Bato ba ńai ná a matumba na leme̱, ba maja o etika ewo̱ ye o mikondo ma Amerika, etum na ńuma ńuma ńe o mindi minde̱ne̱. O mo̱di ma Madibe̱dibe̱ 2017, dibo̱to̱ la 13 la Mboṅ a Yehova lalo o mo̱pi ma Maroni. O bola nje e? O langwea bato ba maje̱ owo mwe̱ndi ma dipita mu maso̱be̱ o Bibe̱l.

Mo̱di mō̱ oboso ba di lo̱ndo̱ la 12 la mińa, be̱se̱ bena ba ta bangame̱n wale̱ bukedi o ndongame̱n ni ta ni te̱se̱be̱ ońola m’boṅsan. Winsley mo̱ ná: “Joko mambo jombwea mundi na myango mao, joko pe̱ ne̱ni jangame̱nno̱ boṅsane̱ ońola di lo̱ndo̱. Moto te̱ a ta a be̱ne̱ ewa we̱ni a tano̱ angame̱n we̱le̱ dibato lao na ndabo’ao ńa lungu. Di ta jangame̱n no̱ngo̱ avion ngedi iba, nde di tombise̱ pe̱ hawa jita o myo̱lo̱.

Ne̱ni bonasango na bonańango bena ba po̱so̱be̱ ońola di lo̱ndo̱ ba sengino̱ e? Ponda Claude na Lisette, bena ba be̱n mumutoba ma mbu na lambo ba kusino̱ bebeledi, ba pomane̱ nde jemea mo̱. Claude mo̱ ná: “Na ta muńe̱nge̱ jita, nde na ta pe̱ Mickaëlna bwa bo̱ngo̱. Na ta na senga ná mu mo̱pi mwe bobe jita.” Lisette pe̱ a ta a be̱ne̱ mao mitakisan. Mo̱ ná: “Na ta na baise̱ mbame̱ne̱ ne̱ni na me̱nde̱no̱ we̱le̱ to̱po̱ leme̱ labu.”

Nika pe̱ nde ńe ná nu ta o mu mundenge a tano̱ a baise̱ mo̱me̱ne̱. Mo̱ ná: “Di si ta di bia mambo jita jombwea tumba la Wayana. Na po̱ngi so̱ son a muwaso o internet ná nokwe byala bō̱, na ne̱ni soma bato na eyem’abu.”

Shirley, ńalo o lo̱ndo̱ na mom’ao Johann, a po̱ngi nde list ńa leme̱ le̱se̱ ba mato̱po̱no̱ o wa wuma. Mo̱ ná: “Di songo sinima jita yena ye na leme̱ labu i maso̱be̱ o jw.org, nde di kusa pe̱ kalati nisadi ni mongwane̱ o kwala na bato o eyem’a Wayana.”

O kwasu, 4 má Madibe̱dibe̱, di dibo̱to̱ la bato di no̱ngi avion o Saint-Laurent du Maroni wala o Maripasoula, son a mundi mō̱ o Guyana.

Mińa mine̱i mi bupe̱, di dibo̱to̱ la bato di no̱ngi myo̱lo̱, na mo̱ lala o mindi misadi me o mo̱ń a mundi ma Maroni. Roland mo̱ ná: “Bato ba mi mindi ba kasi mwe̱ndi ma Bibe̱l. Ba ta ba be̱ne̱ jita la myuedi, bō̱ ba ta na mo̱me̱ne̱ ba pula ná jokwe Bibe̱l na babo̱.”

O mundi musadi mō̱, Johann na Shirley ba dongame̱n beso̱mbe̱ ba babaedi bō̱ bena ba bo̱lo̱ne̱ elong’a mbia ewo̱ yena e bo ńolo ye ponda to̱ ininga. Johann mo̱ ná: “Di lee̱ babo̱ sinima Un Amérindien trouve son Créateur o jw.org. Ni sinima e tapi babo̱ jita. Na babo̱ ba bola biso̱ adre̱s e-mail ńabu ońolana ba ta ba pula ná di benge kwala.”

Ombusa nika, na di dibo̱to̱ la bato lala o mundi ma Antécume Pata. Owo, janea la mundi di boli babo̱ wonja o late̱le̱ mabato mabu ná ba wumse̱ son. Bo̱ke̱le̱ o dibo̱, ka nje te̱ bana ba mundi ba mabolano̱.

Ba bo̱le̱no̱ o mu mundi, balo nde o mundi musadi mupe̱pe̱ mu belabe̱ ná Twenké, we̱ni ba bomane̱no̱ ná baje̱ o mu mundi ba kusi kwedi. Éric ńena nu ta o muso̱ngi ma ba bena ba boṅsane̱ di lo̱ndo̱ mo̱ ná: Janea la mu mundi ba mabele̱no̱ ná ‛Grand Man,’ a boli biso̱ wonja ná di dangwe o mundi, o bwam ba wanea ba bena ba kusi kwedi lo̱ko̱mea. Janea na mbia mao ba bo muńe̱nge̱ jita ponda di langino̱ bepasi ba Bibe̱l o Bibe̱l a Wayana. Di lee̱ pe̱ babo̱ sinima i malee̱ makaki ma Bibe̱l jombwea bepumbwedi.”

Bate̱ dikalo ba no̱ngi avion o Maripasoula wala o mundi musadi mu be̱n dina ná Grand-Santi; di lo̱ndo̱ di no̱ngi mwalalo ma minuti. Na babo̱ ba te̱ye̱ bato ba mu mundi dikalo Kwasu na Muko̱su. Nde Ngisu bala o mundi musadi mupe̱pe̱ mu be̱n dina ná Apatou, nje yena e no̱ngi hawa itanu n’epasi.

Mińa miba obiana ba matimba, bate̱ dikalo ba pe̱pe̱le̱ mindi ma Maroni mena me o beyidi, owe̱ni bana ba bakom ba wu o Afrika ba tano̱ ba ja; ba se̱le̱ nde jese̱ ba bakom o Amerika ńa Mikondo niponda ńena Suriname, ekombo ye ombasan e si tano̱ e máte̱se̱ wonja. Ba bate̱ dikalo ba bele̱ bato be̱se̱ o jukea o ndongame̱n a tobotobo ba po̱ngise̱no̱ o eyidi. Claude mo̱ ná: “Milema masu mi ta mi londa na muńe̱nge̱ ponda je̱nno̱ ná bato jita ba po̱i. Di bele nde babo̱ y’idiba me̱ne̱!” Karsten, ńena nu ta o lo̱ndo̱ lao laboso, a tombise̱ ekwali na bwambo ba Aukan e ta e be̱ne̱ tema ná “Mo̱ longe̱ le̱se̱ din e?” Mudibua ma bato na mō̱ mukedi o ni ndongame̱n.

O sukan, bonasango ba timbi o Saint-Laurent du Maroni. Babo̱ be̱se̱ ba ta muńe̱nge̱ jita ońola mbadi bato ba kasino̱ babo̱; bato ba no̱ngi kalati jita, bombwa pe̱ sinima jita ya bebokedi.

Lisette mo̱ ná: “Na si be̱n byala o tele̱ye̱ muńe̱nge̱ na masengano̱ ońolana nalo o di lo̱ndo̱.” Cindy pe̱ mo̱ ná: “Ba bele̱ pe̱te̱ mba, na me̱nde̱ nde pomane̱ jemea. Wangame̱n nde bola nika ná o bie muńe̱nge̱ mwe oten!”

Bato bō̱ bena balo o di lo̱ndo̱ ba be̱n pe̱te̱ ńo̱ngi o wala oten. Mickaël mo̱ ná: “Je pe̱te̱ be̱be̱ o wala o lo̱ndo̱ dipe̱pe̱!” Winsley a no̱ngi bedomsedi ba wala ja o Saint-Laurent du Maroni. Claude na Lisette pe̱ ba no̱ngi bedomsedi ba wala ja o Apatou.