Se Ikpepde Ito Jesus

Iban̄a nte Ikpetienede Christ

Jesus ama esiwak ndidọhọ mbon oro ẹbuọtde idem ye enye ete: “Tiene mi.” (Matthew 9:9; 19:21) Nso ke ọwọrọ owo ndidi anditiene Jesus, oro edi, ndidi Christian? Kere ban̄a nte ẹbọrọde n̄wọrọnda mbụme ita.

Afo akpanam n̄kpọ didie ye mbon en̄wen?

▪ Akpana mbet Jesus anam item oro ẹnọde ẹban̄a nte ẹkpenamde n̄kpọ ye mbon en̄wen. Ke uwụtn̄kpọ, Jesus ọkọdọhọ ete: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” Edi nso ke akpanam edieke owo eduede fi? Jesus ọkọdọhọ ete: ‘Wara ndinam emem ye owo eke okotde fi ikpe.’ Enye ama asian mme anditiene enye n̄ko ete: “Edieke mbufo mîfenke inọ mme owo ke mme idiọkn̄kpọ mmọ, Ete mbufo idinyụn̄ ifenke inọ mbufo ke mme idiọkn̄kpọ mbufo.”—Matthew 5:25; 6:15; 7:12.

Jesus ama ọnọ mme ọdọ ndọ item emi ete: “Mbufo ẹma ẹkop ẹte ẹkedọhọ ẹte, ‘Kûsịn efịbe.’ Edi ndọhọ mbufo nte owo ekededi eke owụkde enyịn ese n̄wan tutu udọn̄ idan̄ edemede enye, enye esesịn efịbe ama ke esịt esie ye enye.” Ata Christian esiyak ukpepn̄kpọ Jesus otụk enye esịt ye ekikere.—Matthew 5:27, 28.

Ata mme Christian ẹsinyịme n̄kpọ ẹtak mmọ man ẹn̄wam mbon en̄wen. Jesus ama esiyak n̄kpọ atak enye. Ke uwụtn̄kpọ, Jesus ye mme apostle ẹma ẹkpa mba isan̄ ukwọrọikọ oro mmọ ẹkekade, ikonyụn̄ ikam inyeneke ini ndidia n̄kpọ. Ntre, Jesus ama ada mmọ ke ubom aka ndobo ndobo ebiet man ẹkeduọk odudu. Edi mme owo ẹma ẹkop ebiet oro enye akakade, ẹnyụn̄ ẹwọn̄ọde ẹbem enye iso ẹkesịm. Bible ọdọhọ ete: “Ke enye ọwọrọde, enye okụt akwa otuowo, edi enye atua mmọ mbọm, koro mmọ ẹbietde erọn̄ eke mînyeneke andikpeme. Ndien enye ọtọn̄ọ ndikpep mmọ ediwak n̄kpọ.” (Mark 6:30-34) Afo emekeme ndikpebe Jesus ke ndinam se Abasi oyomde fi anam, okposụkedi emi ekemede ndisobo mme mfịna.

 Ntak emi afo ọkpọkwọrọde eti mbụk ọnọ mbon en̄wen?

▪ Jesus ama eteme mme anditiene enye ete ẹkwọrọ eti mbụk ẹnọ mbon en̄wen. Enye ọkọdọhọ mme apostle esie ete: “Nte mbufo ẹkade, ẹkwọrọ, ẹte, ‘Obio ubọn̄ heaven ke asan̄a ekpere.’” (Matthew 10:7) Etop oro mme anditiene Jesus anade ẹkwọrọ enen̄ede edi akpan n̄kpọ. Jesus ọkọbọn̄ akam ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet.”—John 17:3.

Jesus ama ebem iso etịn̄ aban̄a utom emi ata ediwak mme anditiene enye ẹdinamde. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt.” (Matthew 24:14) Edieke edide ama ekpep aban̄a Obio Ubọn̄ Abasi onyụn̄ enịm se Bible ekpepde aban̄a enye, edinenem fi nditịn̄ se afo ọfiọkde nnọ mbon en̄wen. Ediwak mme anditiene Jesus ẹsitọn̄ọ ke nditịn̄ mban̄a Obio Ubọn̄ Abasi nnọ iman mmọ.—John 1:40, 41.

Ntak emi afo akpanade baptism?

▪ Ke ini Jesus akanade baptism ke Akpa Jordan, enye ama ọbọn̄ akam ete: ‘Mmedi ndinam uduak fo, O Abasi.’ (Mme Hebrew 10:7) Edieke oyomde ndinam uduak Abasi, afo n̄ko ekpenyene ndina baptism. Jesus okowụk ete: “[Ẹnam] mme owo ke kpukpru idụt ẹdi mbet mi, ẹnịm mmọ baptism.”—Matthew 28:19.

Nso utom ye ufọn ke owo enyene ke ini enye anade baptism? Mme anditiene Jesus oro ẹnade baptism ẹnam n̄kpọ Abasi ke ofụri ukpọn̄. Jesus ama okot oto Ibet Abasi emi ọdọhọde ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo.” (Matthew 22:37) Enye ama ọdọhọ n̄ko ete: “Edieke owo ekededi oyomde nditiene mi, yak enye akan̄ idemesie.” (Matthew 16:24) Baptism ada aban̄a ubiere oro owo anamde ndikan̄ idemesie nnyụn̄ n̄kabade ndi inyene Abasi. Mbon oro ẹkabarede ẹdi ufan Abasi ntem ẹkeme ndiben̄e Abasi ọnọ mmimọ edisana ubieresịt.—1 Peter 3:21.

Edieke oyomde ndifiọk n̄kpọ en̄wen mban̄a emi, se ibuot 18 ke n̄wed emi, emi Mme Ntiense Jehovah ẹsiode.