteresan dan Liv Nonm
Parol Bondye i vivan
Bann Pwen enteresan dan Liv Nonm
APRE zot depar Lezip, bann Izraelit ti ganny organize konman en nasyon. Pa bokou letan apre sa, zot ti’n kapab antre dan Later Promiz, me zot pa ti antre. Okontrer, zot ti bezwen ale vini dan en “gran dezer efreyan” pour apepre karant an. (Deterononm 8:15) Akoz? Sa resi istorik dan liv Labib apele Nonm i dir nou sa ki ti arive. Lenformasyon dan sa liv i devret fer nou santi sa nesesite pour obeir Zeova e respekte son bann reprezantan.
Moiz ti ekrir sa liv Nonm lo Laplenn Moab, ki kouver en peryod letan 38 lannen, 9 mwan, depi 1512 A.N.L. ziska 1473 A.N.L. (Nonm 1:1; Deterononm 1:3) Sa liv ti ganny son non apre sa de resansman ki ti ganny fer apepre 38 lannen lekar avek kanmarad. (SAPIT 1-4, 26) Sa resi i divize an trwa seksyon. Premye parti i rakont bann levennman ki ti ariv kot montanny Sinai. Dezyenm, i kouver bann levennman pandan ki Izrael ti pe ale vini dan dezer. Dernyen parti i baze lo bann levennman ki ti arive lo Laplenn Moab. Ler ou lir sa resi, petet ou kapab demann ou lekor: ‘Ki sa bann levennman i ansenny mwan? Eski i annan bann prensip dan sa liv ki kapab benefisye mwan ozordi?’
KOT MONTANNY SINAI
Premye dan sa de resansman ti ganny fer ler bann Izraelit ti ankor devan montanny Sinai. Ti annan en total 603,550 zonm aze 20 an e plis, me bann Levit pa ti enkli ladan. I paret ki sa resansman ti ganny fer pour rezon militer. An tou ti kapab annan plis ki trwa milyon dimoun, enkli bann madanm, zanfan, ek bann Levit.
Apre sa resansman, bann Izraelit ti resevwar lenstriksyon konsernan fason ki zot devret deplase, detay konsernan travay bann Levit ek servis tabernak, lord lo karantenn, e lalwa an rapor avek bann ka zalouzi ek ve ki bann Nazireen ti fer. SAPIT 7 i kontyen lenformasyon lo lofrann ki bann sef tribi ti fer ler lotel ti ganny inogire, e sapit 9 i diskit selebrasyon Lapak. Zot ti osi ganny lenstriksyon lo ki mannyer pour enstal zot kan e osi dan ki lord zot pou deplase.
Larepons pour bann Kestyon lo Labib:
2:1, 2—Ki sa “bann siny” ki sa trwa group tribi ti bezwen enstal zot kan otour dan dezer? Labib pa donn en deskripsyon lo sa bann siny. Me zot pa ti ganny konsidere konman bann senbol sakre, zot pa ti ni annan okenn lenportans relizye. Sa bann siny ti ganny servi pour en rezon pratik—pour ed en dimoun trouv son landrwa apropriye dan kan.
5:27—Ki savedir lazanm en madanm ki koupab pour adilter pe deperir? Sa mo “lazanm” pe ganny servi pour reprezant lorgann reprodiktif. (Zenez 46:26) Sa lekspresyon ‘pe deperir’ i endike ki sa bann lorgann pe deteryore, ki fer en madanm pa kapab fer zanfan.
Leson pour nou:
6:1-7. Bann Nazireen ti bezwen evite manz oubyen bwar okenn keksoz ki ganny fer avek rezen, e bwar okenn labwason alkolik. Pour arive fer sa, zot ti bezwen priv zot lekor. Zot ti bezwen les zot seve gran—en siny soumisyon avek Zeova, zis parey bann madanm ti bezwen soumet avek zot mari oubyen papa. Bann Nazireen ti bezwen gard zot prop par reste lwen avek okenn lekor mor, menm lekor en manm zot fanmiy. Bann serviter aplentan ozordi i montre en leta lespri sakrifis ler zot bezwen priv zot lekor, e soumet avek Zeova ek son laranzman. Serten i kapab ganny anvoye dan bann pei elwannyen, ki kapab fer li difisil oubyen enposib pour retourn kot zot pour asiste lanterman en fanmiy pros.
8:25, 26. Pour byen akonpli sa servis konman en Levit e pour rezon konsiderasyon pour zot laz, bann zonm aze ti ganny demande pour aret servis obligatwar. Me zot ti kapab volonter pour ed lezot Levit. Menm si ozordi nou pa pran retret konman en proklanmater Rwayonm, prensip sa lalwa i ansenny nou en leson enportan. Si pour rezon lavyeyes, en Kretyen pa kapab akonpli serten lobligasyon, petet i kapab fer en form servis ki i ankor kapab fer.
SORTI EN LANDRWA POUR AL EN LOT DAN DEZER
Ler sa nyaz parlao tabernak ti finalman leve, bann Izraelit ti konmans en lamars ki 38 lannen e enn oubyen de mwan plitar ti pou anmenn zot lo laplenn Moab. Petet ou pou trouv li itil pour swiv zot larout lo map lo paz 9 dan brosir ‘Voyez le bon pays,’ pibliye par Temwen Zeova.
Ti annan omwen trwa ka konplent lo semen pour al Kades, dan Dezer Parann. Dan sa premye ka, Zeova ti fer arete sa konplent par anvoy en dife pour detrir serten parmi zot. Apre sa, bann Izraelit ti demann lavyann, e Zeova ti donn zot en bann zwazo ki apel kay. Miryam ek Aaron ti konplent kont Moiz ki ti fer Miryam ganny frape avek lalep pour en pe letan.
Ler zot ti pe kanpe Kades, Moiz ti anvoy 12 zonm pour espyonn Later Promiz. Zot ti retournen 40 zour plitar. Apre ki zot ti’n krwar move rapor sa 10 espyon, bann dimoun ti anvi saboul Moiz, Aaron, ek sa de espyon fidel, Zozye ek Kaleb, avek ros. Zeova ti pe al frap zot avek maladi me Moiz ti negosye pour zot. Alor Bondye ti anonse ki zot ti pou vin bann dimoun eran dan dezer pour 40 lannen—ziska ki bann ki ti’n ganny konte dan resansman in mor.
Zeova ti donn lezot lalwa. Kora ek lezot ti rebel kont Moiz ek Aaron, me zot ti ganny detrir par dife e later ti anval zot. Son lannmen, pep antye ti mirmire kont Moiz ek Aaron. Pour sa, Zeova ti anmenn en pinisyon lo zot, ki ti koz lanmor 14,700 zot. Pour fer zot konnen lekel ki i’n swazir konman gran pret, Zeova ti fer baton Aaron pous fler. Apre Zeova ti donn lezot lalwa konsernan lobligasyon bann Levit ek pirifikasyon lepep. Servi lasann en bef rouz ti pe anons pirifikasyon atraver sakrifis Zezi.—Ebre 9:13, 14.
Bann garson Izrael ti retourn Kades, kot Miryam ti mor. Lepep ti konplent ankor kont Moiz ek Aaron. Rezon ki zot ti konplent? Napa delo. Vi ki Moiz ek Aaron pa ti sangtifye non Zeova ler delo ti ganny fourni dan en fason mirakile, zot ti perdi privilez pour antre dan Later Promiz. Izrael ti kit Kades, e Aaron ti mor lo montanny Or. Ler zot ti pe fer letour Edom, bann Izraelit ti fatige e koz kont Bondye ek Moiz. Zeova ti anvoy bann serpan anpwazonnen pour pini zot. Ankor enn fwa Moiz ti negosye pour zot, e Bondye ti dir li fer en serpan kwiv e met li lo en poto pour ki sa bann ki’n ganny pike i ganny geri ler zot get li. Sa serpan ti pe anons Zezi Kri ki ti pou ganny kloute lo poto pour nou byenfe eternel. (Zan 3:14, 15) Izrael ti defet Lerwa Amorit, Sionn ek Og, e pran posesyon zot pei.
Larepons pour bann Kestyon lo Labib:
12:1—Akoz Miryam ek Aaron ti konplent kont Moiz? I paret ki vre rezon par deryer zot konplent ti akoz Miryam ti anvi plis pouvwar. Ler madanm Moiz, Zipora, ti rezwenn li dan dezer, i posib ki Miryam ti per pangar i nepli ganny konsidere konman madanm pli enportan dan kan.—Egzod 18:1-5.
12:9-11—Akoz zis Miryam ki ti ganny frape avek lalep? I tre probab, i ti sa enn ki ti konmans sa konplent e persyad Aaron pour zwenn avek li. Aaron ti montre en bon latitid par konfes son move aksyon.
21:14, 15—Ki sa liv ki’n ganny mansyonnen dan sa verse? Labib i refer avek plizyer liv ki bann ekriven Labib ti servi konman zot sours lenformasyon. (Zozye 10:12, 13; 1 Lerwa 11:41; 14:19, 29) Enn sa bann liv ti “liv Lager Zeova.” I ti kontyen en resi istorik lo bann lager pep Zeova.
Leson pour nou:
11:27-29. Moiz in kit en bon legzanp lo ki mannyer nou devret azir ler lezot i resevwar privilez dan servis Zeova. Olye zalou e sey rod laglwar pour li menm, Moiz ti kontan ler Eldad ek Medad ti konmans azir konman profet.
12:2, 9, 10; 16:1-3, 12-14, 31-35, 41, 46-50. Zeova i ekspekte son bann adorater montre respe anver bann ki i’n donn lotorite.
14:24. Pour nou kapab reziste presyon lemonn pour fer sa ki mal, i tre enportan ki nou devlop “en lot leta lespri” oubyen latitid. Sa i en latitid oubyen leta lespri ki diferan avek pour lemonn.
15:37-41. Sa franz lo bout lenz bann Izraelit ti servi konman en rapel ki zot ti en pep separe pour ador Bondye e pour obeir son bann komannman. Eski pa nou osi nou devret viv dapre bann standar Bondye e montre nou diferan avek lemonn?
LO LAPLENN MOAB
Kan bann garson Izrael ti’n enstal zot kan lo laplenn Moab, bann Moabit ti per zot e anmenmtan ay zot. Alors, Lerwa Balak ti servi Balaam pour modi bann Izraelit. Me Zeova ti fors Balaam pour beni zot. Apre bann madanm Moabit ek Madyanit ti ganny servi pour fer bann zonm Izraelit tonm dan imoralite ek idolatri. Sa ti fer Zeova detrir 24,000 zot. Sa fleo ti finalman arete ler Fineas ti montre ki i pa toler okenn lopozisyon kont Zeova.
Sa dezyenm resansman ti endike ki napa okenn zonm ki ti’n ganny konte dan sa premye resansman ki ti ankor vivan, eksepte Zozye ek Kaleb. Zozye ti ganny apwente konman sikseser Moiz. Bann Izraelit ti resevwar lenstriksyon pour diferan lofrann e lenstriksyon konsernan fer bann ve. Pep Izrael ti osi revanz lo bann Madyanit. Ribenn, Gad, ek lanmwatye tribi Manase ti etablir zot les avek Larivyer Zourden. Izrael ti resevwar lenstriksyon pour travers Larivyer Zourden e pran posesyon pei. Bann diferan frontyer sa pei ti ganny detaye. Zot ti tir o sor pour partaz leritaz later. Bann Levit ti ganny 48 lavil, e 6 ladan ti servi konman bann lavil refiz.
Larepons pour bann Kestyon lo Labib:
22:20-22—Akoz Zeova ti ankoler avek Balaam? Zeova ti’n dir profet Balaam ki i pa devret modi bann Izraelit. (Nonm 22:12) Me sa profet ti al avek bann zonm Balak avek tou lentansyon pour modi Izrael. Balaam ti anvi fer plezir lerwa Moabit e resevwar en rekonpans avek li. (2 Pyer 2:15, 16; Zid 11) Menm ler Balaam ti ganny forse pour beni olye modi Izrael, i ti esey rod faver lerwa par sizere ki zot servi bann madanm ki ador Baal pour fer tonbe bann zonm Izraelit. (Nonm 31:15, 16) Alor, Bondye ti ankoler avek Balaam akoz son vorasite.
30:6-8—Eski en zonm Kretyen i kapab kennsel en ve ki son madanm in fer? An rapor avek ve, ozordi Zeova i azir avek son bann adorater lo en baz personnel. Par egzanp, dedikasyon avek Zeova i en ve personnel. (Galat 6:5) En mari napa drwa kennsel en tel ve. Me en madanm i devret evite fer en ve ki an konfli avek Parol Bondye oubyen son responsabilite anver son mari.
Leson pour nou:
25:11. Fineas in kit en legzanp ekselan pour nou konsernan devouman pour ladorasyon Zeova! Eski pa sa dezir pour kit kongregasyon prop i devret pous nou pour raport okenn pese grav avek bann ansyen?
35:9-29. Lefe ki en dimoun ki ti touy en lot envolonterman ti bezwen kit son lakour e sov dan en lavil refiz pour en pe letan, i ansenny nou ki lavi i sakre e nou devret annan respe pour lavi.
35:33. Later ki ti’n ganny polye par disan en inosan ti selman kapab ganny kouver par disan sa enn ki ti’n vers sa disan. I apropriye alor ki Zeova pou detrir bann mesan avan later i ganny transformen dan en paradi!—Proverb 2:21, 22; Danyel 2:44.
Parol Bondye i annan Pwisans
Nou devret montre respe pour Zeova e pour sa bann ki’n ganny konfye bann responsabilite parmi son pep. Liv Nonm i fer sa laverite sorti byen kler. Sa i en leson vreman enportan ki kontribye pour gard lape ek linite dan kongregasyon ozordi!
Sa bann levennman rakonte dan liv Nonm i montre konman i kapab fasil pour bann dimoun ki negliz zot spirityalite fer sa ki mal, parey mirmire, limoralite, ek idolatri. Serten sa bann legzanp ek leson dan sa liv Labib i kapab servi konman en baz pour bann bezwen lokal dan Renyon Servis dan bann kongregasyon Temwen Zeova. Wi vreman, “Parol Bondye i vivan e i annan pisans” dan nou lavi.—Ebre 4:12.
[Portre lo paz 31]
Par mwayen en nyaz mirakile parlao tabernak, Zeova ti endik bann Izraelit ler pour etablir zot kan e ler pour deplase
[Portre lo paz 32]
Zeova i merit nou lobeisans e ekspekte ki nou respe son bann reprezantan