AFE A WƆWOO NO: 1941

ƆMAN A OFI MU: BENIN

NKAN NO: NNA ƆWƆ YERNOM BAANAN, NA NNA ƆSOƐR TSIA JEHOVAH ADASEFO SO

ME NKAN ABRABƆ:

Mifi kurow kɛse bi a ɔwɔ Benin a wɔfrɛ no Cotonou mu. Wɔdze Catholic som na wɔdze tsetsee me naaso nna menntaa nnkɔ asɔr. Wɔ beebi a nna metse no, osiandɛ nna wɔagye awardodow ato mu wɔ mbra mu ntsi, nna Romanfo piinara wɔ yernom beberee. Dɛm ntsi, ɔmaa mara so mowaar mbaa baanan.

Wɔ 1970 mfe no mu no, hɛn amamfo no mu binom dze sii hɔn enyi do dɛ wobotu aban a nna ɔwɔ do no efi do. Nna modwen dɛ dza wɔreyɛ no bɔboa hɛn man no. Dɛm ntsi, mekɛtaa hɔn ekyir na iyi maa medze moho kɛhyɛɛ amanyɛsɛm mu. Nna dɛm nkorɔfo yi mmpɛ Jehovah Adasefo hɔn asɛm osiandɛ nna Adasefo no nngyina ɔfã biara wɔ amanyɛsɛm mu. Nna meka hɔn a wɔsoɛr tsia Adasefo no ho. Aber a wɔpaam Adasefo asɛmpatserɛwfo no fii ɔman no mu wɔ afe 1976 mu no, nna megye dzi paa dɛ wɔrennsan mmba ha bio.

MBRƐ BIBLE NO SESAA M’ABRABƆ:

Wɔ afe 1990 mu no, ɔman no mu dwee. Afei, annkyɛr na Adasefo asɛmpatserɛwfo no sanee baa ɔman no mu bio, iyi yɛɛ me nwanwa paa. Mehyɛɛ ase nyaa adwen bi dɛ gyama Nyankopɔn ka dɛm nkorɔfo yi ho. Dɛm aber no, minyaa edwuma wɔ beebi fofor. Nna m’edwumamufo no mu kor yɛ Ɔdasefo, na annkyɛr koraa na ɔhyɛɛ ase dɛ ɔrekã ne gyedzi ho asɛm akyerɛ me. Ɔmaa muhun kyerɛwnsɛm ahorow a ɔkã Jehovah ho asɛm dɛ ɔyɛ ɔdɔ nye atsɛntsenenee Nyankopɔn. (Deuteronomy 32:4; 1 John 4:8) M’enyi bɛgyee dɛm su ahorow no ho paa. Nna mepɛ dɛ musũa pii fa Jehovah ho, dɛm ntsi megyee too mu dɛ ɔnye me mbosũa Bible.

Annkyɛr na mehyɛɛ ase dɛ morokɔ Jehovah Adasefo nhyiamu ahorow no bi. M’enyi gyee ɔdɔ mapa a nna wɔda no edzi kyerɛ hɔnho no ho. Ɔmmfa ho ɔman a obi fi mu anaa dzibew a ɔwɔ wɔ asetsena mu no, nna wɔnnyɛ nyimpa mu nyiyimu. Medze moho bɔɔ Adasefo no, na mubohun no kofee dɛ wɔyɛ Jesus n’ekyirdzifo anokwafo ampa.​—John 13:35.

Mubohun dɛ sɛ mubotum asom Jehovah a, ɔwɔ dɛ migyaa Catholic Asɔr no. Nna iyi ne yɛ nnda famu koraa, osiandɛ nna musuro dza nkorɔfo bɛkã afa moho. Dze nam Jehovah no mboa do no, mber bi ekyir no mutumii nyaa akokodur twee moho fii asɔr no ho.

Nna nsakyer kɛse bi a no ho hia so wɔ hɔ a ɔwɔ dɛ meyɛ. Mubosũae fii Bible no mu dɛ Nyankopɔn nngye awardodow nnto mu. (Genesis 2:​18-​24; Matthew 19:​4-6) Wɔ n’enyi do no, nna m’awar a odzi kan no nkotsee na ɔgye to mu. Dɛm ntsi medze m’awar no kɛhyɛɛ mbra ase, na migyaa me yernom nkaa a wɔaka no nyina. Afei, mohwɛe hun dɛ hɔn nsa bɛka sika nye ndzɛmba a wobehia dze ahwɛ hɔnho. Ber bi ekyir no, me yernom a migyaa hɔn no mu beenu bɛyɛɛ Jehovah Adasefo.

MBRƐ MENYA DO MFASO:

Ɔwɔ mu dɛ me yer a menye no tse seseiara no da ho ara kɔ Roman dze, naaso ɔkyerɛ obu ma gyinae a mesi dɛ mobɔsom Jehovah no. Hɛn beenu nyina gye to mu dɛ mabɛyɛ okun pa.

Ahyɛse no, nna modwen dɛ sɛ medze moho hyɛ amanyɛsɛm mu a, mubotum aboa hɔn a wɔtse m’apaamu no. Naaso, mbɔdzen a mobɔe no nyinara ennkesi hwee. Seseiara mebohu dɛ Nyankopɔn n’Ahendzi no nkotoo nye adasamba haw ano edur. (Matthew 6:9, 10) Meda Jehovah ase paa dɛ ɔaboa me ma menya enyigye wɔ m’asetsena mu.

AFE A WƆWOO NO: 1977

ƆMAN A OFI MU: BRAZIL

NKAN NO: PENTECOST SƆFO

ME NKAN ABRABƆ:

Minyinii wɔ kurow bi a wɔfrɛ no Itu no kurotsia mu; ɔwɔ São Paulo Mantɔw no mu. Nna kurow yi agye dzin osian nsɛmbɔndzi a ɔkɔ do wɔ hɔ no.

Nna meyɛ basabasa na nna m’abrabɔ so asɛɛ. Bio so, nna motɔn ndubɔn. Ber bi ekyir no, mubohun dɛ sɛ dɛm abrabɔ yi amma mannkɔ efiadze a, ɔdze me bɔkɔ owu mu; ntsi migyae. Afei, mehyɛɛ ase dɛ morokɔ Pentecost na ekyir yi mebɛyɛɛ sɔfo wɔ asɔr no mu.

Nna metse nka dɛ mubotum dze dza meyɛ wɔ asɔr no mu no aboa afofor. Mehyɛɛ ase mpo dɛ mereyɛ asɔr wɔ kasafir bi a ɔwɔ hɛn apaamu hɔ no do, na iyi maa mebɛgyee dzin wɔ apaamu hɔ. Naaso, nkakrankakra no mubohun dɛ saana asɔr no nndwen n’asɔrmba no ho koraa​—nna dza wɔbɛyɛ dze ahyɛ Nyankopɔn enyimnyam no mmfa hɔnho ketseketse bi mpo. Nna metse nka dɛ asɔr no ne tsirmpɔw ara nye dɛ wobenya sika. Dɛm ntsi migyaa asɔr no, na memaa wotwaa me dzin mu wɔ asɔr no mu.

MBRƐ BIBLE NO SESAA M’ABRABƆ:

Aber a mehyɛɛ ase dɛ menye Jehovah Adasefo rusũa Bible no, ntsɛmara na muhun dɛ wɔyɛ soronko fi nsɔr nkaa a wɔaka no ho. Mubohun ndzɛmba ebien bi a ɔma wɔyɛ soronko. Odzi kan, nna Jehovah Adasefo no mmfa hɔn ano nnkã no kɛkɛ dɛ wɔdɔ Nyankopɔn nye hɔn nyɛnko nyimpa; mbom nna wɔdze hɔn ndzeyɛɛ kyerɛ. Otsĩa ebien, wɔmmfa hɔnho nnhyɛ amanyɛsɛm anaa akodzi mu. (Isaiah 2:4) Dɛm ndzɛmba ebien yi na ɔmaa mebɛgyee dzii dɛ mehu nokwar som no​—kwan heaheaba a wɔdze kɔ onnyiewiei nkwa mu no.​—Matthew 7:​13, 14.

Mubohun dɛ, sɛ mepɛ dɛ meyɛ dza ɔsɔ Nyankopɔn enyi a, ɔwɔ dɛ meyɛ nsesa akɛse wɔ m’asetsena mu. Nna ɔwɔ dɛ minya ber ma m’ebusua na moboa hɔn. Afei so, nna ɔwɔ dɛ mebrɛ moho adze. Nna dɛm nsesa ahorow a ɔwɔ dɛ meyɛ yi nnda famu, naaso Jehovah boaa me ma mutumii yɛe. Me yer n’enyi bɛgyee nsesa a meyɛe no ho. Odzii kan hyɛɛ ase dɛ orusũa Bible no ana merehyɛ ase, naaso afei dze onyaa nkɔenyim ntsɛntsɛm wɔ dza nna orusũa no mu. Annkyɛr na yɛbɛgyee too mu dɛ yɛpɛ dɛ yɛbɛyɛ Jehovah Adasefo. Wonumaa hɛn beenu no nyina da kor.

MBRƐ MENYA DO MFASO:

Menye me yer enya ho kwan roboa hɛn mba baasa no ma wɔnye Jehovah eenya ebusuabɔ pa, na iyi ma hɛn enyi gye paa. Hɛn ebusua no wɔ enyigye. Meda Jehovah ase dɛ ɔtwee me baa nokwar a ɔwɔ n’Asɛm Bible mu no ho. Bible mu nokwar no tum sesa nkorɔfo hɔn abrabɔ! Mankasa m’abrabɔ dzi iyi ho dase.

AFE A WƆWOO NO: 1957

ƆMAN A OFI MU: AUSTRALIA

NKAN NO: ƆFAA ATSEETSEE MU WƆ NO MBOFRABER MU

ME NKAN ABRABƆ:

Minyinii wɔ kurow bi a wɔfrɛ no Newcastle a ɔwɔ New South Wales mu. Nna me papa yɛ kɔwensanyi na ɔyɛ basabasa so, na nna me maame so yɛ basabasa dɛmara. Emi na meyɛ panyin wɔ hɔn mba beesuon a wɔwoo hɔn no mu. Nna me maame bor me na ɔhyehyɛ me ahorba so. Nna ɔtaa kã kyerɛ me dɛ, meyɛ nyimpa bɔn ntsi mobɔkɔ abɔnsamgyamu. Nna dɛm nsɛm a ɔkã kyerɛ me no ma mobɔ hũ.

Osiandɛ nna me maame bor me ma mipirapira ntsi, nna metaa toto skuul mu. Midzii mfe 11 no, aban no yii me fii m’awofo nkyɛn nye me kɔr beebi a aban no hwɛ mbofra a wɔtseetsee hɔn no. Ekyir yi, woyii me kɔr beebi a Roman sisters tse dɛ menkɛtsena hɔ. Aber a midzii mfe 14 no, muguanee fii hɔ. Nna memmpɛ dɛ mesan m’ekyir kɔ fie bio, ntsi mokɔr kurow bi a ɔwɔ Sydney a wɔfrɛ no Kings Cross mu. Nna minnyi beebi a mebɛtsena wɔ hɔ, ntsi nna meda abɔntsen.

Aber a nna mowɔ Kings Cross no, mehyɛɛ ase dɛ moronom ndubɔn, na nna mowe nsã, mohwɛ ponografi, na mobɔ tuutuu bra so. Da kor bi, asɛm bi a osii no maa mobɔɔ hũ. Nna metse nightclub bi no wura ne fie. Da kor ewimbir bi mbarimba beenu bi bɔhwehwɛɛ no. Ɔkãa dɛ monkɔ pia no mu, naaso nna metse asɛm a wɔrekã no wɔ hɔ. Nna nightclub no wura no reyɛ nhyehyɛɛ atɔn me ama mbarimba beenu no. Nna wɔnye me bosuma wɔ ship a wɔdze fa containers mu na wɔnye me aakɔ Japan ma maakɛyɛ edwuma wɔ beebi a wɔtɔn nsã wɔ hɔ. Iyi maa m’akoma tui, ntsi mikegyinaa fie no n’abrandaa do na muhuruwii fii hɔ guanee.

Mihyiaa banyin bi a nna ɔaba nserahwɛ wɔ Sydney, na mekyerɛkyerɛɛ m’asɛm mu kyerɛɛ no. Nna morohwɛ kwan dɛ ɔbɛma me sika bi ma medze ahyɛ moho. Naaso ɔannyɛ dɛm, mbom ɔtoo nsa frɛɛ me dɛ membra beebi a ɔtse no na mumboguar na mempɛ biribi ndzi. Dza okesii nye dɛ mekɛtsenaa ne nkyɛn no menntu emmfi hɔ da. Afe kor ekyir no, yɛwaree.

MBRƐ BIBLE NO SESAA M’ABRABƆ:

Aber a mehyɛɛ ase dɛ menye Jehovah Adasefo rusũa Bible no, mbrɛ nna metse nka wɔ ndzɛmba beberee ho no sesae. Aber a mubosũae hunii dɛ Satan na ɔdze ndzɛmba bɔn ba nkorɔfo do no, ɔmaa mo bo fuwii; dza nna wɔdze akyerɛkyerɛ me ara nye dɛ ɔyɛ Nyankopɔn na ɔma yehu amandze. Aber a mubohun dɛ Nyankopɔn nntwe nkorɔfo aso wɔ abɔnsamgyamu no, ɔmaa m’akoma tɔɔ me yamu osiandɛ nna dɛm nkyerɛkyerɛ no abɔ me hũ akyɛr.

Nna m’enyi gye mbrɛ Adasefo no dze Bible mu ngyinadonsɛm sisi hɔn gyinae ahorow no ho. Ɔnnyɛ hɔn ano kɛkɛ na wɔdze kã dɛ wɔgye biribi dzi na mbom wɔdze dza wɔgye dzi no bɔ hɔn bra. Nna m’asɛm yɛ dzen paa, naaso ɔmmfa ho nsɛm a nna mekã nye mbrɛ nna misi yɛ m’adze no, Adasefo no kyerɛɛ dɛ wobu me na wɔdɔ me so.

Nna me haw kɛse nye dɛ, ɔyɛ a metaa tse nka dɛ mfaso biara nnyi mo do. Nna mo bo fuw moho mpɛn pii, na wonumaa me dɛ Jehovah Adasefo ne nyina ekyir no nna meda ho ara tse nka dɛmara. Nna minyim dɛ modɔ Jehovah, naaso nna menngye nndzi dɛ Jehovah botum adɔ obi tse dɛ emi ma wɔaayɛ yie.

Wonumaa me mfe 15 ekyir no, mubohun dɛ nna ohia dɛ meyɛ nsesa wɔ adwen a mikitsa no mu. Da kor bi, onua bi a nna ɔrema ɔkasa wɔ Jehovah Adasefo Ahendzi Asa do no twee adwen sii asɛm a ɔwɔ James 1:​23, 24 no do. Dɛm kyerɛwnsɛm no dze Nyankopɔn n’Asɛm no totoo ahwehwɛ ho, na ɔkyerɛɛ mu dɛ yebotum ahwɛ mu na yeehu hɛnho dɛ mbrɛ Jehovah si hu hɛn. Mehyɛɛ ase dɛ morodwendwen asɛm yi ho, na mubohun dɛ ɔsor mbrɛ Jehovah si hu me, nna ɔsor mbrɛ mara so misi hu moho. Ahyɛse no, nna memmpɛ dɛ megye adwen a ɔtse dɛm to mu koraa. Nna meda ho ara tse nka dɛ ɔbɛyɛ dzen dɛ Jehovah bɔdɔ me.

Nda kakraabi ekyir no, mekenkaan kyerɛwsɛm bi a ɔboaa me ma mesesaa adwen a nna mowɔ no. Mekenkaan Isaiah 1:​18. Wɔ hɔ no nna Jehovah nankasa rekã dɛ: “Afei hom mbra ma yɛnkekã ɛ, . . . kaansa hom bɔn tse dɛ adaaben mpo a, ɔbɔhoa dɛ esukwankyɛba; kaansa ɔber dɛ bɔgyaben mpo a, ɔbɛyɛ dɛ guannhwi.” Metsee nka dɛ Jehovah nye me rekasa na ɔrekã akyerɛ me dɛ: “Vicky, bra ma yɛnkekã anaa yɛntoto ndzɛmba yie. Minyim wo, minyim wo bɔn, minyim w’akoma mu nsɛm naaso modɔ wo.”

Dɛm anafua no menntum annda. Nna meda ho ara gye dzi dɛ Jehovah nnkotum adɔ me, ntsi mehyɛɛ ase dɛ morodwendwen Jesus no werdam afɔrbɔ no ho. Mpofirmu ara na obesii me tsirmu dɛ saana Jehovah enya moho abotar akyɛr ara yie, osiandɛ nna ɔada no dɔ edzi akyerɛ wɔ akwan ahorow pii do. Naaso nna dza merekã akyerɛ no ara nye dɛ: “Wo dɔ no runntum nnso mo do. Afɔr a wo Ba no bɔe no runntum mmpepa mo bɔn.” Nna wɔayɛ tse dɛ mbrɛ moropow werdam a Jehovah dze ama me no. Naaso afei, modwendween werdam a Jehovah dze akyɛ me no ho, na mehyɛɛ ase tsee nka dɛ ɔdɔ me.

MBRƐ MENYA DO MFASO:

Seseiara metse nka dɛ moho atsew, na mowɔ enyigye na akomatɔyamu so. M’awar asɔ, na m’enyi gye dɛ medze mo suahu boa afofor. Metse nka dɛ mabɛn Jehovah kɛse.

AFE A WƆWOO NO: 1974

ƆMAN A OFI MU: RUSSIA

NKAN NO: NNA N’ENYI GYE NDWOM A DEDE WƆ MU HO PAA

ME NKAN ABRABƆ:

Wɔwoo me wɔ kurow a wɔfrɛ no Votkinsk; na dɛm kurow no ara mu so na wɔwoo Pyotr Ilich Tchaikovsky a nna ɔagye dzin wɔ ndwom tow mu no. Nna hɛn ebusua dzi hia. Nna me papa wɔ suban pa naaso nna ɔbow nsã, ntsi sɛ nna ɔwɔ fie a yesuro paa na hɛn ahom nnka hɛnho koraa.

Nna mennhyɛ da ara inyim adze papa wɔ skuul, na mirinyin no mebɛtsee nka dɛ biribiara nnyi hɔ a mubotum ayɛ. Nna munntum nnka nkɔ nyimpa mu na nna ɔyɛ dzen ma me dɛ mebɛgye afofor edzi. Nna skuul kɔ nnyɛ me dɛw koraa. Dɛ mfatoho no, sɛ ɔba dɛ ɔwɔ dɛ mekyerɛkyerɛ dwumadzi bi mu wɔ skuulfo nkaa no enyim a, nna mpɛn pii no ɔyɛ dzen ma me dɛ mebɛkyerɛkyerɛ nsɛm a n’ase tse nnyɛ dzen no mpo mu akyerɛ hɔn. Naaso nna mutum kyerɛkyerɛ dɛm nsɛm kor noara mu kyerɛ nkorɔfo afofor. Aber a mowɔ J.H.S no, wɔkyerɛwee wɔ me report kaad kor do dɛ: “Ne kasaa mu nnda hɔ, na onntum nnkyerɛkyerɛ nsɛm mu.” Dɛm nsɛm yi bubuu me na ɔmaa mobotowee koraa. Mehyɛɛ ase dɛ morodwendwen siantsir a mowɔ wiadze yi mu no ho.

Midzii bɛyɛ mfe 13 rokɔ no, mehyɛɛ ase dɛ moronom nsã. Ahyɛse no, nna sɛ monom nsã a, ɔma m’enyi gye. Naaso sɛ monom pii a, nna me tsibowa bu me fɔ. Nna ɔtse dɛ mbrɛ minnyi tsirmpɔw biara wɔ m’asetsena mu. Metsee nka dɛ mahaw, na ɔtɔ da a nna mutum hyɛ fie nda pii a mummpue nnkɔ beebiara. Nna mususu dɛ sɛ mutwa mo nkwa do a ɔbɔboa.

Midzii mfe 20 no, metsee nka dɛ menya ahotɔ kakra. M’enyi bɛgyee ndwom a dede wɔ mu ho. Nna ndwom a ɔtse dɛm no ma minya ahoɔdzen soronko bi, na medze moho kɔbɔɔ nkorɔfo a nna hɔn so tsie dɛm ndwom no bi no. Migyaa me tsinhwi ma ofuuw tsentsenntsen, mehyɛɛ asomuadze, na nna misiesie moho dɛ ndwontofo a m’enyi gye hɔn ndwom ho no. Nkakrankakra no, mehyɛɛ ase dɛ mereyɛ m’adze basabasa na m’enyi bɛgyee ntokwaa ho, na nna metaa nye m’ebusuafo ham.

Nna mususu dɛ sɛ mitsie ndwom a dede wɔ mu a, ɔbɛma m’enyi agye naaso awerɛhosɛm nye dɛ wɔammba no dɛm. Afei mpo dze mesesae koraa! Bio so, aber a mubohun ndzɛmba bɔn a ndwontofo a m’enyi gye hɔn ndwom ho dze hɔnho hyɛ mu no, mubohun dɛ wɔadaadaa me na sɛ midzi hɔn ekyir a, wɔmmfa me nnkesi hwee.

Minyaa adwen bio dɛ muboku moho​—dɛm aber yi dze nna m’enyi aber paa. Adze a nna osiw me kwan nye mbrɛ nna dza mepɛ dɛ meyɛ no besi aka me maame. Osiandɛ nna ɔpɛ m’asɛm paa, na nna ɔayɛ ndzɛmba pii aboa me. Nna metseetsee ankasa. Nna asetsena afon me, naaso nna munntum so nnku moho.

Nna memmpɛ dɛ medze m’adwen si atseetsee a nna merefa mu no do, ntsi mehyɛɛ ase dɛ merekenkan Russia mbuukuu a agye dzin paa no bi. Wɔ mbuukuu a mekenkanee no mu no, nna kor kã banyin bi a ɔsoom wɔ asɔr bi mu no ho asɛm. Prɛko pɛr na minyaa ɔpɛ dzendzenndzen dɛ mebɛyɛ biribi ama Nyankopɔn nye nkorɔfo. Mifii m’akoma mu bɔɔ Nyankopɔn mpaa, nna mennyɛɛ biribi a ɔtse dɛm da. Meserɛɛ Nyankopɔn dɛ ɔmboa me mma munhu mbrɛ mubotum enya enyigye wɔ asetsena mu. Aber a nna morobɔ mpaa no, metsee nka dɛ moho atɔ me na iyi yɛɛ me nwanwa. Dza ɔyɛɛ me nwanwa kɛse nye asɛm a osii wɔ me mpaabɔ no ekyir. Mobɔɔ mpaa wiei no, wɔ ndɔnhwer ebien ekyir pɛpɛɛpɛ na metsee dɛ Jehovah Dasefo bi robɔ m’abow mu, na ɔkãa kyerɛɛ me dɛ ɔpɛ dɛ ɔnye me sũa Bible no. Megye dzi dɛ nna iyi yɛ me mpaabɔ no ho mbuae. Nna dɛm da no yɛ da a odzi kan a medze ribenya asetsena fofor a enyigye wɔ mu.

MBRƐ BIBLE NO SESAA M’ABRABƆ:

Ɔwɔ mu dɛ nna ɔnnda famu dɛ mobɔtow ndzɛmba a nna medze tsie ndwom a dede wɔ mu no nyina egu dze, naaso motowee gui. Ɔmmfa ho iyi nyina ekyir no, ndwom no kaa me tsirmu kyɛree. Aber biara a nna mebɛfa beebi a wɔrobɔ dɛm ndwom yi bi no, nna ɔma mekaa me nkan abrabɔ no. Nna memmpɛ dɛ medze abrabɔ bɔn a nna mobɔ mber bi etwa mu no ho adwendwen bɔfora ndzɛmba pa a nna murusũa sesei no. Dɛm ntsi nna memmpɛ dɛ mebɛfa mbea ahorow a ɔtsetse dɛm. Bio so, aber biara a me nkan abrabɔ ho nsɛm bɛba me tsirmu no, nna mobɔ Jehovah mpaa dzendzenndzen. Dɛm a nna meyɛ no boaa me ma minyaa “Nyankopɔn asomdwee a ɔtra ntseasee nyina no” bi.​—Philippifo 4:7.

Musũaa Bible no, mubohun dɛ Christianfo wɔ asodzii a ɔnye dɛ wɔbɛkã hɔn gyedzi ho asɛm akyerɛ afofor. (Matthew 28:​19, 20) Nna megye moho dzi paa dɛ murunntum nnyɛ biribi a ɔtse dɛm da. Ber kor noara mu no, nna ndzɛmba afofor a murusũa no ma m’enyi gye kɛse na ɔma m’asomu dwe me. Nna minyim dɛ ɔwɔ dɛ afofor so tse dɛm nokwasɛm yi bi. Ɔwɔ mu dɛ nna musuro dze, naaso mehyɛɛ ase dɛ merekã dza mesũa no bi akyerɛ nkorɔfo. Mubohun dɛ sɛ mekã dza mesũa wɔ Bible mu no ho asɛm kyerɛ nkorɔfo a, ɔma minya akokodur. Nna iyi yɛ me nwanwa dɛ! Afei so, nna ɔma mehyɛ gyedzi a mowɔ wɔ dza murusũa no mu dzen wɔ m’akoma.

MBRƐ MENYA DO MFASO:

Sesei dze mawar na m’enyi gye. Afei so, ɔyɛ me enyigye dɛ maboa me nuabaa, me maame nye nkorɔfo pii so ma woebosũa Bible no. Osiandɛ mosom Nyankopɔn na moboa afofor so ma wosũa noho adze ntsi, menya enyigye mapa wɔ m’asetsena mu.