Bible ọdọhọ ke Job “ikenyeneke nduduọhọ,” ke “enye ama enen.” (Job 1:1) Ẹkekot Lot “edinen owo.” (2 Peter 2:8) Ndien Bible ọdọhọ ke David ama anam “se inende” ke enyịn Abasi. (1 Ndidem 14:8) Edi ẹyak itịm ise nte iren ita emi ẹkedude uwem. Iyokụt (1) ke mmọ ẹma ẹnam ndudue, (2) ke imekeme ndikpep n̄kpọ nto nte mmọ ẹkedude uwem, ndien (3) ke nnyịn mme anana-mfọnmma owo imekeme ndinem Abasi esịt.

Job ama ọbọ ufen etieti ndien enye ekekere ke idụhe se imọ inamde idue emi akpanamde imọ ibọ utọ ufen oro. Enye ekekere ke Abasi idọn̄ke enyịn m̀mê imọ imanam eti n̄kpọ m̀mê inamke. (Job 9:20-22) Job ama ada idemesie ke edinen tutu edi se mbon en̄wen ẹdọhọde ke enye ekere ke imenen ikan Abasi.—Job 32:1, 2; 35:1, 2.

 Lot ikọsọpke inam se Abasi ọkọdọhọde enye anam. Oburobụt ido mbon Sodom ye Gomorrah ama enen̄ede afịna Lot tutu Bible ọdọhọ ke emi ama “otụhọde edinen ukpọn̄ esie.” (2 Peter 2:8) Abasi ama ọdọhọ enye ke imọn̄ isobo mme obio oro onyụn̄ ọnọ Lot ye ubon esie ifet ndifehe mbọhọ. Emekeme ndikere ke Lot ekpekedi akpa owo ndifehe n̄wọrọ do. Edi enye ama ada abiat ini tutu edi se mme angel oro Abasi ọkọdọn̄de ẹkenyan̄a enye ye ubon esie ẹmụmde-mụm mmọ ubọk ẹwọrọ ke obio oro.—Genesis 19:15, 16.

David ama esịn efịbe ye n̄wan owo ke ntak emi enye mîkomụmke idem ikama. Sia David mîkoyomke mbon en̄wen ẹfiọk se imọ ikanamde, enye ama anam ẹwot ebe mma oro. (2 Samuel, ibuot 11) Bible ọdọhọ ke se David akanamde ama “ọdiọk Jehovah ke enyịn.”—2 Samuel 11:27.

Job, Lot, ye David ẹma ẹnam ndudue. Ndusụk se mmọ ẹkenamde ama ọdiọk etieti. Edi mmọ ẹma ẹma Abasi ke ofụri esịt ẹnyụn̄ ẹyom ndikop uyo esie. Mmọ ẹma ẹnyịme nditua n̄kpọfiọk nnyụn̄ n̄kabade esịt. Oro akanam Abasi ama mmọ, ndien Bible ọdọhọ ke mmọ ẹkedi ndinen owo.

Kpukpru nnyịn imesinam ndudue sia nnyịn mîfọnke ima. (Rome 3:23) Ke ini emi etịbede, ana iwụt ke imatua n̄kpọfiọk inyụn̄ inam se ikemede man inen̄ede se ikanamde idue.

Didie ke Job, Lot, ye David ẹkedomo ndinen̄ede se mmọ ẹkanamde ẹdue? Job ama ama Abasi ke ofụri esịt. Ke Abasi ama ekenyene  nneme ye Job, Job ama okpụhọde nte enye ekerede n̄kpọ onyụn̄ ọdọhọ ke imatua n̄kpọfiọk iban̄a se imọ iketịn̄de. (Job 42:6) Lot ama asua oburobụt uwem mbon Sodom ye Gomorrah nte Abasi okonyụn̄ asuade. Mfịna esie ekedi nte enye mîkọsọpke inam se Abasi ọkọdọhọde. Edi nte ini akakade, enye ama ọwọrọ ọkpọn̄ obio oro onyụn̄ ọbọhọ nsobo. Lot ama okop uyo Abasi inyụn̄ isehe edem. Enye ama efre aban̄a mme n̄kpọ emi enye ọkọkpọn̄de ke obio oro. Okposụkedi emi David akabiatde ibet Abasi, enye ama akabade esịt onyụn̄ ọdọhọ Abasi atua imọ mbọm. Emi ama owụt se isịnede enye ke esịt.—Psalm 51.

Abasi ndima iren emi owụt ke enye ọdiọn̄ọ ke nnyịn idi mme anana-mfọnmma owo ndien ke imekeme ndinam ndudue. Abasi “[etịm] ọfiọk nte ẹbotde nnyịn, emeti ete ke nnyịn idi ntan.” (Psalm 103:14) Ntre, edieke edide Abasi ọfiọk ke idụhe nte nnyịn mîdinamke ndudue, nso ndien ke enye oyom oto nnyịn?

Item emi David ọkọnọde Solomon eyen esie anam ifiọk nte nnyịn ikemede ndinem Abasi esịt. Enye ọkọdọhọ ete: “Afo, Solomon eyen mi, fiọk Abasi usọ nyụn̄ nam n̄kpọ esie ke ofụri esịt.” (1 Chronicle 28:9) Didie ke owo ekeme ndinam n̄kpọ Abasi ke ofụri esịt? Ana enye ama Abasi onyụn̄ ebiere ndinam uduak esie. Emi iwọrọke ke ana enye ọfọn ama, edi ana enye enyịme ndinam n̄kpọ Abasi nte Abasi ọdọhọde onyụn̄ enyịme ndibọ item. Abasi akada Job nte ‘owo emi mînyeneke nduduọhọ,’ ada Lot nte “edinen owo,” onyụn̄ ada David nte owo emi ‘esinamde sụk se inende ke enyịn imọ.’ Ntak-a? Sia kpukpru mmọ ẹma ẹma Abasi ẹnyụn̄ ẹkop uyo esie. Okposụkedi emi mmọ ẹkesinamde ndudue, mmọ ẹma ẹnem Abasi esịt.

Ntre, edieke idiọk ekikere odụkde nnyịn ibuot, edieke itịn̄de se nnyịn mîkpetịn̄ke, m̀mê edieke inamde n̄kpọ ekem idifiọk ke n̄kpọ oro ifọnke, akpana se inemede emi ọdọn̄ nnyịn esịt. Abasi ọdiọn̄ọ ke nnyịn ikemeke ndifọn mma idahaemi. Edi enye oyom nnyịn ima imọ inyụn̄ idomo ndikop uyo imọ. Edieke imade Abasi ke ofụri esịt, ọwọrọ imekeme ndinem enye esịt.