KALANSEN 34

An be se k’a yira cogo di ko an be Jehova kanu?

A LAMƐN KAAN NIN NA

Kabi i ye bibulukalan daminɛ, yala a b’i ɲɛɛ na ko i be Jehova kanu ka tɛmɛ fɔlɔ kan wa? Teriya min be e n’ale cɛ, i b’a fɛ o barika ka to ka bonya wa? N’o lo, a to i hakili la ko ni Jehova y’a ye ko i b’a kanuna kosɔbɛ, ale fana bena to k’i kanu kosɔbɛ ani k’a janto i la. I be se k’a yira a la cogo di ko i b’a kanu?

1. An b’a yira Jehova la cogo di ko an b’a kanu?

An b’a yira Jehova la ko an b’a kanu n’an be mɛnni kɛ a fɛ (1 Zan 5:3 kalan). A tɛ mɔgɔ si waajibiya a ka mɛnni kɛ ale fɛ. Nka, a be sababu di bɛɛ ma a k’a latigɛ n’a bena mɛnni kɛ wala n’a tɛna mɛnni kɛ ale fɛ. Mun na do? Sabu a b’a fɛ an ka mɛnni kɛ ale fɛ n’an “dusu bɛɛ ye.” (Ɔrɔmukaw 6:17). O kɔrɔ ko Jehova t’a fɛ i ka mɛnni kɛ ale fɛ diyagoya la, nka i k’o kɛ sabu i b’a kanu le. Gafe nin tilanyɔrɔ 3nan ni 4nan bena i dɛmɛ i k’a yira Jehova la ko i b’a kanu. Cogo di do? Min ka di a ye, i k’o kɛ. Nka min ka gwo a ye, kana sɔn k’o kɛ.

2. Mun na a be se ka gwɛlɛya an ma k’a yira Jehova la ko an b’a kanu?

“Gwɛlɛya caaman be mɔgɔtilennin sɔrɔ.” (Zaburuw 34:20). Dafabaliyakow b’an kelen kelen bɛɛ sɛgɛn. Wariko, tilenbaliyakow, ani gwɛlɛya wɛrɛw b’an kan fana. O kosɔn, n’a sɔrɔ a man nɔgɔ ka mɛnni kɛ Jehova fɛ ani k’a sago kɛ. O bɛɛ n’a ta, n’i be banba ka mɛnni kɛ Jehova fɛ, i b’a yira a la ko i b’ale lo kanu ka tɛmɛ fɛɛn bɛɛ kan. O cogo la, i b’a yira ko i be kantigiya kɛ a ye. O la, ale fana bena kantigiya kɛ i ye. A tɛna i to yen abada.—Zaburuw 4:4 kalan.

A ƝINI KA DƆ LƆN TUGUN

An k’a filɛ fɛɛn min kama an ka kanminɛli be Jehova ninsɔndiya, ani fɛɛn min be se k’an dɛmɛ ka kantigiya kɛ a ye.

3. Sɔsɔliko dɔ, min ɲɛsinna e fana ma

Zɔbu ka kitabu b’a yira ko Sutana ma Zɔbu dɔrɔn lo jalaki dɛ. Nka, minw bɛɛ b’a fɛ ka Jehova sago kɛ, a y’olu fana jalaki. Zɔbu 1:1, 6–2:10 kalan. O kɔ, a’ ye ɲiningali nunu kɛ ani ka baro kɛ u kan:

Sutana fɛ, mun na Zɔbu tun be mɛnni kɛ Jehova fɛ?—Zɔbu 1:9-11 lajɛ.
Sutana ye ele fana ani adamaden tɔɔw bɛɛ jalaki mun lo la?—Zɔbu 2:4 lajɛ.

Zɔbu 27:5b kalan. O kɔ, a’ ye ɲiningali nin kɛ ani ka baro kɛ o kan:

Zɔbu y’a yira cogo di ko a be Jehova kanu sɔbɛ la?

Zɔbu y’a yira ko a be Jehova kanu a kɛtɔ ka kantigiya kɛ a ye

An b’a yira ko an be Jehova kanu an kɛtɔ ka kantigiya kɛ a ye

4. Jehova ninsɔndiya

Talenw 27:11 kalan. O kɔ, a’ ye ɲiningali nunu kɛ ani ka baro kɛ u kan:

N’i be koow kɛ hakilitigiya la, ani n’i be mɛnni kɛ Jehova fɛ, o be mun lo kɛ a la do? Mun na i ko ten?

5. I be se ka kantigiya kɛ Jehova ye

N’an be Jehova kanu, o bena an lasun k’a kofɔ mɔgɔw ye. Kantigiya bena an lasun k’o kɛ hali n’a man nɔgɔ. A’ ye VIDEWO filɛ. O kɔ, a’ ye ɲiningali nunu kɛ ani ka baro kɛ u kan:

VIDEWO: Kɔrɔbɔli bɛɛ n’a ta, i ka limaniya lafasa (5:09)

Tuma dɔw la, a ka gwɛlɛ i ma ka kuma Jehova koo la wa?
Videwo nin na, mun lo ye Grayson dɛmɛ ka see sɔrɔ a ka siranya kan?

Min ka di Jehova ye, n’o ka di an ye fana, ani min ka gwo a ye, n’an b’o kɔniya, a tɛna gwɛlɛya an ma ka kantigiya kɛ a ye. Zaburuw 97:10 kalan. O kɔ, a’ ye ɲiningali nunu kɛ ani ka baro kɛ u kan:

Koo minw ka di Jehova ye, u dɔw fɔ. Koo jumanw lo ka gwo a ye?
Mun lo be se k’i dɛmɛ ka koo ɲuman kanu ani ka koo jugu kɔniya?

6. N’an be mɛnni kɛ Jehova fɛ, o b’an nafa

Ka mɛnni kɛ Jehova fɛ, o lo ɲɔgɔn tɛ yen. Ezayi 48:17, 18 kalan. O kɔ, a’ ye ɲiningali nunu kɛ ani ka baro kɛ u kan:

Min ka fisa an ma, e ka miiri la, Jehova b’o lɔn tuma bɛɛ wa? Mun na i ko ten?
Kabi i y’a daminɛ ka bibulukalan kɛ ani ka tiɲɛn Ala Jehova lɔn, o y’i nafa cogo di?

NI MƆGƆ DƆ Y’A FƆ I YE KO: “N’ be min kɛra, Ala mako t’o la.”