Ena ika18 ni Okosita 2023, e sevutaka o Brother Giacomo Maffei, e lewe ni Komiti ni Tabana e Colombia, na New World Translation of the Christian Greek Scriptures ena vosa vakaWayuunaiki. E caka qori ena siti o Maicao, La Guajira e Colombia, donuya na soqo ni veiwasewase e kena usutu, “Vakaraitaka na Vosota”! Era tiko kina na le 265. E rawa ni download ena iyaya vakalivaliva, ena veisoliyaki na kena ilavelave tabaki ena itekitekivu ni 2024.

Era vosataka na vosa vakaWayuunaiki e sivia na le 700,000 na matatamata era vakatokai na Wayuu. Levu vei ira era tiko ena yasayasa o La Guajira e Colombia. Eso tale era tiko e Zulia ena vualiku kei Venezuela. E tekivu vakadewataki na noda ivola ina vosa vakaWayuunaiki ena 1998. E tiko na ofisi ni vakadewa tu yawa ena siti o Riohacha, na koroturaga kei La Guajira. Era veiqaravi tiko e rauta na 445 na dautukutuku ena 17 na ivavakoso vosa vakaWayuunaiki kei na 4 na iwasewase lalai e Colombia kei Venezuela.

E vakavinavinakataka e dua na tacida tagane na iVolatabu vou na New World Translation of the Christian Greek Scriptures ena vosa vakaWayuunaiki. E kaya, “E dua na iloloma talei mai vua na Tamada vakalomalagi, ni vakarautaka vei keda e dua na ivakadewa donu ni iVolatabu ena vosa vakaWayuunaiki!” E kaya e dua tale na tacida tagane, “Au vakadeitaka ni iVolatabu vou qo ena vaqaqacotaka na noda veiwekani kei Jiova.”

Eda nuidei nira na marautaka vakalevu na tacida era vosa vakaWayuunaiki na iVolatabu vou qo qai vukei ira tale e levu mera vakaliuca nodra veika vakayalo.—Maciu 5:3.