NSỤN̄IKAN̄ emi ẹkesimende owo kpọt ikesiwakke ndidu ke eyo Paul. Ke ini owo oyomde ndidụk nsụn̄ikan̄ n̄ka n̄kpọ, enye ekenyene ndibụp mme owo m̀mê ẹfiọk nsụn̄ikan̄ mbiomo emi akade n̄kan̄ emi enye oyomde ndika, m̀mê ẹyenyụn̄ ẹnyịme ndimen owo. (Utom 21:2, 3) Ekpededi owo okodụk nsụn̄ikan̄ oro mîkaha ata nnennen itie emi enye akade, ke ini nsụn̄ikan̄ oro atuakde ada ke nsio nsio esụkmbehe nte mmọ ẹsụk ẹkade, enye ekeme ndiwọrọ nyom nsụn̄ikan̄ en̄wen emi edimende enye ikpere ebiet emi enye akade.—Utom 27:1-6.

Idịghe kpukpru ini ke isua ke ẹkesika isan̄ ke mmọn̄, owo ikesinyụn̄ inyeneke akpan ini emi nsụn̄ikan̄ edidahade. Enyọn̄ ọkpọdiọk, mme awat nsụn̄ikan̄ ẹma ẹsimen̄e ndidaha. Mme awat nsụn̄ikan̄ emi ẹkesinịmde nsunsu n̄kpọ ẹma ẹsimen̄e ndidaha n̄ko edieke mmọ ẹkụtde n̄kpọ emi mmọ ẹdade nte idiọk idiọn̄ọ, utọ nte raven ndisọrọ ntua ke urụk emi ẹdade ẹbọp afara nsụn̄ikan̄, mîdịghe edieke mmọ ẹkụtde nsụn̄ikan̄ emi owụrede ke esụk. Mme awat nsụn̄ikan̄ ẹkesikpekpeme ini emi utọ ofụm emi edifọnde ye mmọ ọwọrọde, ntre ke ini utọ ofụm oro ọwọrọde, mmọ ẹma ẹsitọn̄ọ isan̄. Ke ini owo emi oyomde ndika isan̄ okụtde nsụn̄ikan̄ emi enyịmede ndimen enye, enye ama esimen mbiomo esie eketie ke esụk ebet ini ẹdidọhọde ke nsụn̄ikan̄ oro ọmọn̄ adaha ndien.

Lionel Casson emi esiwetde mbụkeset ọdọhọ ete: “Enyene se ẹkenamde ke Rome man emem mme owo utom ndikụt nsụn̄ikan̄ ndụk n̄ka n̄kpọ utu ke ndikasan̄a ke idemmọ nyom ke esụk. Esụkmbehe Rome okodu ke mben Akpa Tiber. Mme ọfis ẹma ẹdu ẹkanade akamba an̄wa kiet ke obio Ostia emi okodude ekpere esụk oro. Mbon emi ẹkesinọde mbiomo ẹka nsio nsio esụkmbehe ẹkenyene ediwak ke otu mme ọfis oro: mbon emi ẹsinọde ẹka Narbonne [emi odude ke France] ẹnyene kiet, mbon emi ẹsinọde ẹka Carthage [emi odude ke Tunisia] ẹnyene en̄wen, . . . ye ntre ntre. N̄kukụre se owo ekededi emi okoyomde nsụn̄ikan̄ se odụk aka n̄kpọ ekenyenede ndinam ekedi ndika mme ọfis emi ẹsede ẹban̄a mme obio emi ẹdude ke n̄kan̄ emi enye akade.”

Ndika isan̄ ke mmọn̄ ama esisọp, edi ama esinyụn̄ akama n̄kpọndịk. Ini Paul akanamde utom isụn̄utom, nsụn̄ikan̄ emi enye okodụkde ama esisịp ediwak ini.—2 Cor. 11:25.