En film 100 an ki batir lafwa
DAN NOU ARSIV
En film 100 an ki batir lafwa
“Sa i konmsi mon pe get Frer Russell an personn!”—En msye ki ti get “Photo-Drama” an 1914.
SA LANNEN i fer 100 an depi ki “Photo-Drama of Creation,” en prezantasyon vizyel enpresyonan, ti ganny zwe pour premye fwa pour ed dimoun devlop lafwa dan Labib konman Parol Bondye. Sa “Photo-Drama” ti promot Zeova konman Kreater dan en letan kot bokou dimoun ti’n perdi zot lafwa akoz bann kritik, dout e krwayans dan evolisyon.
Charles Russell ki ti responsab bann Etidyan Labib, ti pe toultan rod bann fason pli efikas e pli vit pour propaz laverite sorti dan Labib. Bann Etidyan Labib ti deza pe servi bann piblikasyon pour plis ki trant an. Me aprezan en nouvo mwayen pour propaz laverite ti atir zot latansyon: bann film.
PROPAZ LEVANZIL ATRAVER BANN FILM
Dan bann lannen 1890 bann manm piblik ti konmans get bann film ki ti napa son. An 1903, en film relizye ti ganny montre dan en legliz New York. Alor an 1912, sa moman kan lendistri film ti’n fek konmanse, Russell ti konmans preparasyon pour sa “Photo-Drama.” I ti realize ki sa fason kominike ti kapab ansenny laverite Labib dan en fason ki bann piblikasyon tousel pa ti kapab fer.
Normalman sa wit erdtan prezantasyon “Photo-Drama” ti ganny zwe an kat parti. I ti annan 96 leksplikasyon lo Labib ki ti’n ganny rikorde an bref par en orater byen renonmen e ki ti ganny zwe pandan “Photo-Drama.” Bann senn ti akonpannyen avek lanmizik klasik. Bann dimoun ki ti konn servi granmofonn ti zwe bann rikord lavwa ek lanmizik an menm tan ki bann slayd kouler ek film baze lo bann zistwar renonmen ki sorti dan Labib ti ganny zwe.
Laplipar sa bann film e bokou bann slayd an vit ti sorti kot bann stoudyo komersyal. Bann artis profesyonnel Filadelfi, New York, Pari e Lonn ti penn bann slayd an vit ek bann bout film enn par enn. Bokou travayer dan Art Room Betel ti osi penn e refer bann slayd ki ti’n kase. An plis ki sa bann film ki ti’n ganny aste, lafanmir Betel ti ganny filmen Yonkers, New York kan zot ti zwe rol Abraam, Izaak ek sa lanz ki ti anpes Abraam sakrifye son garson.—Zen. 22:9-12.
En asosye Frer Russell ti dir medya ki sa mwayen kominikasyon ti pou “fer plizyer milye dimoun enterese avek Labib, plis ki nenport lezot mwayen [ki ti’n] deza ganny fer pour promot progre larelizyon.” Eski bann klerze ti pou apresye sa nouvo zefor ki’n ganny fer pour ed en kantite dimoun ki ti lafen spirityelman? Non. O kontrer, bann sef larelizyon konman en group ti kondann sa “Photo-Drama,” serten ti menm servi bann taktik rize pour anpes bann dimoun get sa dram. Dan en landrwa, en reprezantan bann sef relizye ti koup elektrisite.
Kantmenm sa, lodyans ti ranpli bann lasal pour vwar sa “Photo-Drama” san ki zot ti bezwen peye. Leta-z-ini, apepre 80 lavil ti pe montre sa “Photo-Drama” sak zour. Bokou dimoun ti’n enpresyonnen pour vwar zot premye film avek son. Time-lapse photography ti permet zot vwar en pti poul eklo ek en fler fleri. Bann lenformasyon syantifik sa letan ti ganny servi pour montre lasazes ekstraordiner Zeova. Parey in ganny mansyonnen anler, kan en dimoun ti vwar Frer Russell lo lekran pe entrodwir sa “Photo-Drama” i ti krwar ki i “pe get frer Russell an personn.”
EN LEVENNMAN ENPORTAN DAN LEDIKASYON LO LABIB
Tim Dirks en ekriven e istoryen film ti dekrir sa “Photo-Drama” konman “sa premye gran screenplay ki ti servi son (lavwa rikorde), film e bann magic lantern color slide tou ansanm.” Bann film ki ti’n ganny fer avan “Photo-Drama” ti’n servi en pe sa bann teknik me pa tou dan en prezantasyon, espesyalman enn ki ti baze lo Labib. Napa en film ki ti annan en pli gran lodyans ki sa “Photo-Drama,” ki an total ti apepre nef milyon dan Nor Lanmerik, Lerop, Lostrali e Nouvel Zelann dan zis son premye lannen!
Sa “Photo-Drama” ti ganny montre pour premye fwa le 11 Zanvye 1914 dan lavil New York. Set mwan pli tar Premye Lager Mondyal ti deklare. Me, bann lafoul partou dan lemonn ti kontinyen ranpli lasal pour vwar sa “Photo-Drama” kot zot ti ganny rekonfor atraver bann senn reel lo bann benediksyon Rwayonm ki pou vini. Pour lannen 1914 “Photo-Drama” ti vreman en prezantasyon remarkab.
[Bwat lo paz 32]
Anmezir 1914 ti pe aprose, I.B.S.A. ti organize e fer tou zefor posib pour rann en temwannyaz dan lemonn antye. Anfet, pour kapab arive fer sa, “Photo-Drama of Creation,” ti ganny prodwir. Sa ti demann en kantite letan, zefor ek resours
[Ekstre lo paz 32]
“I ti montre tou sa ki ti arive depi kreasyon bann zetwal ziska sa Mil An ki Kris pou dirize.”—Francis Barnes, aze 14 an lannen 1914
[Portre lo paz 32]
Avek presizyon, sa bann operater kalifye ti organiz prezantasyon sa film ki ti apepre trwa kilomet longer, 26 rikord granmofonn e 500 slayd
[Portre lo paz 31]
Bann ser ki ti sorti dan bann kongregasyon dan sa rezyon ti donn plizyer milyon kopi sa progranm ki ti annan bann portre “Photo-Drama”
Bann ki ti asiste ti osi ganny bann badz ki ti annan sa mo “Pax” ek portre Zezi lo la konman en zenn garson. Sa badz ti fer zot rapel pour vin en garson lape.
[Portre lo paz 31]
Sa “Photo-Drama” ti ganny zwe premye fwa le 11 Zanvye 1914 dan sa zoli lasal teat ki ti pour Lasosyasyon Etidyan Labib Enternasyonal
[Portre lo paz 32]
An tou, ven sa bann lekipman “Photo-Drama” ti ganny servi par detrwa group dan Nor Lanmerik
