Nsu kɛse bi a ɔyɛ hu tɔree maa nsubansuba a ɔwowɔ Central Europe no yirii wɔ June 2013 mu. Wɔ Hungary no, Esutsen Danube yɛɛ mã tɛnn seen aber biara wɔ n’abakɔsɛm mu.

Osian mbrɛ nna asɛm yi gye ntsɛmpɛ ntsi, Hungary Asoɛe a Wɔhwɛ Nyimpa ho Nsɛmansɛma Do (Ministry of Human Resources) no bisaa Jehovah Adasefo edwumayɛbea nkorbata a ɔwɔ ɔman no mu no dɛ sɛ wobotum ayɛ hɔn mboa ma woeesiw ɔhaw a nsuyirii no dze aba no ano anaa. Iyi ntsi edwumayɛbea nkorbata no too nsa frɛɛ asafo ahorow a wɔbembɛn Esutsen Danube no ho no, ma wɔdze hɔnho hyɛɛ nhyehyɛɛ a mpanyimfo a wɔhwɛ apaamu hɔnom yɛe dze siiw nsuyirii no ano no mu.

Mbrɛ asafo ahorow no mufo no tuu hɔnho maa dwumadzi no yɛ nwanwa. Nda a odzi hɔ no, Adasefo bɔbor 900 a wofifi asafo ahorow bɛyɛ 72 mu no boae maa wɔhyɛɛ nsu nkɔnkɔnoa ho bambɔ no mu dzen. Wɔkãa kyerɛɛ hɔn dɛ wɔmbɔ baagye a wɔakyerɛw do “Jehovah Adasefo,” a hɔn dzin na kurow a wofi mu bae so wɔ do.

Wɔ kurow kor mu no, Hungary Red Cross edwumayɛfo no ananmugyinanyi bi kyerɛɛw dɛm nsɛm yi kɛmaa asafo no mu kor: “Ndaase nye enyidzi kɛse na yɛdze ma hom, osiandɛ koryɛ na ɔpɛ ho nhwɛdo a ɔtse dɛm yi ɔnntɔ kã​—kwan tsentsen a hom etwa ana hom rubodu ha mpo da nkyɛn! Mifi ahotodo mu bɔ hom nhwɛdo a ɔyɛ fɛw no ho dawur wɔ mo kurow mu!”

Eguamutsenanyi ma atoyerɛnkyɛm ho mboa edwumakuw bi, a ɔsan so yɛ Hungary Mbrahyɛ Baguanyi, dze krataa monaa edwumayɛbea nkorbata no dze daa Adasefo no ase wɔ mboa soronko a wɔdze mae no ho.