Jehova Seerew b’u jija k’u ka gwasow ani u mɔgɔɲɔgɔnw ka gwasow sabati. Ala lo ye denbaya jusigibaga ye. An be bonya la a kan o kosɔn (Zɛnɛzi 2:21-24; Efɛzikaw 3:14, 15). A ye sariyakolo dɔw di adamadenw ma Bibulu kɔnɔ. O sariyakolow be mɔgɔw dɛmɛ duniɲa kuru bɛɛ kɔnɔ ka ninsɔndiya sɔrɔ u ka furu kɔnɔ ani k’u ka gwasow sabati.

 An b’an jija ka Bibulu ka ladiliw sira tagama sabu o ladiliw b’an dɛmɛ ka kɛ furucɛw, furumusow ani bangebaga ɲumanw ye (Talenw 31:10-31; Efɛzikaw 5:22–6:4; 1 Timote 5:8). Hali denbayamɔgɔ minw tɛ diinan kelen na, hakilitigiya kuma minw be Bibulu kɔnɔ, u b’o denbayamɔgɔw dɛmɛ ka kɛ hɛɛrɛ la (1 Piyɛri 3:1, 2). An k’a filɛ mɔgɔ dɔw ye min fɔ o koo la. O mɔgɔw tɛ Jehova Seerew. U furuɲɔgɔnw fana tun tɛ Jehova Seerew ye fɔlɔ la, nka kɔfɛ u kɛra a ye.

•   “An furunin kɔ, saan wɔɔrɔ minw tugura o kɔ, an tun be kɛlɛ tuma bɛɛ ani an jigi tun tigɛnin lo. Ivete kɛnin kɔ Jehova Seere ye, a be koow kɛ ni kanuya ni dususuman ye sisan. A ye yɛlɛmani minw kɛ, o kɛra sababu ye an ka furu ma sa.”—Clauir, Berezil jamana na.

•   “Tuma min na n’ cɛɛ Chansa y’a daminɛ ka bibulukalan kɛ ni Jehova Seerew ye, n’ ma sɔn o ma sabu n’ tun b’a miiri ko Jehova Seerew be gwasow ci le. Nka, n’ nana a kɔrɔsi ko Bibulu ka ladiliw y’an dɛmɛ an ka furu kɔnɔ.”—Agness, Zambi jamana na.

 An ka waajuli baara la, an b’a yira an mɔgɔɲɔgɔnw na Bibulu ka ladiliw sira tagamani be se ka mɔgɔ dɛmɛ cogo min na ka:

•   Furuɲɔgɔn sugandi ni hakilitigiya ye

•   Furu saan fɔlɔ kɛ hɛɛrɛ la

•   Jɛnɲɔgɔnya ɲuman kɛ n’i buranw ye

•   Warikow ɲɛnabɔ

•   Kɛlɛmisɛnw dabila

•   Sɔn ka yafa ɲɔgɔn ma

•   Denmisɛnw lamɔ

 Tiɲɛn fɔ ka di, o be na ni kɛlɛmisɛnw ye tuma dɔw la. Saan 1998 la, sɛgɛsɛgɛrikɛla dɔw (Sofres) y’a yira ko gwaso minw kɔnɔ furuɲɔgɔn dɔ kɛra Jehova Seere ye, o gwasow ɲɔgɔn mugan mugan kan, kelen lo ye gwɛlɛya sɔrɔ o kosɔn.

 Yezu tun kɔnna k’a fɔ ko minw bena sɔn ale ka kalanw ma, u bena gwɛlɛyaw sɔrɔ u ka denbaya kɔnɔ tuma dɔw la (Matiyo 10:32-36). Tariki sɛbɛbaga Will Durant y’a sɛbɛ ko Ɔrɔmukaw ka masaya tuma na, “u tun be kerecɛnw jalaki k’u be gwasow ci.” * Bi fana, u be Jehova Seere dɔw jalaki o cogo kelen na. Nka yala o kɔrɔ ko furuɲɔgɔn min kɛra Jehova Seere ye, o bɛnbaliyako ye ale lo nɔɔ ye wa?

 Erɔpu ka kititigɛsoba min be adamadenyajow lafasa, o kititigɛso y’a fɔ o koo la ko tuma caaman na, denbayamɔgɔ minw tɛ Jehova Seerew ye, olu lo “tɛ sɔn u somɔgɔ tɔɔ kelen k’a ka diinankow kɛ a sago la.” O lo ka teli ka na ni bɛnbaliya ye u cɛ. O kititigɛso y’a fɔ fana ko: “O koo tɛ dan Jehova Seerew dɔrɔn ma. Gwaso minw bɛɛ kɔnɔ denbayamɔgɔ dɔ donna diinan wɛrɛ la, o gwɛlɛya ɲɔgɔn ka teli ka sɔrɔ.” * Hali ni Jehova Seerew ka denbayamɔgɔw tɛ sɔn u k’u ka diinankow kɛ u sago la, u b’u jija ka tugu Bibulu ka ladili nin kɔ: “Aw kana kojugu juru sara, . . . Aw k’aw seko bɛɛ kɛ ka to hɛrɛ la ni mɔgɔ bɛɛ ye, n’o be se ka kɛ.”—Ɔrɔmukaw 12:17, 18.

 Bibulu b’a fɔ ko n’an b’a fɛ ka furu mɔgɔ dɔ ma, “fɔɔ ale ka kɛ mɔgɔ ye min lara Krista la.” (1 Korɛntikaw 7:39). O kɔrɔ ko an n’o tigi ka ɲi ka kɛ diinan kelen na. An b’o cikan labato sabu a bɔra Bibulu lo kɔnɔ ani nafa b’a la. Saan 2010 la, zurunali dɔ y’a fɔ ko “furuɲɔgɔnma minw be diinan kelen na ani u ka kokɛcogow n’u ka lannakow ye kelen ye,” jɛnɲɔgɔnya barikaman ka teli ka sɔrɔ u ni ɲɔgɔn cɛ. * (Journal of Marriage and Family)

 Nka Jehova Seerew t’u ka diinandenw jija u ka faran u furuɲɔgɔn na n’o tigilamɔgɔ tɛ Jehova Seere dɔ ye. Bibulu b’a fɔ ko: “N’aw balima dɔ ka muso ma la Yezu la, n’o muso nin y’a latigɛ ko a be to a fɛ, a kan’a bila. N’aw balimamuso dɔ cɛɛ ma la Yezu la, n’o cɛɛ nin y’a latigɛ k’u bena to ɲɔgɔn fɛ ten, muso nin kana bɔ a fɛ.” (1 Korɛntikaw 7:12, 13). Jehova Seerew b’o cikan labato.