Na gauna e yaco kina na vakatatabu ni matedewa na COVID-19 e Merika, e sega ni vakatarai na veisiko ena valeniveivesu. Qori e tarovi ira gona e vicavata na drau na iVakadinadina i Jiova mera vunau qai caka vuli iVolatabu ena valeniveivesu. Era sa sega gona ni vukei vakayalo e vicavata na udolu na kaivesu. Ia era veisautaka na nodra iwalewale ni vunau na tacida me muri tiko ga kina na lawa ni vakatatabu ni COVID-19.

Qo na ka e kaya o brother Dan Houghton e tuvanaka tiko na cakacaka vakaitalatala ena valeniveivesu era tu ena yalava e qarava na valenivolavola ni tabana e Merika, “Keimami leqataka vakalevu na nodra vukei vakayalo na kaivesu. Nira vinakata sara tu ga ena gauna qo na noda veivuke.”

Kena ivakaraitaki, o brother Micah Seierstad e kerei ira na vakailesilesi ni valeniveivesu e Vacaville e Kalifonia, me vakauta e valeniveivesu eso na vidio ni JW Broadcasting. Ia e kidacala ni ratou kerei koya mai na vakailesilesi me vakauta yani eso na vidio me kaburaki ena siteseni ni tivi e dau vakaraitaki ena 33 na valeniveivesu e Kalifonia. E kaburaki gona kina na porokaramu ni soqo ni veiwasewase ni 2020 e kena usutu, “Meda Marau Tiko Ga!” E wasewasei vakalalai na vidio me rauta na 28 na miniti, qai saravi vakatolu ena dua na siga. Ena rawa kina nira sarava na le 130,000 na kaivesu.

E kaya o brother Seierstad: “Eda qoroqoro ga nida raica na veivuke i Jiova. Ena sega ni dua na ka ena tarova na nona via cakava o Jiova na nona inaki!”

Era rogoca na tacida nira vinakata na vakailesilesi ni valeniveivesu e Sarasota County Jail e Florida mera vakarautaka eso na ivola mera vakayaloqaqataki kina na kaivesu ena gauna dredre ni matedewa. Era tukuna na tacida nira tu vakarau ni vakauta yani na iVolatabu kei na ivola vakaivolatabu vakavalagi kei na vakaSipeni. Era vakadonuya qori na vakailesilesi ra qai kaya vei ira na tacida mera caka vuli iVolatabu kei ira na kaivesu ni vakayagataki na Internet. Qo na ka e vola mai e dua na kaivesu e vuli iVolatabu tiko vei nona qasenivuli: “Au dau taleitaka na noqu vuli. E uqeti au meu dau wilika vakalevu na iVolatabu. Sa vinaka cake na noqu rai me baleta na veigauna se bera mai.”

Se mani yaco na matedewa, se ra tu eso e valeniveivesu, eda marautaka ni sega ni dua na ka ena tarova na noda Kalou dauloloma o Jiova me vakarautaka na kakana vakayalo vei ira na tataleitaki.—Same 139:7-10.