1. Ebɛnadze paa na ɔka mbrɛ yesi yɛ hɛn adze no?

 SƐ NDAANSA yi ara na wonumaa hɛn o, sɛ wonumaa hɛn akyɛr o, hɛn mu biara pɛ dɛ onya suban a ɔsɔ Jehovah n’enyi. Sɛ yebotum enya suban a ɔtse dɛm a, ɔsɛ dɛ yɛhwɛ hɛn nsusui yie. Ebɛnadze ntsi a? Osiandɛ hɛn nsusui ka mbrɛ yesi yɛ hɛn adze no paa. Sɛ yɛdwendwen honam ndwuma ho aber nyina a, ɔbɛma yɛayɛ ndzɛmba bɔn na yaakekã nsɛm a ɔnnyɛ. (Eph. 4:17-19) Naaso, sɛ yɛdwendwen ndzɛmba papa ho a, ɔbɛma yɛayɛ ndzɛmba pa na yaakã nsɛm a ɔbɔsɔ hɛn Egya Jehovah n’enyi.​—Gal. 5:16.

2. Ebɛn nsɛmbisa na yebosusu ho wɔ adzesua yi mu?

² Dɛ mbrɛ yehunii wɔ adzesua a odzi iyi enyim mu no, ɔnyɛ dɛn ara a nsusui bɔn bɛba hɛn adwen mu. Naaso yebotum esi hɛn bo dɛ yɛrennyɛ ndzɛmba bɔn a ɔba hɛn adwen mu no. Sɛ yɛpɛ dɛ yɛfata ma enuma a, ɔnnsɛ dɛ yɛyɛ ndzɛmba anaa yɛkã nsɛm a Jehovah kyir. Iyi nye anamɔn a odzi kan a ɔwɔ dɛ yetu ana yaafata ama enuma. Naaso, sɛ yebotum asɔ Jehovah n’enyi a, biribi fofor so wɔ hɔ a ɔwɔ dɛ yɛyɛ. Ɔno nye dɛ yebedzi n’ahyɛdze yi do. Ɔkã dɛ: ‘Hom nhyɛ suban fofor no.’ (Col. 3:10) Adzesua yi mu no, yebosusu nsɛmbisa a odzidzi do yi ho: Sɛ wɔkã ‘suban fofor’ no a, ɔkyerɛ dɛn? Yebesi dɛn ahyɛ suban fofor no, na yeennyi enngu hɔ?

3. Dɛ mbrɛ Galatiafo 5:22, 23 ma yehu no, sɛ wɔkã ‘suban fofor’ no a, ɔkyerɛ dɛn? Ebɛnadze na obi yɛ a, ɔkyerɛ dɛ ɔahyɛ suban fofor no?

³ Sɛ wɔkã ‘suban fofor’ no a, ɔkyerɛ nsusui nye ndzeyɛɛ a ɔnye Jehovah n’apɛdze hyia. Sɛ obi hyɛ suban fofor no a, ɔda  Nyankopɔn no sunsum no aba no edzi, ɔma kwan ma sunsum krɔnkrɔn no kyerɛ no nsusui, mbrɛ osi tse nka nye ne ndzeyɛɛ kwan. (Kenkan Galatiafo 5:22, 23.) Dɛ nhwɛdo no, nyimpa a ɔtse dɛm no dɔ Jehovah nye n’asomfo. (Matt. 22:36-39) Sɛ orihyia nsɛndzendzen mpo a, n’enyigye nnsɛɛ. (Jas. 1:2-4) Ɔpɛ asomdwee. (Matt. 5:9) Ɔwɔ afofor ho abotar na ɔnye hɔn dzi no wɔ ayamuyie mu. (Col. 3:13) Ɔdze ne ndzeyɛɛ kyerɛ dɛ n’enyi gye adze pa ho. (Luke 6:35) Ɔdze no ndwuma kyerɛ dɛ ɔwɔ gyedzi kɛse wɔ no sor Egya no mu. (Jas. 2:18) Sɛ wɔhyɛ no ebufuw a, ɔda abotar edzi, na ɔhyɛ noho do wɔ ndzɛmba a ɔbɛma ɔayɛ bɔn ho.​—1 Cor. 9:25, 27; Titus 3:2.

4. Sɛ yebotum ahyɛ suban fofor no a, ebɛnadze ntsi na no ho hia dɛ yɛda su ahorow a wɔakã ho asɛm wɔ Galatiafo 5:22, 23 no nyina edzi? Kyerɛkyerɛ mu.

⁴ Sɛ yebotum ahyɛ suban fofor no a, ɔsɛ dɛ yɛda su ahorow a wɔakã ho asɛm wɔ Galatiafo 5:22, 23 no edzi. Ɔnnyɛ ɔno nko, ɔsɛ dɛ yɛda su ahorow a wɔakã ho asɛm wɔ mbea afofor wɔ Bible mu no so edzi. * Dɛm su ahorow yi nntse dɛ ntar a yɛfa no nkorkor hyɛ no. Nokwasɛm nye dɛ, dɛm su ahorow yi nye su afofor wɔ ebusuabɔ. Dɛ nhwɛdo no, sɛ yɛdɔ hɛn nua paa a, yebenya noho abotar na yaada ayamuyie edzi akyerɛ no. Nkyii so, sɛ yebotum efi hɛn akoma mu ayɛ papa a, ɔsɛ dɛ yɛda ɔdwe edzi na yɛhyɛ hɛnho do.

5. Sɛ wɔkã dɛ ɔsɛ dɛ yenya “Christ adwen” a ɔkyerɛ dɛn, na ebɛnadze ntsi na ɔsɛ dɛ yesũa Jesus n’asetsena kwan ho adze? (1 Corinthfo 2:16)

⁵ Kenkan 1 Corinthfo 2:16. Sɛ yebotum ahyɛ suban fofor no a, ɔwɔ dɛ yenya “Christ adwen.” Dza asɛm yi kyerɛ nye dɛ, ɔwɔ dɛ yehu mbrɛ Jesus susu nsɛm ho na yesũasua no. Jesus da Nyankopɔn no sunsum no aba no edzi pɛpɛɛpɛr. Yebotum dze Jesus atoto ahwehwɛ ho, ɔda Jehovah no su no edzi pɛpɛɛpɛr. (Heb. 1:3) Sɛ yɛbɔ mbɔdzen dɛ yebosusu nsɛm ho dɛ Jesus a, ɔbɔboa hɛn ma yaayɛ hɛn adze dɛ Jesus. Afei so, dɛm a yɛbɛyɛ no bɔboa hɛn kɛse ma yaada no su no bi edzi.​—Phil. 2:5.

6. Sɛ yebotum ahyɛ suban fofor no a, ebɛn nokwasɛm na ɔwɔ dɛ yɛma ɔtsena hɛn adwen mu?

⁶ Aso ɔyɛ nokwar dɛ yebotum esũasua Jesus no nhwɛdo? Bi a yebenya adwen dɛ: ‘Nkyɛ Jesus dze odzi mũ. Ntsi, murunntum nnyɛ dɛ ɔno ara da!’ Sɛ dɛm na w’adwen yɛ wo a,  ɔnodze ma dɛm nokwasɛm yi ntsena w’adwen mu. Odzi kan no, wɔbɔɔ wo wɔ Jehovah nye Jesus hɔn su do. Ntsi, sɛ isi wo bo dɛ ibosũasua hɔn a, ibotum ayɛ, annyɛ yie koraa no ibotum esũasua hɔn kakra. (Gen. 1:26) Otsĩa ebien, Nyankopɔn no sunsum krɔnkrɔn yɛ tum a ɔkyɛn tum biara wɔ amansan yi mu. Sunsum krɔnkrɔn no bɔboa wo ma eetum ayɛ ndzɛmba a w’ahoɔdzen nnkotum ayɛ no. Otsĩa ebiasa, seseiara dze, Jehovah nnhwɛ kwan dɛ yɛbɛda sunsum no aba no edzi pɛpɛɛpɛr. Nokwasɛm nye dɛ, hɛn sor Egya a ɔwɔ ɔdɔ no eyi mfe 1,000 esi hɔ a ɔdze bɔboa hɔn a wɔwɔ enyidado dɛ wɔbɛtsena asaase do no ma wɔaayɛ nyimpa a wodzi mũ. (Nyi. 20:1-3) Seseiara dze, dza Jehovah hwehwɛ fi hɛn hɔ ara nye dɛ yɛbɛyɛ dza yebotum biara na yaaserɛ no dɛ ɔmboa hɛn.

7. Ebɛnadze na yerubosusu ho?

⁷ Ebɛnadze pɔtsee na yebotum ayɛ dze esũasua Jesus? Yebosusu Nyankopɔn no sunsum no aba n’afa ahorow anan ho kakra. Aber a yerususu ho no, yɛbɔhwɛ dza yebotum esũa efi mbrɛ Jesus sii daa dɛm su ahorow yi edzi no mu. Aber a yɛreyɛ dɛm no, yɛbɔhwɛ nsɛmbisa bi a ɔbɔboa hɛn ma yeehu nkɔenyim a yeenya wɔ mbɔdzen a yɛrobɔ dɛ yɛbɛhyɛ suban fofor no ho.

8. Ebɛn ndzɛmba na Jesus yɛe dze kyerɛɛ dɛ ɔwɔ ɔdɔ?

⁸ Osiandɛ Jesus dɔ Jehovah paa ntsi, ɔdze ndzɛmba bɔɔ afɔr dze yɛɛ n’Egya n’apɛdze na owui maa hɛn. (John 14:31; 15:13) Mbrɛ Jesus sii bɔɔ ne bra aber a nna ɔwɔ asaase do no daa no edzi dɛ nna ɔdɔ nyimpa paa. Nna Jesus da ɔdɔ na ayamuhyehye edzi da biara da. Ɔsoɛrtsia a ohyiae no mpo amma oeenngyaa dɛ ɔbɛda dɛm su yi edzi. Adze tsitsir kor a ɔyɛe dze kyerɛɛ dɛ ɔdɔ afofor nye dɛ nna ɔkyerɛkyerɛ hɔn Nyankopɔn n’Ahendzi no ho adze. (Luke 4:43, 44) Adze fofor so a Jesus yɛe dze kyerɛɛ dɛ ɔdɔ Nyankopɔn na nyimpa nye dɛ, ofii ne pɛ mu hun amandze wɔ ndzebɔnyɛfo nsaano, na ekyir yi wokum no yayaayaw. Dɛm a ɔyɛe no ebue ho kwan ama hɛn nyina dɛ yebenya onnyiewiei nkwa.

9. Yebesi dɛn ada ɔdɔ edzi akyerɛ afofor dɛ mbrɛ Jesus yɛe no?

⁹ Yɛdɔ hɛn sor Egya Jehovah. Ntsi yehyiraa hɛnho do maa no na wonumaa hɛn. Ntsi, ɔwɔ dɛ hɛn so yesũasua Jesus na yɛdɔ afofor dze kyerɛ dɛ yɛdɔ Jehovah. Ɔsomafo John kãa dɛ: “Sɛ obi kã dɛ, Modɔ Nyankopɔn, na ɔtan no nua a, ɔyɛ ɔtorfo, na nyia ɔnndɔ no nua a ohu no no bɛyɛ dɛn adɔ Nyankopɔn a onnhu no?” (1 John 4:20) Yebotum ebisa hɛnho dɛ: ‘Aso mowɔ ɔdɔ a no mu yɛ dzen ma afofor? Sɛ ɔba no dɛ obi yɛ adze ma ɔhyɛ me ebufuw anaa ɔyɛ me yaw mpo a, ana meda ayamuhyehye edzi kyerɛ no? Aso ɔdɔ a mowɔ no ka me ma medze me mber nye ndzɛmba a mowɔ no boa afofor ma wosũa Jehovah ho adze? Sɛ ɔba no dɛ nyimpa dodow no ara nntsie asɛm a mekã no anaa wɔsoɛr tsia me mpo a, ana mokɔ do ara kã asɛm no? Ana mubotum dze mber pii ayɛ esuafoyɛ edwuma no?’​—Eph. 5:15, 16.

10. Ebɛnadze na Jesus yɛe dze kyerɛɛ dɛ ɔpɛ asomdwee?

¹⁰ Nna Jesus pɛ asomdwee. Aber a afofor yɛɛ no bɔn no, ɔannyɛ bi enntua hɔn kaw. Naaso ɔyɛɛ biribi a nna ɔyɛ nwanwa. Ɔno mbom nye hɔn a wɔyɛɛ no bɔn no siesiee hɔn ntamu. Afei ɔhyɛɛ nkorɔfo nkuran dɛ, sɛ akasakasa ba wɔnye afofor ntamu a, wonsiesie asɛm no. Dɛ nhwɛdo no, ɔkyerɛkyerɛɛ dɛ sɛ obi pɛ dɛ Jehovah gye no som to mu a, ɔsɛ dɛ ɔnye no nuanom tsena asomdwee mu. (Matt. 5:9, 23, 24) Afei so, aber biara a nna akasakasa bɔsoɛr wɔ asomafo no ntamu wɔ hɔn mu obi a ɔyɛ kɛse ho no, nna Jesus boa hɔn ma wosiesie asɛm no.​—Luke 9:46-48; 22:24-27.

11. Ebɛnadze na yebotum ayɛ dze akyerɛ dɛ yɛpɛ asomdwee?

 ¹¹ Sɛ yebotum ayɛ hɔn a wɔpɛ asomdwee a, ɔnnsɛ dɛ yɛma akasakasa ba yɛnye afofor ntamu. Naaso ɔsɛ dɛ yɛyɛ dza ɔkyɛn dɛm mpo. Sɛ obi fom hɛn a, ɔsɛ dɛ hɛn mbom yedzi kan nye no kesiesie hɛn ntamu. Afei so ɔwɔ dɛ yɛhyɛ hɛn nuanom nkuran ma hɔn so wosiesie hɔn ntamu akasakasa. (Phil. 4:2, 3; Jas. 3:17, 18) Yebotum ebisa hɛnho nsɛm bi tse dɛ: ‘Ana mowɔ ɔpɛ dɛ mebɛyɛ dza ɔsɛ dɛ meyɛ biara mbrɛ ɔbɛyɛ a menye afofor bɛtsena asomdwee mu? Sɛ onua bi yɛ adze ma ɔyɛ me yaw a, ana medze noho ebufuw hyɛ me mu? Sɛ metse nka dɛ mfom no fi ɔno mpo a, ana motweɔn dɛ ɔbɛba me nkyɛn nye me ebesiesie, anaa emi mbom na mokɔ no hɔ nye no kesiesie? Sɛ no ho behia a, ana mehyɛ afofor nkuran ma wosiesie akasakasa bi a wɔasoɛr wɔ hɔn ntamu no?’

12. Ebɛnadze na Jesus yɛe dze daa ayamuyie edzi?

¹² Nna Jesus ne yamu ye. (Matt. 11:28-30) Jesus daa abotar nye ntseasee edzi dze kyerɛɛ dɛ ne yamu ye. Ɔyɛɛ dɛm ber mpo a nna ɔwɔ tsebea a no mu yɛ dzen mu. Dɛ nhwɛdo no, aber a Canaannyi ɔbaa bi serɛɛ no dɛ ɔnsa ne ba yarba no, ahyɛse no, Jesus annyɛ. Naaso aber a ɔbaa no daa gyedzi kɛse edzi no, Jesus fi ayamuyie mu saa ne ba no yarba. (Matt. 15:22-28) Nna Jesus ne yamu ye, naaso sɛ nna no ho behia dɛ otu afofor fo a, ɔnntwentweɔn n’ananadze koraa. Ɔtɔ da a, nna ayamuyie a ɔbɛda no edzi no hwehwɛ dɛ ɔdze afotu a no mu yɛ dzen ma hɔn a ɔdɔ hɔn no. Dɛ nhwɛdo no, aber a Peter yɛɛ dɛ orisiw Jesus kwan dɛ ɔbɛyɛ Jehovah n’apɛdze no, Jesus twuuw n’enyim aber a nna asomafo nkaa no wɔ hɔ. (Mark 8:32, 33) Jesus enntwuw Peter n’enyim dɛ ɔdze rugu n’enyim ase, mbom ɔyɛɛ dɛm mbrɛ ɔbɛyɛ a Peter benya esuadze bi. Afei so, nna ɔdze robɔ esuafo nkaa no kɔkɔ dɛ ɔnnsɛ dɛ wɔper hɔnho yɛ adze. Ɔda edzi dɛ Peter fɛɛr kakra dze, naaso ntsẽa a Jesus dze maa no no boaa no.

13. Yebesi dɛn ada ayamuyie edzi akyerɛ hɛn nuanom?

¹³ Ɔtɔ da a, ayamuyie a yɛbɛda no edzi akyerɛ hɔn a yɛdɔ hɔn no bɔhwehwɛ dɛ yɛdze afotu a no mu yɛ dzen bɛma hɔn. Sɛ no ho behia dɛ eyɛ dɛm a, ɔsɛ dɛ isũasua Jesus na edze w’afotu no gyina Bible do. Naaso, ɔsɛ dɛ inya abotar. Nya hɔnho adwen pa. Afei so, nya gyedzi dɛ hɔn a wɔdɔ Jehovah na wɔdɔ wo no dze w’afotu a ifi ɔdɔ mu dze ma no bɛyɛ edwuma. Bisa woho dɛm nsɛm yi: ‘Sɛ muhu dɛ obi a mepɛ n’asɛm paa reyɛ biribi a ɔnnyɛ a, ana minya akokodur kã ho asɛm kyerɛ no? Sɛ no ho behia dɛ mutu onua bi fo a, ana mifi ayamuyie mu nye no kasa anaa menye no kasa ebufuw do? Ebɛnadze na ɔka me ma medze afotu ma? Ana onua no ho ebufuw ntsi na mepɛ dɛ mutu no fo anaa mboa a mepɛ dɛ moboa no ntsi a?’

14. Ebɛnadze na Jesus yɛe dze yɛɛ nkorɔfo papa?

¹⁴ Sɛ wɔkã papayɛ a, Jesus tse ase na ɔda no edzi so. Jesus dɔ n’Egya paa, dɛm ntsi adze pa biara a ɔbɛyɛ no, aber nyinara ɔdze adwen pa na ɔdze yɛ. Obi a ɔyɛ afofor papa no, ɔhwehwɛ akwan ahorow a obotum afa do ayɛ adze pa ama hɔn dze aboa hɔn. Sɛ yɛtse ase dɛ ɔwɔ dɛ yɛyɛ papa a, oye, naaso ɔwɔ dɛ yɛyɛ pii ka ho. Ɔwɔ dɛ yɛdze adwen pa yɛ afofor papa. Bi a yebebisa hɛnho dɛ, ‘Aso ɔyɛ nokwar dɛ yebotum dze adwen a ɔnntsen ayɛ papa?’ Nyew! Dɛ nhwɛdo no, Jesus kãa hɔn a nna wɔyɛ ehiafo papa na wɔbɔ mbɔdzen dɛ wɔbɛma nkorɔfo ehu no ho asɛm. Ɔwɔ mu dɛ nna papayɛ a ɔtse dɛm no ye dze, naaso Jehovah n’enyi annsɔ.​—Matt. 6:1-4.

15. Yebesi dɛn efi hɛn akoma mu ayɛ papa?

¹⁵ Sɛ yɛannyɛ pɛsɛankonya na yefi hɛn akoma mu boa nkorɔfo a, ɔkyerɛ dɛ yɛreda papayɛ edzi. Dɛm ntsi ibotum ebisa woho dɛ:  ‘Sɛ muhu dɛ no ho hia dɛ meyɛ papa a, ana meyɛ? Ebɛnadze na ɔka me ma meyɛ papa?’

16. Ebɛnadze na ɔsɛ dɛ yɛyɛ no da biara, na ebɛnadze ntsi a?

¹⁶ Ɔnnsɛ dɛ yenya adwen dɛ sɛ wonuma hɛn a ɔkyerɛ dɛ yɛahyɛ suban fofor no ewie. Mbom yebotum akã dɛ suban fofor no tse dɛ atar fofor. Ɔsɛ dɛ yɛma ɔkɔ do yɛ fofor aber nyina. Kwan kor a yebotum afa do ayɛ iyi nye dɛ yɛbɛda Nyankopɔn no sunsum no aba no edzi da biara. Ebɛnadze ntsi a? Osiandɛ Jehovah nam no sunsum no do na ɔyɛ ndzɛmba. (Gen. 1:2) Ntsi, sunsum no aba no n’afã biara botum aboa hɛn ma yaayɛ biribi, na ɔsɛ dɛ yɛma kwan ma ɔka hɛn ndzeyɛɛ. Dɛ nhwɛdo no, osuanyi James kãa dɛ: ‘Gyedzi nnyi ndwuma a, nna oewu.’ (Jas. 2:26) Dɛmara na Nyankopɔn no sunsum no aba no n’afã ahorow a aka no so tse. Aber biara a yɛbɛda no edzi no, ɔkyerɛ dɛ yɛama kwan ma Nyankopɔn no sunsum no reyɛ edwuma wɔ hɛn mu.

17. Sɛ ɔtɔfabi na yeenntum annda sunsum no aba no edzi a, ɔsɛ dɛ yɛyɛ hɛn adze dɛn?

¹⁷ Ɔtɔfabi a, Christianfo a wonumaa hɔn akyɛr mpo no, ɔyɛ dzen ma hɔn dɛ wɔbɛda sunsum no aba no edzi. Naaso dza ohia paa nye dɛ yɛbɔbɔ mbɔdzen dɛ yɛbɛda no edzi na ɔnnsɛ dɛ yɛpa abaw. Hom mma yensusu asɛm yi ho nhwɛ. Fa no dɛ w’atar bi a w’enyi gye ho paa atsew. Aso ebɔtow egu ntsɛmara? Oho. Sɛ epam na ɔbɛyɛ yie a, ebɛpam. Ɔno ekyir no, ebɛyɛ ahwɛyie amma wɔaanntsew bio. Dɛmara so na sɛ ɔtɔfabi na sɛ enntum annda ayamuyie, ɔdɔ anaa abotar edzi annkyerɛ obi a, ɔnnsɛ dɛ ema w’abaw mu bu. Naaso sɛ ɔba no dɛm a, ɔsɛ dɛ ifi w’akoma mu serɛ nyimpa no dɛ ɔmfa nkyɛ wo mbrɛ ɔbɛyɛ a ibotum akɔ do nye no atsena asomdwee mu. Afei, si wo bo dɛ ebɛda suban pa edzi ber fofor.

18. Ebɛn awerɛhyɛmu na yebotum enya?

¹⁸ Ɔyɛ hɛn enyigye paa dɛ Jesus ayɛ nhwɛdo pa a yebotum esũasua! Sɛ yɛyer hɛnho sũasua kwan a Jesus susu ndzɛmba ho na yesũasua ne ndzeyɛɛ a, ɔnnkɛyɛ dzen ama hɛn koraa dɛ yɛbɛyɛ hɛn adze dɛ ɔno. Sɛ yɛyɛ hɛn adze dɛ Jesus a, ɔnnkɛyɛ dzen dɛ yɛbɛhyɛ suban fofor no. Adzesua yi mu no, yeesusu Nyankopɔn no sunsum no aba no n’afã ahorow anan ho. Sɛ ɔbɛyɛ yie a, gye mber susu sunsum no aba no n’afã ahorow a wɔaka no ho, na hwɛ dɛ erobɔ mbɔdzen dɛ ebɛda no edzi anaa. Ibenya iyi ho nsɛm pii wɔ Nhoma a Yehowa Adansefo De Yɛ Nhwehwɛmu no mu. Kɔ “Christianfo Asetsena” na hwehwɛ “Sunsum Aba No.” Nya awerɛhyɛmu dɛ, sɛ ebɔ mbɔdzen dɛ ebɛyɛ w’afamu dze a, Jehovah so bɔboa wo ma aahyɛ suban fofor no, na aakɔ do ahyɛ.