Watch Tower Bible and Tract Society of Pennsylvania no yɛ edwumakuw bi a wɔmmfa mmpɛ sika, na wɔhyehyɛɛ no wɔ afe 1884 wɔ Commonwealth of Pennsylvania, a ɔwɔ U.S.A no mbra ase. Jehovah Adasefo dze dzi dwuma dze boa hɔn wiadze nyina edwuma no, a ibi nye Bible nye Bible ho nwoma ahorow a wɔyɛ no.

Dɛ mbrɛ edwumakuw yi nhyehyɛɛ tse no, hɔn botae no fa “ɔsom, ntsetsee, nye mboa a wɔdze ma” ho, tsitsir no dze “kã Nyankopɔn n’Ahendzi a ɔhyɛ Christ Jesus ase no ho asɛmpa, na wɔdze ho nkyerɛkyerɛ ama.” Nnyɛ sika dodow a obi yi dze boa dɛm edwumakuw yi na ɔma ɔbɛyɛ edwumakuw yi munyi, na mbom gyedɛ wɔto nsa frɛ obi ma ɔbɛkã ho. Edwumakuw yi mufo nye hɔn a wɔda ano no boa Jehovah Adasefo Akwankyerɛ Kuw no.

Sɛ edze Watch Tower Bible and Tract Society of Pennsylvania no to nkyɛn a, Jehovah Adasefo wɔ mbra kwan do edwumakuw ahorow pii wɔ aman pii do a wɔboa. Dɛm edwumakuw ahorow yi mu bi dze asɛmfua “Watch Tower,” “Watchtower,” anaa wɔkyerɛ iyinom mu bi ase, dze kã hɔn dzin ho.

Ofitsi aber a wɔhyehyɛɛ dɛm edwumakuw ahorow yi no, wɔaboa hɛn ma yeedzi dwuma pii, na ibi na odzidzi do yi:

• Nsɛnkyerɛw nye nwoma tsintsim. Yeetsintsim Bible ahorow bɛyɛ ɔpepem 220 nye Bible ho nwoma ahorow bɛyɛ ɔpepepem 40 wɔ kasa ahorow bɔbor 700 mu. Wɔ jw.org Wɛbsaet hɔ no, nkorɔfo tum kenkan Bible no wɔ kasa ahorow bɔbor 120 mu a wonntua hwee, na wonya mbuae ma Bible mu nsɛmbisa bi tse dɛ, “Ebɛnadze nye Nyankopɔn n’Ahendzi no?”

• Ntsetsee. Yɛyɛ skuul ahorow dze ma Bible mu ntsetsee. Dɛ nhwɛdo no, ofitsi afe 1943 no, Jehovah Adasefo bɔbor 8,000 na woenya mfaso efi ntsetsee a ɔkɔ ekyir a Ɔweɔn-Aban Gilead Bible Skuul no dze ma no mu. Na iyi aboa hɔn ma wɔasom dɛ asɛmpatserɛwfo anaadɛ wɔaboa ma wɔahyɛ wiadze nyina asɛmpakã edwuma no mu dzen, na wɔama etsim. Na dapɛn biara no, nyimpa ɔpepem pii, a hɔn a wɔnnyɛ Adasefo so kã ho, nya ntsetsee wɔ nhyiamu ahorow a wɔyɛ no wɔ hɛn asafo biara mu no ase. Yɛsan so kyerɛ akenkan nye akyerɛw, na yɛayɛ nwoma ahorow a wɔdze kyerɛ nkorɔfo akenkan nye akyerɛw wɔ kasa ahorow 110 mu.

• Mboa a yɛdze ma. Yɛdze mboa kɛma nyimpa ahorow a wohyia ahohia no​—dɛ bi a ɔyɛ dza nyimpa dze ba, tse dɛ mbrɛ wokunkum nyimpa wɔ Rwanda wɔ afe 1994 mu no, anaadɛ ɔyɛ atoyerɛnkyɛm bi tse dɛ asaasewosow a osii wɔ Haiti wɔ afe 2010 mu no.

Ɔwɔ mu dɛ yɛnam hɛn edwumakuw nye mbra kwan do edwumakuw ahorow no do edzi dwuma pii dze, naaso ɔnnyɛ hɔn nye hɛn dwumadzi ahorow no yɛfo. Ɔyɛ Christiannyi biara n’asodzi dɛ ɔyɛ asɛmpakã nye ɔkyerɛkyerɛ edwuma a Nyankopɔn dze ahyɛ hɛn nsa no. (Matthew 24:14; 28:19, 20) Yɛgye dzi dɛ Nyankopɔn taa hɛn edwuma no ekyir, na ɔbɔkɔ do ara ayɛ nyia “ɔma ndɔbaa no.”​—1 Corinthfo 3:6, 7.