Ekpri eyenọwọn̄ okụt nsụn̄ikan̄ ọwọrọde ke ufọkutom kiet ọdọk akabuaha ye ntọn̄enyọn̄, enye ekere ke ẹsinam ntọn̄enyọn̄ do. Ekpri eyenọwọn̄ ndidue n̄kere utọ n̄kpọ oro ekeme ndinam imam ọbọhọ owo. Edi owo ndinam ndudue ke akamba n̄kpọ ekeme ndida enye ibuot. Ke uwụtn̄kpọ, owo ndinam ndudue ke ini enye okotde se ẹwetde ke ekpeme ibọk ẹban̄a nte ẹkpemende ibọk oro ekeme ndida akamba mfịna ndi.

Owo ndida se enye okopde m̀mê okotde ke Bible ke usụn̄ en̄wen ekeme ndinam enye ọkpọn̄ Abasi. Ke uwụtn̄kpọ, se Jesus ekekpepde ikan̄wan̄ake ndusụk owo. (John 6:48-68) Utu ke ndisụhọde idem n̄ka iso n̄kpep n̄kpọ, mmọ ẹma ẹkpọn̄ Jesus. Emi ama anam ediwak n̄kpọ atak mmọ.

Ndi emesikot Bible man ọfiọk se akpanamde? Edieke edide ntre, amanam ọfọn. Edi edieke mûkpemeke, emekeme ndida se okotde ke usụn̄ en̄wen. Emi esitịbe ọnọ ediwak owo. Se n̄kpọ ita ke Bible emi mîsin̄wan̄ake ediwak owo mi.

• Bible ọdọhọ nnyịn ‘ibak Abasi,’ edi ikọ Bible emi isin̄wan̄ake ndusụk owo. Mmọ ẹkere ke emi ọwọrọ ke ana ẹfefehe Abasi. (Ecclesiastes 12:13) Edi Abasi iyomke mbon emi ẹtuakde ibuot ẹnọ imọ ẹfefehe imọ. Enye ọdọhọ ete: “Kûkop ndịk, koro ami ndude ye afo. Kûwụk enyịn use, koro ami ndide Abasi fo. Ami nyọsọn̄ọ fi idem. Ami nditreke ndin̄wam fi.” (Isaiah 41:10) Ndibak Abasi ọwọrọ nditen̄e nnyụn̄ nnen̄ede n̄kpono enye.

• Enyene ikọ Bible en̄wen emi mîsin̄wan̄ake ndusụk owo, oro edi: “Ẹmenịm ini ẹnọ kpukpru n̄kpọ, . . . ini eke ẹmanade ye ini eke ẹkpade.” Mmọ ẹkere ke Abasi ama ebebiere ini emi owo kiet kiet edikpade. (Ecclesiastes 3:1, 2) Edi itie N̄wed Abasi oro aban̄a nte uwem etiede—owo amana, okpon, ọsọn̄, ekem akpa. Ikọ Abasi ọdọhọ n̄ko ke se nnyịn ibierede ndinam ekeme ndinam idu uwem ibịghi m̀mê isọp ikpa. Ke uwụtn̄kpọ, Mme N̄ke 10:27 ọdọhọ ete: “Uten̄e Jehovah ayanam mme usen owo ẹwak.” (Psalm 90:10; Isaiah 55:3) Didie ke uten̄e Abasi anam usen uwem owo awak? Edieke inamde se Ikọ Abasi ọdọhọde, nnyịn idikpaha mmịn idinyụn̄ inamke oburobụt ido, emi ẹkemede ndinam owo akpa nsek.—1 Corinth 6:9, 10.

• Ke ini Bible ọdọhọde ke ẹmụm enyọn̄ ye isọn̄ “ẹnịm ẹnọ ikan̄,” ndusụk owo ẹda emi nte ke Abasi oyosobo isọn̄ nnyịn emi efep. (2 Peter 3:7) Edi Abasi ọdọhọ ke imọ idiyakke ẹsobo isọn̄ emi. Bible ọdọhọ ete ke Abasi “owụk isọn̄ ke itie esie; idisehekede tutu amama.” (Psalm 104:5; Isaiah 45:18) Idịghe ata ata isọn̄ emi ke ẹdisobo, edi ẹdisobo mme idiọkowo emi ẹdude ke ererimbot, ndien ẹdisobo mmọ fapfap nte n̄kpọ eke ikan̄ atade. Ndien “enyọn̄” oro ẹtịn̄de ẹban̄a ke 2 Peter 3:7 idịghe ikpaenyọn̄ emi mme ntantaọfiọn̄ ẹdude m̀mê ebiet emi Abasi odụn̄de. Owo idisoboke ndomokiet ke otu emi ifep.

Nte okụtde ke se inemede emi, ndusụk n̄kpọ emi Bible etịn̄de isin̄wan̄ake ediwak owo. Edi ntak emi Abasi akpayakde emi etịbe? Ndusụk owo ẹkeme ndikere ẹte: ‘Sia Abasi ọdiọn̄ọde kpukpru n̄kpọ, ntak emi enye mîkanamke ẹwet Bible ke usụn̄ emi edin̄wan̄ade kpukpru owo?’ Se ntak ita emi Bible mîsin̄wan̄ake ediwak owo mi.

1.   Ẹkewet Bible ke usụn̄ emi edin̄wan̄ade mbon oro ẹsụhọrede idem ẹnyụn̄ ẹnyịmede ndikpep n̄kpọ. Jesus ọkọbọn̄ akam ọnọ Ete esie ete: “Mmotoro fi an̄wan̄wa, Ete, Ọbọn̄ enyọn̄ ye isọn̄, koro afo etịmde edịp mbon ọniọn̄ ye mbon ikike mme n̄kpọ emi, onyụn̄ ayararede mmọ ọnọ nseknditọ.” (Luke 10:21) Ẹkewet Bible ke usụn̄ emi edin̄wan̄ade mbon oro ẹnyenede eti esịt kpọt. Enye isisọpke in̄wan̄a mbon emi ẹkohorede idem, utọ nte “mbon ọniọn̄ ye mbon ikike.” Edi mbon emi ẹtiede nte “nseknditọ” ẹsisụhọde idem ẹnyịme ndikpep n̄kpọ. Edieke utọ mbon emi ẹkotde Bible, Ikọ Abasi ọyọsọp an̄wan̄a mmọ. Ọfọn nte Abasi akanamde ẹwet Bible ntem.

2. Ẹkewet Bible ẹnọ mbon oro ẹyomde Abasi an̄wam mmọ. Jesus ọkọdọhọ ke mme owo ẹyeyom un̄wam man se imọ ikpepde enen̄ede an̄wan̄a mmọ. Ẹdisan̄a didie in̄wam mmọ? Jesus ama etịn̄ ete: “Andin̄wam, kpa edisana spirit, emi Ete edinọde edi ke enyịn̄ mi, enye oro eyekpep mbufo kpukpru n̄kpọ.” (John 14:26) Ntre, Abasi esinọ mme owo edisana spirit esie man se mmọ ẹkotde ke Bible an̄wan̄a mmọ. Edi Abasi isinọhọ mbon emi mîyomke un̄wam esie spirit esie, ntre Bible isin̄wan̄ake mmọ. Edisana spirit n̄ko esinam mme Christian oro Ikọ Abasi an̄wan̄ade ẹn̄wam mbon oro ẹyomde ndifiọk Bible.—Utom 8:26-35.

3. Ndusụk n̄kpọ emi Bible etịn̄de esin̄wan̄a mme owo ke ini ama ekem. Ke uwụtn̄kpọ, ẹkedọhọ prọfet Daniel ewet se ẹkewụtde enye enịm ọnọ ini iso. Angel ọkọdọhọ enye ete: “Daniel, dịp ikọ emi nyụn̄ fịk ufịkn̄kpọ ke n̄wed, tutu esịm utịt ini.” Ke ata ediwak isua, ediwak owo ẹma ẹkot n̄wed Daniel, edi ikenen̄ekede in̄wan̄a mmọ. Ndusụk n̄kpọ emi Daniel ke idemesie ekewetde ikan̄wan̄ake enye. Enye ọkọdọhọ ete: “Ami n̄kop, edi mfiọkke.” Nte ini akade, prọfesi emi ama edin̄wan̄a mme owo. Emi ekedi ke nnennen ini emi Abasi ekemekde. Angel oro ama ọdọhọ ete: “Daniel, ka okwo, koro ẹmedịp ikọ emi ẹnyụn̄ ẹfịk ufịkn̄kpọ ke esịt tutu esịm utịt ini.” Mmanie ke prọfesi emi edin̄wan̄a? “Baba idiọkowo kiet idifiọkke; edi mbon oro ẹnyenede ikike ẹyefiọk.” (Daniel 12:4, 8-10) Omokụt do ke Abasi isinamke ẹdiọn̄ọ se ndusụk n̄kpọ ke Bible ọwọrọde tutu ekem ini esie.

Ndi akanam Mme Ntiense Jehovah ẹnam ndudue ke se mmọ ẹkpepde sia mîkemke kan̄a ini Abasi mmọ nditịm mfiọk n̄kpọ oro? Ih. Edi ama ekem ini emi Abasi anamde n̄kpọ enen̄ede an̄wan̄a, mmọ ẹsikpụhọde se mmọ ẹnịmde ke akpanikọ. Mmọ ẹnịm ke mmimọ ikpebe mme apostle Jesus, emi ẹkesụhọrede idem ẹkpụhọde se mmọ ẹnịmde ke ini Jesus eketịn̄de nnennen n̄kpọ ọnọ mmọ.—Utom 1:6, 7.

Ekpri eyenọwọn̄ ndidue n̄kere ke ẹsinam ntọn̄enyọn̄ ke ufọkutom edi ekpri ndudue. Edi ndida se Bible ekpepde ke usụn̄ en̄wen idịghe ekpri ndudue. Bible edi ata akpan n̄wed, idịghe se owo onyụn̄ ọdọhọde itie ke idem imọ ikot ke ayan̄wan̄a imọ. Ntre, yom owo an̄wam fi. Yom mbon emi ẹsụhọrede idem ẹkpep Bible, ẹben̄ede Abasi edisana spirit esie man Bible an̄wan̄a mmọ, ẹnyụn̄ ẹnịmde ke nnyịn idu uwem ke ini emi Abasi oyomde Bible enen̄ede an̄wan̄a nnyịn. Mbọk kûyak n̄kpọ ndomokiet akpan fi ndisobo ye Mme Ntiense Jehovah m̀mê ndikot se ẹwetde ẹdọn̄ ke www.dan124.com/efi. Ẹnen̄ede ẹnam ndụn̄ọde mbemiso ẹwet n̄kpọ ẹsịn ke ikpehe Intanet oro. Bible ọdọhọ ete: “Edieke afo ofioride okot asian . . . , afo oyonyụn̄ okụt ifiọk Abasi.”—Mme N̄ke 2:3-5.