Angela emi odụn̄de ke Suriname ama aka ndikwọrọ ikọ ke ufọk nditọakpa emi odude ekpere ufọk esie. Mma enyene ufọk nditọakpa oro ekedi asuanetop emi mîwọrọke an̄wautom aba, ndien enye ama ọsọsọp enyịme Angela odụk ọkwọrọ ikọ ọnọ nditọ oro. Angela ama ọkwọrọ ikọ ọnọ kpukpru nditọwọn̄ 85 oro onyụn̄ owụt mmọ vidio emi ẹdude ke jw.org. Ekem enye ama ọtọn̄ọ ndikpep  n̄kpọ ye ediwak mmọ. Asiakusụn̄ iba ẹma ẹsitiene enye ẹkpep n̄kpọ ye nditọ emi. Mmọ owo ita ẹma ẹnyene otu nditọwọn̄ emi mmọ ẹkesikpepde n̄kpọ. Eyenete oro mîwọrọke an̄wautom aba do ọkọdọhọ ke ima isida n̄wedikwọ nnyịn kiet ikpep nditọ oro ikwọ inyụn̄ ikot mme mbụk Bible inọ mmọ okoneyo. Enye ama ọdọhọ ke imọn̄ ifiak itọn̄ọ ndidụk mbono esop, edi ke imọ idikemeke ndiwọrọ n̄kpọn̄ nditọwọn̄ 85 oro ke ufọk oro ikpọn̄. Ẹma ẹnam ndutịm nditan̄ kpukpru nditọ oro n̄ka Ufọkmbono Obio Ubọn̄. Sia ufọk nditọakpa oro mîyomke usụn̄ ikpọn̄ Ufọkmbono Obio Ubọn̄, nditọete ẹma ẹsika ẹkemen mmọ ẹdi mbono esop. Idahaemi, eyenete oro ye nditọakpa 85 oro ẹsidụk mbono esop kpukpru ini.

Ke ini Gabriel oro edide isua itiokiet ọkọnyọn̄de mbono ke Paraguay, enye ama ekere ke ana inen̄ede ikwọrọ ikọ iban̄a Obio Ubọn̄ Abasi inọ mme owo. Ekem enye ama eti owo emi enye ekpenen̄erede ama etiene imọ odu ke Paradise, oro edi, ete eka esie. Edi akananam ete eka esie ikpan̄ke utọn̄ inọ Mme Ntiense Jehovah, enye ama esikam ọbiọn̄ọ n̄wan ye nditọ esie emi ẹkedide Mme Ntiense.

Kpasụk usen oro, Gabriel ama ọdọhọ ete ye eka esie ẹnam imọ ida kọmputa itịn̄ ikọ ye ete eka imọ ke Argentina. Gabriel ama ọdọhọ ete eka esie ete ke enen̄ede ọfọn enye ekpep Bible, onyụn̄ obụp enye ete: “Eteka, ndi akpama n̄kpep Bible ye afo?” Ete eka esie ama enyịme. Gabriel ama ọdọhọ enye ke mmimọ idisikpep Kpan̄ Utọn̄ Nọ Abasi Nyụn̄ Du Uwem ke Nsinsi. Mmọ ẹma ẹkpep ediye ekpri n̄wed oro ke ọfiọn̄ ifan̄. Sia mmọ ndomokiet mîkenen̄ekede idiọn̄ọ ndikot n̄wed, mmọ ẹma ẹsida ini ẹkpep ke  idemmọ mbemiso ekem ini emi mmọ mbiba ẹtiede ntre ẹkpep. Gabriel ama esitịm idem onyụn̄ esịne siọt ye tai etie kpukpru ini oro mmọ ẹyomde ndikpep n̄kpọ.

Nte ini akakade, ete eka ye eka eka esie ẹma ẹdise mmọ ke urua ifan̄. Ete eka esie ama etiene mmọ odụk mbono esop ke ini enye okodude do ye mmọ. Ke ini ete eka Gabriel akafiakde ọnyọn̄ Argentina, eyenete kiet ama aka iso ndikpep Bible ye enye tutu enye akabade edi asuanetop oro mînaha baptism. Idahaemi ete eka ye eka eka Gabriel ẹsitie ntre ẹbọn̄ akam kpukpru usen. Ekpri Gabriel edidi asuanetop oro mînaha baptism. Ete eka esie ọdọhọ ke imọn̄ iyak idem inọ Jehovah inyụn̄ ina baptism.

Ke ini Jennifer emi odụn̄de ke Brazil ọkọnọde mme owo tract oro, Ndi Mme Akpan̄kpa Ẹkeme Ndifiak Ndu Uwem?, enye ama okụt eyenan̄wan kiet emi okoyomde  ndika itie n̄kpa ufan esie. Jennifer ama ọdọhọ enye ke imọ ikoyom ndinọ enye tract emi etịn̄de nte idifiakde ikụt mbon nnyịn oro ẹkpade. Ibuotikọ tract emi ama anam idem akpa eyenan̄wan emi, edi enye ama ọbọ tract oro. Jennifer ama obụp enye m̀mê enye akpama ndibọ tract ifan̄ en̄wen nsọk mme iman ufan esie oro akpade do. Enye ama ọbọ tract usụkkiet ọsọk mbonubon ufan esie oro.

Jennifer ama afiak ekese eyenan̄wan oro, ndien enye ama ọdọhọ Jennifer ete: “Mma ntie n̄kere nnyụn̄ ndikụt ke Abasi akada fi edi usen oro. Enye ọkọdọn̄ fi edidọn̄ mi esịt, sia esịt ama ọbụn̄ọ mi ini oro.” Enye ama ọnọ mme owo kpukpru tract usụkkiet oro. Iman ufan esie oro akakpade do, emi eketịn̄de ikọ ke itie n̄kpa oro, ama okot kpukpru se idude ke tract oro ọnọ kpukpru owo. Mmọ ẹma ẹnen̄ede ẹma se ẹkekopde ẹnyụn̄ ẹkọm enye ke utọ ikọ ndọn̄esịt oro. Eyenan̄wan oro ama enyịme ẹkpep imọ Bible.

Mbonubon Bethel ita ke Haiti ẹkedụk taxi emi ẹkotde tap-tap ẹka isan̄. Isan̄ mmọ akada hour iba ye ubak. Mmọ ẹma ẹda ini oro ẹkwọrọ ikọ ẹnọ mme owo ẹnyụn̄ ẹnịm magazine 50 ye tract 30. Owo Bethel kiet oro ekerede Gurvitch ama okot se idude ke Ẹdemede! uyo ọwọrọ ọnọ owo emi eketiede ekpere enye. Ufan kiet emi ekerede Pépé ama akpan̄ utọn̄ onyụn̄ etiene esịn uyo ke nneme oro. Enye ama ọdọhọ ẹdikpep imọ Bible, ndien ke mfọniso, enye okodụn̄ ke ebiet oro esop mme Gurvitch ẹsikade ẹkekwọrọ ikọ. Ọtọn̄ọde ke January 2014 emi ẹkenyenede nneme oro ye Pépé, enye odụk kpukpru mbono esop ye n̄kpri mbono. Enye esitịn̄ se enye ekpepde ọnọ mbon en̄wen onyụn̄ oyom ndidi asuanetop oro mînaha baptism ke mîbịghike.