Ih, ndiọi angel ẹdu. Mmọ ẹkesan̄a didie ẹdidu? N̄kọ emeti ke Abasi ama ọnọ kpukpru angel esie ifụre ndimek se mmọ ẹmade ndinam. Ke Abasi ama okobot Adam ye Eve, angel kiet ikadaha ifụre emi inam eti n̄kpọ. Enye okoyom mme owo ke isọn̄ ẹsọn̄ ibuot ye Abasi. Ntre, enye ama aka akanam Adam ye Eve ẹsọn̄ ibuot ye Abasi. (Genesis 3:​1-7; Ediyarade 12:9) Bible isiakke enyịn̄ angel emi inyụn̄ itịn̄ke m̀mê nso utọ utom ke enye ekesinam ke heaven. Edi ke enye ama ọkọsọn̄ ibuot ye Abasi ke Bible okokot enye Satan, oro edi “Andibiọn̄ọ,” ye Devil emi ọwọrọde “Ọdọk-Edidọk.” Enyịn̄ mbiba emi odot enye.​—Matthew 4:​8-11.

Edi nsọn̄ibuot oro Satan ọkọtọn̄ọde iketreke ye Adam ye Eve. Ke eyo Noah, ndusụk angel ẹma ‘ẹkpọn̄ ebietidụn̄ mmọ’ ke heaven ẹdi isọn̄. Mmọ ẹma ẹkabade owo ẹnyụn̄ ẹdi ẹdinam se Abasi mîkobotke mmọ inọ.​—Jude 6; Genesis 6:​1-4; 1 Peter 3:​19, 20.

Nso iketịbe inọ ndiọi angel oro? Ke ini Abasi akanamde Ukwọ osobo mme idiọkowo ke isọn̄, ndiọi angel oro ẹma ẹfiak ẹkabade spirit ẹdọk enyọn̄. Edi Abasi ikayakke mmọ ẹfiak ẹkedu ke akpa “ebietidụn̄ mmọ.” Utu ke oro, ẹdọn̄ mmọ ke Tartarus, oro edi, “makmak ekịm” emi mîyakke mmọ ẹdiọn̄ọ uduak Abasi. (Jude 6; 2 Peter 2:4) Mme demon emi ẹyak Satan akara mmọ, ntak edi oro Bible okotde Satan “andikara mme demon.” Bible ọdọhọ n̄ko ke Satan ‘esiforo angel un̄wana’ man abian̄a mme owo.​—Matthew 12:24; 2 Corinth 11:14.

Bible anam ifiọk ke Obio Ubọn̄ Abasi ọkọtọn̄ọ ndikara ke heaven ke 1914. * Ke oro ama ekebe, ẹma ẹsio Satan ye mme demon esie ke heaven ẹduọn̄ọ mi ke isọn̄. Ndiọi n̄kpọ ye oburobụt ido emi ẹyọhọde ererimbot emi ẹwụt nte Satan ye mme demon esie ẹdiọkde ẹketre.​—Ediyarade 12:​9-12.

Idiọkn̄kpọ ye afai edi eyo esiere awak akan nte ekedide, ndien emi owụt ke Abasi ọmọn̄ ososobo Satan ye mme demon esie efep. Ibịghike, ndiọi angel emi ididụhe aba. Ke ini iso, Jesus ayakara isọn̄ emi ke isua 1,000. Ke oro ebede, Abasi ọyọnọ Satan ye mme demon esie ata ekpri ini ndidomo mme owo. Ekem, ẹyesobo mmọ ẹfep ke nsinsi.​—Matthew 25:41; Ediyarade 20:​1-3, 7-10.