Bato ba be̱n bedangwedi ba bwam ba bi ná te̱ite̱i diwengisan oteten a bwam na bobe. Bedangwedi babu be si matukwa bupisane̱ bete̱medi to̱ besengedi babu. To̱ ponda to̱ moto a titino̱ o je̱ne̱ babo̱, bedangwedi babu be se̱medi nde o nje ba bino̱ ná ye bwam to̱ bobe.

Bana ba masenga jita la mo̱nge̱le̱ ma mpenga jombwea bwam na bobe, o esukulu, musiki, sinima na television. Nika ńe ná e bola ná ba be̱ne̱ penda ońola nje bokono̱ jombwea bwam na bobe.

Mi mitakisan me ngińa tobotobo o pond’a busa l’eso̱mbe̱. Kalati Beyond the Big Talk e makwala ná: “O mi mimbu, bangame̱n so̱ṅtane̱ ná bato jita ba me̱nde̱ pula o ńakisane̱ babo̱ o bola mambo mō̱ ná bane̱ ba to̱nde babo̱. Bangame̱n so̱ jokwa bola nje ba bino̱ ná ye bwam, to̱ e be̱ nde ná nik’e si mabwese̱ mako̱m mabu muńe̱nge̱.” Na mbale̱, bayedi bangame̱n jokwe̱le̱ bana babu nika, obiana ba mapo̱ o mimbu ma busa l’eso̱mbe̱.

Lee̱ ná bwē nje ye bwam na nje ye bobe.

BETE̱SEDI BA BIBE̱L: “Nde da la mbale̱ le nde ońola bato ba koki bena ońola ko̱lo̱ngo̱ne̱ bangwe̱le̱ dibie̱ labu o jemba bwam na bobe.”​—Bonahebe̱r 5:14.

• Bolane̱ byala be mongwane̱ o bia nje ye bwam na nje ye bobe. Bolane̱ bete̱medi ba longe̱ la buńa te̱ o lee̱ mo̱ diwengisan le oteten a mambo; we ná o kwala ná: “Din le mbale̱; din di titi mbale̱.” “Din di te̱nge̱n; din di si te̱nge̱n.” “Din le bwam; din le bobe.” Na ponda, muna a me̱nde̱ bia njika mambo me bwam na njika mo̱ me bobe.

• Bola njo̱m i mabole̱ ná lambo di be̱ bwam to̱ bobe. Baise̱ myuedi ka: Ońola nje yeno̱ bwam o be̱ mbale̱ e? Ne̱ni mpoṅ mweno̱ ná mu ńamse̱ mako̱m e? Ońola nje jiba leno̱ bobe e? Bolane̱ mbad’a dutea ńa bwam ni me̱nde̱ jongwane̱ mun’ango̱ o bia jemba bwam na bobe.

• Bola ná a so̱ṅtane̱ mweńa ma bedangwedi ba bwam. We ná o kwalane̱ mo̱ ná: “We te̱ mbale̱, bato ba me̱nde̱ lakisane̱ wa” to̱ ná “We te̱ muyao, bato ba me̱nde̱ to̱ndo̱ o be̱ na wa.”

Bola ná mbia mwe̱se̱ mu bupe̱ bediedi be te̱se̱be̱ jombwea bedangwedi.

BETE̱SEDI BA BIBE̱L: “Wasa bińo̱me̱ne̱.”​—2 Korinto 13:5.

•   Mbia mwe̱se̱ mu mabupe̱ te̱ bediedi be te̱se̱be̱ jombwea bedangwedi, e me̱nde̱ be̱ wa lambo di bo̱bi o kwala ná:

  • “O mbia masu di si mawo̱ndo̱.”

  • “Bewe̱nji to̱ bekima ba titi o mbia masu.”

  • “O mbia masu di si maloa bato.”

Na nika, mun’ango̱ a me̱nde̱ so̱ṅtane̱ ná bediedi jombwea bedangwedi be titi buka te̱ mambenda, be pe̱ nde bete̱sedi be madie̱le̱ mbia mańu.

• Ko̱lo̱ngo̱ne̱ kwala na mun’ango̱ ońola bediedi lo mabupe̱no̱ o mbia mańu. Bolane̱ mambo ma mabolane̱ buńa te̱ o jokwe̱le̱ mo̱. We ná o kobisane̱ bedangwedi bańu na be a me̱ne̱no̱ o television to̱ o esukulu. Baise̱ mo̱ myuedi ka min: “Nje wa o wusano̱ bola o be bete̱medi e?” “Nje mbia masu mu wusano̱ bola e?”

Ongwane̱ babo̱ o bama o bedomsedi babu ba bola nje ye bwam.

BETE̱SEDI BA BIBE̱L: ‘Be̱ne̱ doi la mulema di sangi.’​—1 Petro 3:16.

• Sesa bedangwedi ba bwam. Mun’ango̱ a boli te̱ lambo la bwam, sesa mo̱, langwea pe̱ mo̱ ońola nje weno̱ o sesa mo̱. We ná o kwala ná: “O boli bwam, ońola nika, na bwane̱ wa muńe̱nge̱.” Mun’ango̱ a langwedi te̱ wa ná a boli lambo la bobe, se̱le̱ sesa mo̱ ná a langwedi wa mbale̱, denge̱ o mako̱kise̱ mo̱.

• Ongwane̱ babo̱ o po̱ngulane̱ bedangwedi ba bobe. Ongwane̱ bana bo̱ngo̱ o jemea betune̱ ba bebolo babu. Bangame̱n so̱ṅtane̱ nje ya bobe ba bolino̱ na ne̱ni nika ńeno̱ diwengisan na bede̱mo ba mbia mańu. Bayedi bō̱ ba mabanga langwea mun’abu ná a si dango bwam, ná ba si ‘bwese̱ mo̱ ndutu;’ nde bana ba so̱ṅtane̱ te̱ ońola nje di lambo ba bolino̱ leno̱ bobe, nik’e mokwe̱le̱ doi labu la mulema, e bola pe̱ ná ba sambe bedangwedi ba bobe.