SE IDIN̄WAMDE UBON
Se Akpanamde Man An̄wam Eyen Fo Ebe N̄wed Ọfọn
Nso iditịbe edieke eyen fo mîsịnke idem ikpep n̄wed, mînamke utomufọk emi titia ọkọnọde enye, mîmaha ndisika n̄wed aba? Ọwọrọ enye idibehe n̄wed ọfọn, oyonyụn̄ ọtọn̄ọ ndinyene ndiọi edu. Nso ke akpanam man an̄wam eyen fo ebe n̄wed ọfọn?
Se anade ọdiọn̄ọ
Ndinam n̄kpọ ikọ ikọ edinanam mfịna oro etetịm okpon. Ndinam n̄kpọ ikọ ikọ ye eyen fo ayanam esịt okûna enye sụn̄ ke ufọk ye ke ufọkn̄wed! Mbak idifafịna enye ikaha, enye ekeme nditọn̄ọ ndisu nsu, ndidịp ibọrọ udomo ke ini enye mîbehe ọfọn, mîdịghe esitre ndidụk klas. Ndien mfịna esie oyokpon akan akpa.
Enọ ekeme ndibiat enye. Ete kiet emi ekerede Andrew ọdọhọ ete: “Man eyen nnyịn esịn idem ekpep n̄wed, ima isinọ enye enọ enye ama ebe udomo ọfọn. Edi oro ekesinam enye ekere aban̄a enọ oro kpọt. Ke ini enye mîkebehe udomo ọfọn, se ikabiakde enye ekedi enọ oro nnyịn mîkonọhọ enye, idịghe udomo emi enye mîkebehe.”
Ndiduọhọ titia ufọkn̄wed mmọ idin̄wamke. Eyen fo ekeme ndikere ke idịghe imọ ndisịn idem n̄kpep n̄wed edinam imọ ibe udomo ọfọn. Enye ekeme ndimen ndudue esie odori mbon en̄wen onyụn̄ oyom mbon en̄wen ẹsikọk mfịna esie. Oro ekeme ndinam enye ikpepke ata akpan n̄kpọ emi edin̄wamde enye ke ini iso—ndinyịme ndudue esie nnyụn̄ ntre ndisikere ke mbon en̄wen ẹdi mfịna.
Se akpanamde
Kûyayat esịt. Edieke esịt ayatde fi, bet tutu esịt osụhọde fi mbemiso enemede aban̄a ibọrọ udomo esie ye enye. Ete kiet emi ekerede Brett ọdọhọ ete: “Ami ye n̄wan mi imokụt ke ndineme n̄kpọ ye eyen nnyịn ke ini esịt mîyatke nnyịn ye ke usụn̄ oro owụtde ke imekere iban̄a enye esin̄wam enye anam ọfọn.”
Item Bible: “Ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.”—James 1:19.
Diọn̄ọ se idide mfịna. Ndusụk n̄kpọ emi esinamde eyenọwọn̄ okûbe udomo ọfọn edi mfiomo, ndikpụhọ ufọkn̄wed, ndifehe udomo, mfịna ufọk, unana idap, nditre ndinyene ini ukotn̄wed, m̀mê ke ini n̄kpọ mîyakke esịt esie esịne ke se enye ekpepde. Kûkere ke enye edi ifu.
Item Bible: “Owo eke enyenede ikike ke n̄kpọ oyokụt se ifọnde.”—Mme N̄ke 16:20.
Nam enenem eyen fo ndikpep n̄wed ke ufọk. Nam eyen fo enyene ini emi enye esikpepde n̄kpọ onyụn̄ anamde utomufọk oro titia ọkọnọde enye. Yom eti itie ke ufọk nọ eyen fo esitie anam utomufọk ẹkenọde enye; ọkpọfọn edi itie emi TV, fon, m̀mê n̄kpọ ntre mîdụhe. Bahade utomufọk oro nọ enye anam n̄kpri n̄kpri mbak idikakak enye. Ete kiet ke Germany, emi ekerede Hector, ọdọhọ, “Mbemiso ini udomo, imesitie ye eyen nnyịn kpukpru usen idụn̄ọde se mmọ ẹkekpepde nsịt nsịt utu ke ndibet tutu usen udomo.”
Item Bible: “Ẹmenịm ini ẹnọ kpukpru n̄kpọ.”—Ecclesiastes 3:1.
Nọ eyen fo n̄kpri n̄kpri item. Edieke anamde eyen fo okụt ufọn oro ufọkn̄wed anamde ọnọ enye idahaemi, edinenem enye ndisịn idem n̄kpep n̄wed. Ke uwụtn̄kpo, ndidiọn̄ọ ibat ekeme ndin̄wam enye ọdiọn̄ọ nte abiatde n̄kpri okụk-ekpad-ọfọn̄ esie.
Item Bible: “Nyene ọniọn̄, nyụn̄ nyene asian. . . . Da enye ke ata ọsọn̄urua n̄kpọ.”—Mme N̄ke 4:5, 8.
Item: N̄wam eyen fo anam utomufọk titia ọkọnọde enye, edi kûnanam unọ enye. Andrew ọdọhọ ete, “Eyen nnyịn ekesiyom nnyịn ida ibuot nnyịn ikere n̄kpọ inọ enye, utu ke enye ndida esie n̄kere.” Kpep eyen fo ndinam utomufọk ẹkenọde enye ke idem esie.