N̄kamana ke Tiranë emi edide ibuot obio Albania. Ima ibuene etieti. Ete mi ekedi eti owo, ama esinyụn̄ anam utom ediwak hour man ekeme ndinyene se edidade ise iban̄a nnyịn. Kpa ye oro, ikesifọfiọn̄ọ ubọk iyom se ikpadiade ye se ikpadade ise iban̄a idem nnyịn. Ini ndide eyenọwọn̄, ama enen̄ede abiak mi nte ubon nnyịn ẹkebuenede ntre. Nsụk nteti ke ini oro, n̄kesiwakke ndinyene ikpaukot nsịne. Ata ediwak ini n̄kwe udia ndia yak oyụhọ mi.

 N̄kọtọn̄ọ ndidian ubọk ke n̄kpọ owo ini n̄kedide ata ekpri ekpri. N̄kekere ke n̄n̄wam ubon nnyịn. Utịt utịt, mma ndia ndụk ubọk mme bodisi. Ntre ke 1988, ini ndide isua 14, ẹma ẹnọ mi n̄ka ufọkn̄wed emi ẹsin̄wamde mme owo ẹkpụhọde. Mma ndu do isua iba n̄kpep utom welder. Ini n̄kpọn̄de ufọkn̄wed oro, ama ọdọn̄ mi nditre inọ n̄n̄wana n̄kpọ nse mban̄a idemmi; edi n̄kekwe utom nnam. Ediwak owo ikenyeneke utom ke Albania ini oro ke ntak mfịna emi okodude ke ukara. Ke mma n̄ketịme ntịme yak akak mi, mma mfiak ntọn̄ọ ndụk ye n̄kani ufan mi nnyụn̄ mfiak ntọn̄ọ uyịpn̄kpọ. Ke akpatre ẹma ẹmụm mi ye mme ufan mi oro ẹnyụn̄ ẹnọ nnyịn ika n̄kpọkọbi isua ita.

 Ke ẹma ẹkesio mi ke ufọk-n̄kpọkọbi, mma mfiak ntọn̄ọ idiọk uwem oro ke itie emi n̄ketrede. Nsọn̄ọn̄kpọ ama omụm isọn̄ etieti ke Albania, kpukpru n̄kpọ ama onyụn̄ etịmede ke idụt oro. Ke ini ndutịme oro, mma ndọn̄ ubọk ke nsio nsio n̄kpọ emi ibet akpande, nnyụn̄ n̄n̄wana okụk etieti nto mme n̄kpọ oro. Mma nsan̄a ye mme ufan mi n̄ka amauke. Ẹma ẹmụm owo iba ke otu oro, ami nnyụn̄ mfehe n̄kpọn̄ idụt oro. Ekpedi n̄kefeheke, ẹkpekekọbi mi ke ediwak isua. Ini n̄kpọ oro eketịbede, mma ndọdọ n̄wan nnyụn̄ nnyene ekpri eyen erenowo. N̄wan mi ekekere Julinda.

 Mma mmen n̄wan mi ye eyen mi mfehe n̄kodụn̄ ke England. Mma mbiere nditọn̄ọ obufa uwem do, edi n̄kekemeke sia idiọk uwem ama odụk mi iyịp aka anyan. Mma mfiak ntọn̄ọ, ukọm ibietke ke ikan̄. Isan̄ enye emi n̄kọtọn̄ọ mbubehe unyam n̄kpọsọn̄ ibọk. Mma nsịn ata ediwak okụk ke mbubehe oro.

 Julinda ekese didie mbubehe n̄kpọsọn̄ ibọk emi n̄kanamde? N̄kpama yak okop ke inua esie. Enye ọdọhọ ete: “Nte uwem eketiede ye ami ke Albania ini nsụk n̄kponde ama esinam n̄kere nte n̄kpọbọhọde uwem ubuene usen kiet usen kiet. Mma mbiere ndinam se ekpededi man n̄kpọ ọfọn mi. N̄kekere ke ima inyene ediwak okụk, ke uwem eyenem nnyịn. Ntre, ofụri emi Artan akasan̄ade osu nsu, eyịp n̄kpọ, anyam n̄kpọsọn̄ ibọk, onyụn̄ anam mme n̄kpọ ntre man okụk odụk edi, n̄kakpanke enye ke usụn̄ ndomokiet.”

 Ke 2002, ẹma ẹmụm mi ye ata ediwak n̄kpọsọn̄ ibọk ẹnyụn̄ ẹnọ mi n̄ka n̄kpọkọbi. Kpukpru se n̄kọdọhọde yak nnam man ikop inem uwem ẹketre do.

 Se Bible ekpepde ama ọtọn̄ọ ndidụk mi esịt sụn̄sụn̄, edi n̄kọdiọn̄ọke. Se nte akasan̄ade mi. Ke isua 2000, Mme Ntiense Jehovah ẹma ẹkwọrọ ikọ ẹnọ Julinda, enye onyụn̄ ọtọn̄ọ ndikpep Bible ye mmọ. Ikọdọn̄ke mi ndineme nneme Bible ye mmọ sia n̄kekere ke idinemke mi. Edi ama enem Julinda. Julinda ọdọhọ ete: “Ima isika ufọkabasi ke ufọk nnyịn. Mma mma Bible, n̄kesinyụn̄ ndaha Bible mbre mbre. Ama esidọn̄ mi ndidiọn̄ọ se Bible ekpepde, ama onyụn̄ enem mi etieti ndikpep Bible ye Mme Ntiense Jehovah. Ediwak n̄kpọ emi Bible ekpepde ama an̄wan̄a mi. Se n̄konyụn̄ n̄kpepde ama an̄wam mi ntre ndusụk ndiọi n̄kpọ emi n̄kesinamde. Kpa ye oro, n̄kosụk n̄kekere ke ima inyene ediwak okụk, ke esịt eyenem nnyịn. Ini ẹmụmde Artan ke enyịn ekeditara mi. Idahaoro ke n̄kenen̄ede n̄kụt ke se Bible etịn̄de aban̄a okụk edi akpanikọ. Ima iyom okụk nte owo oyom uwem, edi oro ikanamke ikop inemesịt. Mma ndikụt ndien ke oyom ndu uwem nte Jehovah ọdọhọde.”

 Ẹkesio mi ke ufọk-n̄kpọkọbi ke 2004. Edi ikebịghike, mma ndomo ndifiak nsịn ibuot ke mbubehe unyam n̄kpọsọn̄ ibọk. Edi Julinda ikamaha utọ mbubehe oro aba, ndien se enye eketịn̄de ye ami ama anam nnen̄ede n̄kere n̄kpọ. Enye ọkọdọhọ mi ete: “Nyomke okụk fo aba. Nyom fi, nnyụn̄ nyom nditọ mi ẹsikụt ete emi okobonde mmọ.” Ama akpa mi idem ndikop utọ ikọ oro ke inua esie, edi se enye eketịn̄de ekedi akpanikọ. N̄kodụhe ye ubon mi ke ediwak isua. Mma n̄kere n̄ko mban̄a kpukpru ufen emi n̄kọbọde ke ntak emi n̄koyomde okụk ke usụn̄ emi mîfọnke. Ntre mma mbiere ndikpụhọde, nnyụn̄ ndian̄ade nsan̄a ofụri ofụri ye n̄kani ufan mi.

 Se ikenen̄erede inam n̄kpụhọde ekedi se n̄kokụtde ini nsan̄ade ye n̄wan mi ye nditọ mi irenowo iba n̄ka mbono esop Mme Ntiense Jehovah. Se ikenemde mi ekedi nte mme owo ẹketiede ufan ufan, itiehe n̄kari n̄kari. Ke akpatre, mma ntọn̄ọ ndikpep Bible.

 Mma n̄kụt ke Bible ke “ima okụk edi orụn̄ kpukpru orụk idiọkn̄kpọ, ndien ke edinyanade mbịne ima emi, ndusụk owo ẹma . . . ẹda ediwak ubiak ẹnọmọ idemmọ.” (1 Timothy 6:​9, 10) Se itie Bible oro eketịn̄de ama enen̄ede an̄wan̄a mi sia se iketịbede inọ mi ekedi oro! Mfịna emi ekesịmde mi ke ntak idiọk uwem mi oro, ye kpukpru ufen emi ubon mi ye ami ke idemmi ikọbọde ama ọdiọk mi esịt tutu. (Galatia 6:7) Ini ndidiọn̄ọde utọ ima emi Jehovah ye Jesus Christ Eyen esie ẹmade nnyịn, mma ntọn̄ọ ndikpụhọde. Mma ntọn̄ọ ndinen̄ede n̄kere mban̄a mbon en̄wen n̄kan nte n̄kerede mban̄a idemmi. Mma nsinyụn̄ n̄wak ndidu ye ubon mi.

 Ami ndinam item Bible emi ọdọhọde: “Ẹkûyak usụn̄ uwem mbufo asan̄a ye ima okụk, edi ẹyụhọ ye se mbufo ẹnyenede,” an̄wam mi etieti. (Mme Hebrew 13:5) Mmenyene emem idahaemi, esịt inyụn̄ imiaha mi ufen aba. Esịt emi adatde mi ke ntak oro edi utọ idatesịt emi mmenyeneke akanam. Ami ye n̄wan mi inen̄ede idi itai ye aban̄, kpukpru owo ke ubon mi ẹnyụn̄ ẹnen̄ede ẹdiana kiet.

 N̄kesikere ke ndinyene ediwak okụk edinam esịt enem nnyịn. Edi idahaemi mmenen̄ede n̄kụt ke ubiatibet ye ima okụk ẹma ẹkọn̄ mi ibuot etieti. Idịghe nte nnyịn idi mme imọ owo, edi n̄kere ke nnyịn ndidi ufan ye Jehovah Abasi ọfọn akan se ededi emi nnyịn ikpenyenede. Nte kpukpru owo ke ubon nnyịn ẹdianade kiet ẹnam n̄kpọ Jehovah anam esịt enen̄ede enem nnyịn.