Eti enọ kiet emi Jehovah ọnọde nnyịn edi ikwọ. Ikwọ ekeme ndinam ikere nti n̄kpọ onyụn̄ ekeme ndinam nti n̄kpọ ẹdọn̄ nnyịn ndinam. Ekpedi ikofofụhọ, ikwọ ekeme ndinam esịt enem nnyịn. Mbufa ikwọ nnyịn ẹsinam ẹkan se isụk ibatde oro, sia mmọ ẹsinam inen̄ede ikpere Abasi.

 Ọtọn̄ọde ke 2014, mbufa ikwọ nnyịn emi ẹsiode ẹbe 70, ndien idahaemi oyokụt ekpededi kiet ke otu oro ke se ibede usem 500! Edi emekeme ndikere, ‘Mmanie ẹsinam utom ke mme ikwọ emi, ndien nso utom isịne?’

 Nditọete emi ẹsede ẹban̄a ikwọ ke Itieutom Emi Ẹsede Ẹban̄a Vidio Nnyịn ẹsinam mme mbufa ikwọ nnyịn. Itieutom oro odu ke idak Kọmiti Unọ Ukpep Otu Emi Ẹsede Ẹban̄a Utom Nnyịn. Ndiwet ikwọ, nditịn̄ nte ẹdikwọde, ndisio n̄kukwak ndi, ndibre mme n̄kukwak oro, ndideme utom, ye ndise mban̄a kpukpru se ẹyomde tutu ẹsio ikwọ oro ẹdi utom nditọete irenowo ye iban 13 emi ẹsede ẹban̄a ikwọ ke itieutom oro. N̄kpọ en̄wen edi ke Kọmiti Unọ Ukpep ẹnyịme mme owo ke nsio nsio itie ke ofụri ererimbot ẹtiene ẹnam utom emi. Ndusụk mmọ ẹsin̄wam ẹwet mme ikọ ikwọ oro, ndusụk ẹbre mme n̄kukwak emi ẹdisan̄ade ye ikwọ oro, ndusụk ẹkwọkwọ. Nditọete oro ẹsisụhọde idem ẹda se mmọ ẹdiọn̄ọde ẹn̄wam esop Abasi, isioho idem etop, iyomke itoro.

 Nso ke ẹsinam man ẹsio obufa ikwọ? Akpa n̄kpọ edi Kọmiti Unọ Ukpep ndibiere itie N̄wed Abasi emi ẹdidade ikwọ oro ẹto ye se mmọ ẹyomde mme owo ẹkpep ẹto ikwọ oro. Nditọete emi ẹsede ẹban̄a ikwọ ẹyemek owo emi ediwetde ikọ ikwọ ye mbon emi ẹdibrede n̄kukwak idọn̄ ke ikwọ oro. Ẹye-rekọd ikwọ oro akpa ubọk; enye oro edidi ndomonse. Ekem Kọmiti Unọ Ukpep ẹyekpan̄ utọn̄ ẹkop, ẹnyụn̄ ẹtịn̄ n̄kpọ ifan̄ emi mmọ ẹyomde ẹkpụhọde. Nditọete oro ẹsede ẹban̄a ikwọ ẹyekpụhọde se ẹkedọhọde ẹkpụhọde, ẹnyụn̄ ẹ-rekọd akpatre ubọk. Ẹsi-rekọd mme ikwọ emi ke nsio nsio itie. Ndusụk ini ẹ-rekọd ke n̄kọk itieutom, ndusụk ini ke ufọk mme owo emi ẹnyenede n̄kpọ emi ẹsidade ẹ-rekọd ikwọ.

 Mme ndutịm kọmputa ẹsin̄wam nditọete nnyịn ke n̄kpọ ikwọ emi. Enyene enye emi esiyakde owo e-rekọd uyo esie esịn, enye emi ẹsidade ẹwet sọ-sọ-do-do ikwọ oro, enye emi esidọn̄de uyo nsio nsio owo ke ikwọ oro, ye ntre ntre eken. Mme n̄kpọ en̄wen emi ẹsiyomde ẹsidi masịn emi ẹsidade ẹbuak nsio nsio uyo ikwọ ye n̄kukwak ikwọ oro, enye emi esinamde inem nsio nsio n̄kukwak oro ẹnen̄ede ẹwọrọ ẹda, spika, mikrofon, ekọmọ, kita, ye mme n̄kpọ ntre. Ẹsida nti mikrofon ẹ-rekọd mme ikwọ oro. Enye emi ememde urua akan edi n̄kpọ nte ₦42,000, enye emi ọsọn̄de urua akan ebe ₦420,000. Ke 2020, okụk emi ikadade idep mme n̄kpọ emi ẹsidade ẹ-rekọd ikwọ ama ebe ₦49,000,000.

 Nso ye nso ke ẹsinam man owo idibiat okụk ikaha? Utu ke ndinyene ata ediwak nditọete emi ẹsede ẹban̄a ikwọ ke Bethel, imenyene ediwak nditọete emi ẹdude ke ufọk mmọ ẹn̄wam. N̄kpọ en̄wen edi ke utu ke nditan̄ ediwak owo mbon yak ẹbre n̄kukwak ikwọ emi ẹyomde yak ẹ-rekọd, enyene ndutịm kọmputa emi esin̄wamde nditọete ẹnam uyo nsio nsio n̄kpọ emi mme owo ẹbrede awak.

 Nditọete nnyịn ẹsima ndikpan̄ utọn̄ n̄kop mbufa ikwọ nnyịn. Tara emi odụn̄de ke Germany ọdọhọ ete: “Mme ikwọ emi ẹsinam esịt ana mi sụn̄ esịt ama etịmede mi. Mma n̄kpan̄ utọn̄ n̄kop mmọ ke usem emana mi, esitie nte Jehovah afat mi akama.” Brọda Dmitry emi odụn̄de ke Kazakhstan ọdọhọ ete: “Mme ikwọ ererimbot ẹkeme ndinam ndiọi n̄kpọ ẹdọn̄ owo, edi se mmade ke ikwọ enye emi edi ke mma n̄kpan̄ utọn̄ n̄kop nsifịnake idem m̀mê ayanam ndiọi n̄kpọ ẹdọn̄ mi. N̄kpọ en̄wen edi ke mme ikwọ emi ẹsin̄wam mi nnam se idinamde n̄ka iso ndi ufan Jehovah.”

 Delia emi odụn̄de ke South Africa etịn̄ nte enye esidade mbufa ikwọ nnyịn emi. Enye ọdọhọ ete: “Mme ikwọ emi ẹsinam ntetịm n̄kpere Jehovah. N̄kpọfụhọ mîdịghe nnyene mfịna emi ọkọn̄de mi ibuot, nyosụk n̄kụt ikwọ emi edin̄wamde mi. Ediwak ini, tune ikwọ oro kpọt esinam idem afiak efere mi!”

 Enyene ndusụk mbufa ikwọ emi ndusụk owo ẹmade ẹkan ndusụk. Lerato emi odụn̄de n̄ko ke South Africa ọdọhọ ete: “Ikwọ iba emi ‘Paradise Edisesịm’ ye ‘Obufa Ererimbot’ ẹsinam ntie n̄kere ini emi ndifiakde n̄kụt eka mi emi ama akakpa. Ini ekededi emi n̄kpan̄de utọn̄ n̄kop mme ikwọ emi, mmesikụt nte eka mi efehede edifat mi.”

 Obufa ikwọ nnyịn kiet ama enen̄ede an̄wam n̄kaiferi kiet ke Sri Lanka. Enye ọdọhọ ete: “Mma emi esikpepde nnyịn science ama ada ke iso ofụri klas ọtọk mi ke ntak ndide Ntiense Jehovah. Ndịk ama anam mi, n̄konyụn̄ mfiọkke se n̄kpetịn̄de. Ekedi nsịm ufọk, eka mi ọdọhọ n̄kebre ikwọ emi ẹkotde ‘Kpep Ikọ Abasi.’ Ikwọ oro ama anam n̄kụt ke ọfọn nsinam ndụn̄ọde ke mme n̄wed esop Abasi man ẹkpebụp mi n̄kpọ ami mfiọk se mbọrọde. Eyo ekesiere, mma n̄keneme nneme ye titia nnyịn oro. Enye ama akpan̄ utọn̄ onyụn̄ ọdọhọ mi ke idahaemi ndien ke se Mme Ntiense Jehovah ẹnịmde enen̄ede an̄wan̄a imọ. Mmenen̄ede n̄kọm esop Jehovah nte mmọ ẹnọde nnyịn utọ nti ikwọ emi ọsọn̄ọde nnyịn idem mi.”

 Ẹsida mmọn̄ okụk ẹsio mme ikwọ emi? Edi okụk emi ẹsitịpde man ẹda ẹnam utom Abasi ke ofụri ererimbot. Ediwak ini, ẹsika donate.dan124.com ẹkeda nsio nsio usụn̄ emi odude do ẹtip. Mbọk ẹmenam etieti nte ẹsitatde esịt ẹtịp okụk.