Ɔsom ahorow bi frɛ Michael dɛ “Ɔhotseweenyi Michael.” Ɔda edzi dɛ Michael yɛ dzin a wɔdze frɛ Jesus ber a nna ɔwɔ sor nye ber a ofii asaase do sanee kɔr sor no. a Michael nye Satan dzii esi kasakasae wɔ Moses no fun ho. Iyi da nkyɛn a, Micahel boaa ɔbɔfo bi ma ɔdze Nyankopɔn n’asɛm kɛmaa nkɔnhyɛnyi Daniel. (Daniel 10:13, 21; Jude 9) Michael ne dzin nye no honam sɛ, osiandɛ ɔtaa Nyankopɔn no tumdzi ekyir na ɔko tsia Nyankopɔn n’atamfo. Ne dzin n’asekyerɛ nye “Woana Na Ɔtse Dɛ Nyankopɔn?”​—Daniel 12:1; Nyikyerɛ 12:7.

 Ma yɛnhwɛ siantsir a yebotum aka dɛ Jesus nye ɔbɔfopanyin Michael no.

•   Michael nye “ɔbɔfopanyin” no. (Jude 9) Abɔdzin “ɔbɔfopanyin” kyerɛ “abɔfo nyina hɔn hen.” Dɛm dzin yi pue mpɛn ebien pɛr wɔ Bible no mu. Mbea ebien a opue wɔ Bible mu no, kasafua no yɛ baako kabea. Iyi kyerɛ dɛ ɔbɔfo kortsee pɛr na wɔdze dɛm dzin yi frɛ no. Kyerɛwnsɛm ebien a dzin no pue wɔ mu no, no mu kor ka dɛ Ewuradze Jesus a woenyan no “dze frɛ kɛse nye bɔfopanyin no ne ndze” befi sor esian. (1 Thessalonicafo 4:​16) Jesus wɔ “bɔfopanyin no ne ndze,” osiandɛ ɔno na ɔyɛ bɔfopanyin Michael no.

•   Michael da abɔfodɔm kɛse ano. Bible no ka dɛ “Michael nye n’abɔfoe nye dragon no,” kyerɛ Satan, dzii ako. (Nyikyerɛ 12:7) Michael wɔ tum kɛse wɔ sor, osiandɛ wɔfrɛ no “asafohemfo etsitsir no mu baako” nye “ɔsafohen.” (Daniel 10:13, 21; 12:1) Ahyɛmu Fofor no ho ɔbemfo bi a wɔfrɛ no David E. Aune kyerɛ mu dɛ, abɔdzin ahorow yi kyerɛ dɛ Michael na ɔyɛ “abɔfodɔm no nyina hɔn safohen.”

   Bible no ka nyimpa fofor kortsee bi ho asɛm dɛ ɔno na ɔda abɔfodɔm kɛse bi hɔn ano. Ɔka dɛ “Ewuradze Jesus Christ beyi noho efi sor, nye no tum abɔfo wɔ gyaframee mu na oetua hɔn a wonnyim Nyame” no do wer. (2 Thessalonicafo 1:​7, 8; Matthew 16:27) Jesus kɔr sor no ‘abɔfo nye tumdzifo, nye ahoɔdzenfo brɛɛ hɔnho adze maa no.’ (1 Peter 3:​21, 22) Dɛm ntsi, ɔnnkɛyɛ adze a ntseasee wɔ mu dɛ Nyankopɔn bɛyɛ Jesus na Michael asafohemfo wɔ abɔfo krɔnkrɔn no nyina do. Ɔnnyɛ adze a ɔdze asomdwee bɛba. Ntsi, ntseasee wɔ mu paa dɛ yɛbɛka dɛ edzin Jesus na Michael nyina gyina hɔ ma nyimpa kor.

•   Michael “bɔsoɛr egyina” wɔ “ahohiaber” a ibi mmbaa da no mu. (Daniel 12:1) Daniel nwoma no mu no, wɔtaa dze asɛmfua “bɔsoɛr egyina” dzi dwuma dze kyerɛ ɔhen a ɔsoɛr dzi dwuma tsitsir bi. (Daniel 11:​2-4, 21) Wɔfrɛ Jesus Christ dɛ “Nyankopɔn Asɛm,” na obedzi dwuma tsitsir bi dɛ “Ahemfo Hen.” Obokuku Nyankopɔn n’atamfo nyina na ɔaabɔ Nyankopɔn no nkorɔfo ho ban. (Nyikyerɛ 19:11-​16) Ɔbɛyɛ dɛm ber a ‘ahohiahia kɛse a ofitsi wiadze ahyɛse dze bodu aber no ibi mmbaa da no’ apaa egu no.​—Matthew 24:21, 42.