Ena itekitekivu ni 2018, e mate e rua na tacida o Habtemichael Tesfamariam kei Habtemichael Mekonen ena valeniveivesu e Mai Serwa, volekata na siti o Asmara. Rau vesu ena vulaikatakata ni 2008, ena vuku ni nodrau vakabauta, rau qai vakararawataki me voleka ni 10 na yabaki.

E mate o Tesfamariam ena ika3 ni Janueri  2018, ni sa yabaki 76. Era kaya o ira na vesu vata tiko ni tauvi koya na strouk. A sucu o Tesfamariam ena 1942 ena vanua o Adi Yakulu, Mendefera, e Eritrea. A papitaiso me iVakadinadina i Jiova ena 1970. E vesu vakatawadodonu qai vakararawataki, ia e sega ni cakitaka na nona vakabauta. E se bula tiko na watina o Leterberhan Bezabih, va na luvena tagane, kei na tolu na luvena yalewa.

E mate o Mekonen ena ika6 ni Maji, 2018 ni sa yabaki 77. Era kaya o ira na vesu vata tiko ni leqa nona ivi. A sucu o Mekonen ena 1940, ena koro o Kudo Felasi ena ceva kei Eritrea. A papitaiso me iVakadinadina i Jiova ena 55 na yabaki sa sivi. Me vakataki Tesfamariam, a vesu vakatawadodonu qai vakararawataki, ia e sega vakadua ni cakitaka na nona vakabauta. E se bula tiko na watina o Mihret Ellias, dua na luvena tagane kei na luvena yalewa.

Ena Julai 2008, era vesuki Mekonen vakatawadodonu na ovisa ena nona vale. Era vesuki Tesfamariam tale ga ena Okosita 2008. Rau bala ruarua ena keba ni veivakararawataki kilai levu na Meitir Prison, ena vanua talasiga ena vualiku kei Asmara, rau qai vosota voli kina na veivakararawataki kei na itovo torosobu. Era vesu eso na iVakadinadina i Jiova ena Okotova 2011 ina Okosita 2012 ena dua na tabavale e “lomaniqele.” E lailai na kakana kei na wai e vakarautaki nira sogolati tu ena vanua katakata qori. Eso era tauvimate bibi kina ena nodra bula taucoko.

Ena 2017, era tokitaki na iVakadinadina i Jiova era vesu tu ena valeniveivesu na Meitir Prison ina Mai Serwa Prison. E vakatarai kina vei ira na wekadra mera vakau kakana mai, rawa tale ga ni qaravi vakavuniwai ke dua e tauvimate bibi. Era marautaka na kaivesu na veisau e caka qori ni sa bau mamada toka. Ia rau sega ni bula vinaka sara o Tesfamariam kei Mekonen, ena vuku ni itovo torosobu a caka vei rau.

Rau sega ni imatai ni iVakadinadina i Jiova me mate ena dua na valeniveivesu e Eritrea o Tesfamariam kei Mekonen. Ena vuku ni ituvaki ni valeniveivesu kei na veivakalolomataki era sotava kina iVakadinadina i Jiova. Ratou mate kina e le lima na tacida. Eratou sere mai valeniveivesu ena vica na yabaki sa oti e le vitu na iVakadinadina i Jiova, ratou se vakila tiko ga qo na revurevu ni veika ratou sotava me vaka na tauvimate bibi. Era se vesu tiko ga e 53 na iVakadinadina i Jiova e Eritrea ena vuku ni nodra vakabauta, wili kina o Tareke, na taci Tesfamariam.

Ena ika8 ni June, 2016, e vakaraitaka kina na Matabose ni Dodonu ni Lewenivanua ena UN, na veika e dikeva na ilawalawa ratou digitaki me ratou vaqaqa na Dodonu ni Lewenivanua e Eritrea (COIE). E vakadreti ira kina e Eritrea na Matabose, mera “doka na nodra galala ni sokalou se vakabauta” na lewenivanua, “mera muduka tale ga na nodra dau vesu se totogitaki eso ena vuku ni nodra vakabauta, me vakataki ira na iVakadinadina i Jiova, . . . kei na nodra sereki sara ga o ira na sega ni dodonu mera vesu.” E tinia na veivaqaqai qori, ni nodra vakacacani na lewe i Eritrea ena vuku ni nodra vakabauta, e okati me “veivakalolomataki ni kawatamata.”

Era nuitaka tu na iVakadinadina i Jiova, ni nodrau mate o Tesfamariam kei Mekonen, era na kauai kina na lewe i vuravura. Me uqeti ira tale ga na vakailesilesi e Eritrea mera cakava e dua na ka me tarova nodra vesu vakatawadodonu na iVakadinadina i Jiova ena vuku ni nodra vakabauta.