ATAKPOT ekeme ndifrọ ke isọn̄ ndiana ke ibibene nte inyeneke se itịbede. Edieke ibibene oro ọdọrọde, ukot ekeme ndiyan̄ enye, edi enye ididuọhọ. Ntak-a? Isịm esie esin̄wam enye.

Kere ise: Ke ini atakpot oyomde ndifrọ ke ebiet emi mîdọrọke, enye esinen̄ede omụm n̄kpọ, okot idem ọdọn̄, onyụn̄ ọwọn̄ọde isịm owụt isọn̄. Emi esinam enye ekeme ndifrọ nduọ nte enye oyomde. Edieke enye odorode ke ebiet emi ọdọrọde, enye isikemeke ndifrọ nduọ ata nnennen nte enye okoyomde. Edi ke ini enye osụk odude ke ufụmenyọn̄, enye esitop isịm ke enyọn̄, ndien emi esinam enye ekeme ndiduọ ke ata nnennen ebiet emi enye okoyomde. Nte atakpot esisan̄ade anam emi edi ata utịbe. Se ẹwetde ke n̄wed kiet ke Ufọkn̄wed Ntaifiọk California ke Berkeley ọdọhọ ete: “Ke ini atakpot osụk odude ke ufụmenyọn̄, enye esiwọn̄ọde isịm esie afiak ọwọn̄ọde man enye ekeme ndiduọ ke nnennen ebiet emi enye okoyomde.” Edieke ebiet oro enen̄erede ọdọrọ, enye eyenen̄ede emenede isịm esie n̄ko man ikpat esie ẹkpewụhọ ke ebiet emi enye oyomde ndiduọ.

Nte isịm atakpot etiede ekeme ndin̄wam ntaifiọk ẹbot masịn emi ẹkemede ndidọk ebiet emi etiede n̄kpotụk n̄kpotụk. Utọ masịn emi ọyọfọn ndida nyom mbon emi unyekisọn̄ m̀mê n̄kpọ ntre okụkde esịn ke isọn̄. Ata anam-ndụn̄ọde kiet, Thomas Libby, ọdọhọ ke “idụhe masịn ndomokiet emi ekemede ndidọk ebiet emi etiede n̄kpotụk n̄kpotụk nte unam. Ntre ekpedi ata akwa n̄kpọ ndinyene n̄kpọ emi ekemede ndin̄wam ntaifiọk ẹnam masịn ọdọk utọ ebiet oro.”

Afo ekere didie? Ndi ekere ke n̄kpọ okoforo isịm atakpot emi anamde se iyan̄ade owo ifiọk ntem? Ndi ukereke ke Abasi okobot enye?