Devil edi spirit ntre owo ikemeke ndikụt ebiet emi enye odụn̄de. Enye idụn̄ke ke hell itụhọde mme idiọkowo, nte ẹwụtde ke ndise emi.

“Ekọn̄ ke heaven”

 Enyene ini emi ẹkesiyakde Satan odụk ebiet emi Abasi ye nti angel eken ẹdude. (Job 1:6) Bible ama etetịn̄ ke ‘ekọn̄ eyetịbe ke heaven,’ ndien ke ẹyebịn Satan ‘ẹsio ke heaven’ ẹduọk ke isọn̄. (Ediyarade 12:7-9) Se ẹtịn̄de ke Bible ye se itịbede ke isọn̄ ẹwụt ke ekọn̄ emi ama an̄wana ke heaven. Devil idụhe ke heaven aba.

 Ndi ọwọrọ ke enyene akpan ebiet emi Devil odụn̄de ke ererimbot emi ye nnyịn? Ke uwụtn̄kpọ, ẹkedọhọ ke Pergamum eset ekedi “ebiet emi ebekpo Satan odude” ye “ebiet emi Satan odụn̄de.” (Ediyarade 2:13) Emi iwọrọke ke Satan ama enyene ufọk do edi ọwọrọ ke mbon obio oro ẹkekpono Satan. Bible ọdọhọ ke Devil akara “kpukpru mme obio ubọn̄ isọn̄.” Sia edide ntre, ọwọrọ ke Satan inyeneke akpan ebiet kiet emi enye odụn̄de ke ererimbot edi odu ke isọn̄.—Luke 4:5, 6.