Yezu ye Fariziɲɛw kɔrɔfɔ ko u ka landaw b’olu yɛrɛ dɔrɔn lo nafa. O kɔ, a tagara n’a ka kalandenw ye Fenisi jamana na. O be tileben ni saheli cɛ, Tiri ni Sidɔn mara la. U tun bena kilomɛtɛrɛ caaman lo kɛ ka sɔrɔ ka se yen.

Yezu jigira mɔgɔ dɔ ka soo, nka a tun t’a fɛ mɔgɔ si k’a lɔn ko a be yen. O bɛɛ n’a ta, mɔgɔw bɔra a nako kala ma. Grɛki muso dɔ, min wolola Fenisi mara la, ale nana Yezu deli ko: “Makari ne la Matigi, ne denmuso tɔɔrɔnin lo kosɔbɛ, jina b’a la.”—Matiyo 15:22; Mariki 7:26.

Wagati dɔɔni o kɔ, Yezu ka kalandenw y’a dali ko: ‘Muso nin ɲafilɛ, n’o tɛ, a be tugura an kɔ n’a ka mankan ye.’ Yezu y’a ɲɛfɔ u ye fɛɛn min kama a b’a kɛra komi a ɲɛɛ t’a la. A ko: “Ne cira Isirayɛlidenw dama ma, minw be i n’a fɔ saga tununinw.” Nka, muso m’a fari faga. A gwɛrɛla Yezu la k’a kunbiri gwan a kɔrɔ k’a dali ko: “Matigi, n dɛmɛ.”—Matiyo 15:23-25.

N’a sɔrɔ Yezu b’a fɛ k’a filɛ n’o muso limaniyanin lo. O kama, a kumana a fɛ i ko Yahutuw be sigasiga siya wɛrɛw la cogo min na. A y’a fɔ o muso ye ko: “A daganin te ka denmisɛnw ka dumuni ta k’a di wuludenninw ma.” (Matiyo 15:26). Yezu ko “wuludenninw” walisa k’a yira ko minw tɛ Yahutuw ye a b’u kanu. Siga t’a la, a ɲɛda tun b’o lo yira ani a kumana ni makari ye cogo min na.

Sanni muso ka dimi Yezu ka kumaw kosɔn, a y’a majigi ka Yezu jaabi ko: “O ye tiɲɛ ye Matigi, nga wulutigi ka dumuni murumuru minw be ben, wuluw b’o dumu.” Yezu y’a ye k’o muso dusukun ka ɲi ani a y’a fɔ a ye ko: “Muso, i lara ne la kosɔbɛ. I be min fɛ, o ka kɛ i ye.” (Matiyo 15:27, 28). O lo kɛra: a denmuso kɛnɛyara hali k’a sɔrɔ a tun tɛ Yezu gɛrɛfɛ! Muso kɔsegira soo tuma min na, a y’a denmuso lanin ye dilan kan ani a tun kɛnɛyara pewu! “Jina tun bɔra a la ka ban.”—Mariki 7:30.

Yezu n’a ka kalandenw bɔra Fenisi mara la, ka jamana cɛtigɛ ka taga Zurudɛn baji sanfɛyɔrɔ fan fɛ. N’a sɔrɔ u ye Zurudɛn baji tigɛ yɔrɔ dɔ la, Galile baji saheli fan fɛ. O kɔ, u donna dugu tan mara kɔnɔ min be weele ko Dekapoli. O yɔrɔ la, u yɛlɛla kulu kan. Nka, jama tagara u sɔrɔ yen. Mɔgɔw nana ni namaraw, senkelenniw, fiɲɛntɔw ani bobow ye Yezu fɛ. U y’u bila Yezu seen kɔrɔ ani a y’u kɛnɛya. O ye jama kabakoya ani u y’a daminɛ ka Israɛl ka Ala tando.

Yezu y’a janto cɛɛ dɔ la koɲuman. O cɛɛ tun ye tulogweren ye ani a tun tɛ se ka kuma ka ɲɛ. Miiri k’a filɛ o cɛɛ tun be cogo min na o jamaba cɛma! N’a sɔrɔ Yezu y’a ye k’o cɛɛ hakili siginin tɛ. O kama, a tagara n’a ye dan na ani a tun b’a fɛ ka min kɛ a la, a y’o yira a la. A y’a bolokunnanden don cɛɛ tulo la, a ye daji tu ani a magara cɛɛ nɛnkun na. O kɔ, a y’a ɲɛɛ kɔrɔta sanfɛ k’a fɔ ko: “Efata!” O kɔrɔ ko “i tulo ka yɛlɛ.” O yɔrɔnin bɛɛ, cɛɛ tulo yɛlɛla ani a y’a daminɛ ka kuma ka ɲɛ. Yesu t’a fɛ u k’o koo wangola. Mɔgɔw ye min ye ani olu yɛrɛ ye min mɛn Yezu daa la, Yezu b’a fɛ u ka basigi o lo kan ka la ale la.—Mariki 7:32-36.

Mɔgɔw y’a ye tuma min na ko see be Yezu ye ka banaw bɛɛ ban, u kabakoyara. U y’a fɔ ko: “A be koo minw kɛ, o bɛɛ ka ɲi kosɔbɛ! A be tulogwerenw yɛrɛ tulo yɛlɛ, k’a kɛ bobow be kuma.”—Mariki 7:37.