Ke usem Greek, ẹkot n̄wed Ediyarade A·po·kaʹly·psis, emi ọwọrọde “Ndifụhọde n̄kpọ” m̀mê “Ndiyarade n̄kpọ.” Emi anam idiọn̄ọ se idude ke n̄wed Ediyarade. Enye ayarade mme n̄kpọ emi ẹkedịbede onyụn̄ anam idiọn̄ọ nte mme n̄kpọ emi ẹkewetde ke eset ẹdisude. Ediwak n̄kpọ emi ẹdude ke n̄wed Ediyarade itịbeke kan̄a.

Se idude ke n̄wed Ediyarade

•   Ntọn̄ọikọ.—Ediyarade 1:1-9.

•   Etop emi Jesus ọnọde esop itiaba.—Ediyarade 1:10–3:22.

•   N̄kukụt emi ẹwụtde nte Abasi etiede ke ebekpo esie ke heaven.—Ediyarade 4:1-11.

•   Nsio nsio n̄kukụt emi edide kiet ebe efen ada itie:

  •   Ufịkn̄kpọ itiaba.—Ediyarade 5:1–8:6.

  •   Obukpon̄ itiaba; ọyọhọ obukpon̄ ition esịm itiaba asan̄a ye nnama ita.—Ediyarade 8:7–14:20.

  •   Usan itiaba emi ẹdọn̄ọde iyatesịt Abasi emi ẹdin̄wan̄ade iduọk ke isọn̄.—Ediyarade 15:1–16:21.

  •   N̄kukụt emi ẹwụtde nte ẹdisobode mme asua Abasi.— Ediyarade 17:1–20:10.

  •   N̄kukụt emi ẹwụtde nte Abasi anamde n̄kpọ ọfọn ke heaven ye isọn̄.—Ediyarade 20:11–22:5.

•   Akpatre ikpehe.—Ediyarade 22:6-21.

Se idinamde n̄wed Ediyarade an̄wan̄a nnyịn

1.   Se idude ke n̄wed Ediyarade edi eti mbụk ọnọ ikọt Abasi, idịghe etop emi anamde mmọ ndịk. Kpa ye oro ediwak owo ẹdọhọde ke n̄wed Ediyarade esinanam mmimọ ndịk, n̄wed emi ọtọn̄ọ onyụn̄ etre ye ikọ emi: Mbon emi ẹkotde n̄wed emi, ẹdiọn̄ọde se enye ọwọrọde, ẹnyụn̄ ẹnamde se ẹwetde ke n̄wed emi, ẹkop inemesịt.—Ediyarade 1:3; 22:7.

2.   Ediwak n̄kpọ emi ẹtịn̄de ke n̄wed Ediyarade ẹda ẹban̄a n̄kpọ.—Ediyarade 1:1.

3.   Mme n̄wed Bible eken ẹma ẹbebem iso ẹtịn̄ ẹban̄a ndusụk owo ye n̄kpọ emi ẹdude ke n̄wed Ediyarade:

   •   Jehovah—“ata Abasi ke heaven.” Enye okobot kpukpru n̄kpọ.—Deuteronomy 4:39; Psalm 103:19; Ediyarade 4:11; 15:3.

   •   Jesus Christ—“Eyenerọn̄ Abasi.”—John 1:29; Ediyarade 5:6; 14:1.

   •   Satan kpa Devil—asua Abasi.—Genesis 3:14, 15; John 8:44; Ediyarade 12:9.

   •   Akwa Babylon—ukem nte Babylon (m̀mê Babel) ke eset, akwa Babylon edi asua Abasi, asua ikọt Abasi, ye ebiet emi ẹkpepde nsu ẹban̄a Abasi.—Genesis 11:2-9; Isaiah 13:1, 11; Ediyarade 17:4-6; 18:4, 20.

   •   “Inyan̄”—mbon emi mîdaha ye Abasi.—Isaiah 57:20; Ediyarade 13:1; 21:1.

   •   Mme n̄kpọ emi ẹkedude ke tent utuakibuot emi nditọ Israel ẹkesidade ẹkpono Abasi, utọ nte, ekebe ediomi, inyan̄ emi ebietde akrasi (besịn emi ẹkesidade ẹyet ubọk ye ukot), utuenikan̄, incense, ye itieuwa.—Exodus 25:10, 17, 18; 40:24-32; Ediyarade 4:5, 6; 5:8; 8:3; 11:19.

   •   Idiọk unam—emi adade aban̄a ukara owo.—Daniel 7:1-8, 17-26; Ediyarade 13:2, 11; 17:3.

   •   Mme nọmba emi ẹdade ẹban̄a n̄kpọ.—Ediyarade 1:20; 8:13; 13:18; 21:16.

4.   Mme n̄kukụt emi ẹban̄a se iditịbede ke “usen Ọbọn̄,” emi ọkọtọn̄ọde ke 1914 ke ini Jesus ọkọtọn̄ọde ndikara nte Edidem Obio Ubọn̄ Abasi. (Ediyarade 1:10) Ntem, n̄wakn̄kan n̄kpọ emi n̄wed Ediyarade etịn̄de ẹsu ke eyo nnyịn.

5.   Se inamde mme n̄wed Bible eken an̄wan̄a nnyịn edinyụn̄ inam n̄wed Ediyarade an̄wan̄a nnyịn, utọ nte ọniọn̄ emi otode Abasi ye ndiyak mbon emi Ikọ Abasi an̄wan̄ade ẹn̄wam nnyịn.—Utom 8:26-39; James 1:5.