Ke isua 33 E.N., Jesus ama akpa, ekem eset, onyụn̄ afiak ọnyọn̄ heaven. Ke ediwak isua ẹbede, ẹma ẹdori Jesus ke ebekpo ndikara nte Edidem. (Daniel 7:13, 14) Ke ini iso, Jesus ayada odudu esie nte Edidem esịn emem ke isọn̄ onyụn̄ anam ubuene etre.—Kot Psalm 72:7, 8, 13.

Jesus ayanam nti n̄kpọ ọnọ mme owo ke ini enye edikarade. Enye ayada odudu emi Ete esie ọnọde enye anam mme owo ẹfọn ẹma. Mmọ ẹyekop inem uwem ke isọn̄, owo idisọn̄ke, idinyụn̄ ikpaha aba.—Kot John 5:26-29; 1 Corinth 15:25, 26.

Idahaemi, Jesus ke an̄wam mme ata Christian ẹkwọrọ ikọ ke ofụri ererimbot. Mmọ ẹsikwọrọ ikọ ẹnọ mbon en̄wen man ẹn̄wam mmọ ẹfiọk se Bible etịn̄de aban̄a Obio Ubọn̄ Abasi. Jesus ọkọdọhọ ke imọ iyaka iso in̄wam mbet imọ tutu Obio Ubọn̄ Abasi akara isọn̄ emi onyụn̄ anam kpukpru ukara owo ke isọn̄ ẹtre.—Kot Matthew 24:14; 28:19, 20.

Jesus ke ada esop emi edide ata esop mme Christian an̄wam mme owo ẹdu eti uwem. Enye ayaka iso ekpeme mmọ tutu ẹsobo idiọk ererimbot emi, oyonyụn̄ an̄wam mmọ ẹdụk obufa ererimbot Abasi.—Kot 2 Peter 3:7, 13; Ediyarade 7:17.