Joel 2;1-32
2 “Mbufo ẹfri nnụk ke Zion,+ ẹnyụn̄ ẹsio n̄kpo ekọn̄+ ke edisana obot mi.+ Yak kpukpru mme andidụn̄ isọn̄ ẹnyek;+ koro usen Jehovah ke edi,+ enye emekpere!
2 Enye edi usen ekịm ye n̄kụteyo,+ usen obubịt enyọn̄ ye ọkpọsọn̄ ekịm, ebiet un̄wana usiere emi ayamade ke mme enyọn̄ obot.+
“Enyene idụt emi mme owo ẹwakde etieti emi onyụn̄ okopde odudu;+ orụk eke ebietde enye akanam idụhe,+ tutu amama idụt ndomokiet eke ebietde enye idinyụn̄ idụhe ke ofụri emana.
3 Ikan̄ oto iso ata enye,+ edemeikan̄ onyụn̄ oto edem ọfọp enye.+ Isọn̄ oro odu enye ke iso nte in̄wan̄ Eden;+ edi wilderness emi anade ndon odu enye ke edem, ndien baba n̄kpọ kiet ikemeke ndibọhọ.
4 “Enye ebiet enan̄-mbakara, mmọ ẹnyụn̄ ẹfen̄e nte enan̄-mbakara ekọn̄.+
5 Uyom mmọ ebiet uyom mme chariot emi ẹfrọde ke mme enyọn̄ obot,+ onyụn̄ ebiet uyom edemeikan̄ emi atade nnyanyan̄a.+ Enye ebiet ọkpọsọn̄ idụt emi ẹtịmde idem ndika ekọn̄.+
6 Mme owo ẹyedu ke ọkpọsọn̄ ubiak ke ntak esie.+ Kpukpru iso ẹyenyụn̄ ẹkpai.+
7 “Mmọ ẹfehe itọk nte mbon oro ẹkopde odudu.+ Mmọ ẹdọk ibibene nte mbonekọn̄. Ndien mmọ kiet kiet ẹsan̄a ke usụn̄ mmọ, inyụn̄ ikpụhọkede afan̄ mmọ.+
8 Mmọ inyụn̄ inụkke kiet eken. Mmọ ẹsan̄a nte owo emi asan̄ade ke usụn̄ esie; ndien ọkpọkọm ndusụk mmọ ẹdọduọn̄ọ ke ufọt n̄kpọekọn̄, mbon eken iwahake ikpọn̄ usụn̄.
9 “Mmọ ẹbụmede ẹdụk obio. Ẹfen̄e ẹdọk ibibene. Ẹdọk ẹdụk mme ufọk. Mmọ ẹsan̄a mme window ẹdụk nte inọ.
10 Isọn̄ emetịmede ke iso esie, ikpaenyọn̄ onyụn̄ enyek. Utịn ye ọfiọn̄ ẹmekabade ẹkịm,+ mme ntantaọfiọn̄ inyụn̄ inọhọ aba un̄wana.+
11 Ndien Jehovah oyosioro uyo+ ke iso udịmekọn̄ esie,+ koro udịmekọn̄ esie ẹwakde etieti.+ Koro enye emi anamde uyo esie edide ọkpọsọn̄; koro usen Jehovah omokpon+ onyụn̄ enen̄ede enyene uten̄e, ndien anie ekeme ndida?”+
12 “Ndien ke emi n̄ko,” Jehovah ọdọhọ ete, “mbufo ẹfiak ẹtiene mi ke ofụri esịt mbufo,+ ẹtie utreudia+ ẹnyụn̄ ẹtuan̄a ẹnyụn̄ ẹseme.+
13 Mbufo ẹwai esịt+ mbufo, ẹkûwai ọfọn̄idem+ mbufo; ẹfiak ndien ẹtiene Jehovah Abasi mbufo, koro enye ọfọnde ido onyụn̄ atuade owo mbọm,+ isọpke iyatesịt+ onyụn̄ awak ima-mfọnido,+ enye oyonyụn̄ okpụhọ ekikere* edida nsobo ndi.+
14 Anie ọfiọk m̀mê enye ayafiak edem onyụn̄ okpụhọ ekikere*+ onyụn̄ ayak edidiọn̄,+ uwa n̄kpasịp, ye edin̄wọn̄ uwa osụhọ ọnọ Jehovah Abasi mbufo?
15 “Mbufo ẹfri nnụk ke Zion.+ Ẹben̄e idem ẹnọ ini utreudia.+ Ẹkot edisana esop.+
16 Ẹnam kpukpru owo ẹsop idem ọtọkiet. Ẹnịm esop asana.+ Ẹnam n̄kani iren ẹsop idem ọtọkiet. Ẹbon nditọwọn̄ ye mbon oro ẹwapde eba ọtọkiet.+ Yak ebendọ oto esịt ubet esie ọwọrọ edi, n̄wanndọ onyụn̄ oto ubet ndọ ọwọrọ edi.
17 “Yak mme oku, kpa mme asan̄autom Jehovah, ẹtua eyet ke ufọt etehe ye itieuwa,+ ẹnyụn̄ ẹdọhọ ẹte, ‘O Jehovah, tua ikọt fo mbọm, kûnyụn̄ uyak udeme fo edi n̄kpọ esuene,+ mbak mme idụt ẹdikara mmọ. Ntak emi ẹkpedọhọde ke otu mme idụt ẹte: “Enye Abasi mmọ?”’+
18 Koro Jehovah eyefịbe ufụp aban̄a idụt+ esie onyụn̄ atua ikọt esie mbọm.+
19 Ndien Jehovah ọyọbọrọ onyụn̄ ọdọhọ ikọt esie ete, ‘Sese, ami mmada wheat* ye obufa wine ye aran nnọ mbufo, ndien enye oyoyụhọ mbufo;+ ndien ami nditọn̄ọke aba ntak nnam mbufo ẹdi n̄kpọ esuene ke otu mme idụt.+
20 Ndien ami nyenịm owo edem edere+ anyan usụn̄ n̄kpọn̄ mbufo, nyonyụn̄ mbịn enye n̄ka edisat isọn̄ ye ndon, ndien iso esie eyese inyan̄ emi odude ke edem usiahautịn,+ edem esie oyonyụn̄ ese inyan̄ emi odude ke edem usoputịn.+ Ndien utebe esie ọyọdọk, un̄waha esie oyonyụn̄ ọdọk;+ koro Enye ayanam akamba n̄kpọ.’
21 “O isọn̄, kûfehe ndịk. Dara nyụn̄ kop idatesịt; koro Jehovah ayanam akamba n̄kpọ.+
22 Mbufo mme unam ikọt ẹkûfehe ndịk,+ koro mme in̄wan̄ mbiet ufene wilderness ẹyesehe.+ Koro eto oyon̄wụm mbun̄wụm esie.+ Eto fig ye vine ẹyenyụn̄ ẹnọ odudu mmọ.+
23 Mbufo nditọ Zion, ẹdara ẹnyụn̄ ẹdat esịt ke Jehovah Abasi mbufo;+ koro enye ọyọnọ mbufo edịm ini idọk ke udomo oro ekemde,+ enye oyonyụn̄ anam ọkpọsọn̄ edịm edep ọnọ mbufo, kpa edịm ini idọk ye edịm ini utọ, kpa nte akanamde ke akpa.+
24 Ndien wheat ọyọyọhọ ke ọtọ udịghi wheat, obufa wine ye aran ẹyenyụn̄ ẹyọhọ mme aban̄ fo ẹduọhọ.+
25 Ndien ami nyọnọ mbufo usiene ke mme isua oro n̄kukun̄kpọyọriyọ, n̄kukun̄kpọyọriyọ eke mînyeneke mba, ye mfem, ye itụt, kpa akwa udịmekọn̄ mi oro n̄kọdọn̄de nnọ mbufo, ẹketade n̄kpọ.+
26 Ndien mbufo ẹyedia n̄kpọ, ẹdia n̄kpọ ẹnyụn̄ ẹkop uyụhọ,+ mbufo ẹyenyụn̄ ẹtoro enyịn̄ Jehovah Abasi mbufo,+ emi anamde utịben̄kpọ ọnọ mbufo;+ ndien ikọt mi idikwe bụt ke nsinsi.+
27 Ndien mbufo ẹyefiọk ẹte ke ami mmọdo ke ufọt Israel,+ ye nte ke ami ndi Jehovah Abasi mbufo, efen inyụn̄ idụhe.+ Ndien ikọt mi idikwe bụt ke nsinsi.
28 “Ndien ama ekem, nyan̄wan̄a spirit+ mi nduọk kpukpru orụk obụkidem,+ ndien nditọiren mbufo ye nditọiban+ mbufo ẹyetịn̄ prọfesi.* N̄kani iren mbufo ẹyedaba ndap. N̄kparawa mbufo ẹyenyụn̄ ẹkụt n̄kukụt.
29 Nyonyụn̄ n̄n̄wan̄a spirit mi nduọk ifịn iren ye ifịn iban mbufo ke mme usen oro.+
30 “Ndien ami nyọnọ mme utịben̄kpọ ke ikpaenyọn̄+ ye ke isọn̄, iyịp ye ikan̄ ye mme adaha nsụn̄ikan̄.+
31 Utịn ayakabade ekịm,+ ọfiọn̄ oyonyụn̄ akabade iyịp,+ mbemiso akwa ye enyene-ndịk usen Jehovah edide.+
32 Ndien ama ekem, kpukpru owo eke ẹsemede ẹkot enyịn̄ Jehovah ẹyebọhọ;+ koro mmọ eke ẹbọhọde ẹyedu ke Obot Zion ye ke Jerusalem,+ kpa nte Jehovah ọkọdọhọde, ye ke otu mmọ eke ẹbọhọde, emi Jehovah okotde.”+
Mme Ikọ Idakisọn̄
^ At. Ed., “atua n̄kpọfiọk.”
^ At. Ed., “atua n̄kpọfiọk.”
^ Mîdịghe, emi ekeme ndidi “barley.”
^ Emi ekeme ndisịne ntịn̄nnịm ikọ, etop eke odudu spirit, ọkọrọ ye uduak Abasi oro ẹyararede m̀mê ẹtan̄ade.
