E dua na iVakadinadina i Jiova o Ong-Li, e tiko e Bulgaria. E vuli iVolatabu tiko kei na dua na yalewa o Zlatka, ia o watina e sega ni vuli. E kaya o Ong-Li: “Ni keirau veitalanoataka tiko na bula vakavuvale, au vakamacalataka sara vua ni bibi meda dau tukuna vei ira na keda isa, kei ira na luveda nida lomani ira. E raici au ena matararawa o Zlatka, qai kaya ni se sega vakadua ni tukuna vei watina, se vei luvena yalewa e yabaki ciwa ni lomani rau!”

 E kaya o Zlatka, “Au dau tu vakarau meu cakava vei rau na ka kece, au sega ga ni rawa ni tukuna na vosa qori.” E tomana, “E sega ni bau tukuna vei au o tinaqu ni lomani au, o buqu tale ga e sega ni dau tukuna vei tinaqu ni lomani koya.” Sa qai vakaraitaka vei koya o Ong-Li ena iVolatabu nona kaya o Jiova ni lomani Jisu. (Maciu 3:​17) E uqeti Zlatka sara me masulaka qori vei Jiova, me nona isausau tale ga me tukuna vei watina kei luvena ni lomani rau.

 E kaya o Ong-Li: “Oti e rua na siga, dua na ka nona marau o Zlatka ni sa masulaka vei Jiova me vukei koya. Ni yaco yani i vale o watina, e kaya sara vua o Zlatka ni vulica ena iVolatabu na bibi ni nona dau dokai watina o yalewa, me lomani koya tale ga. Sa qai kaya vua o Zlatka ni lomani koya vakalevu! Ni lesu yani vale o luvena yalewa e mokoti koya sara o tinana qai kaya vua ni lomani koya! E kaya vei au o Zlatka: ‘Au sa qai lomavakacegu qo. Ena veiyabaki sa sivi au sega ni dau talaucaka na lomaqu, ia na veivuke i Jiova au sa rawa ni tukuna vei rau noqu veitamani niu lomani rau.’

 E kaya o Ong-Li, “Oti e dua na macawa, au sotavi wati i Zlatka, e kaya sara vei au: ‘Levu era tukuna vei au me kua ni vuli iVolatabu vata kei iko o Zlatka, ia au kila ni veivuke sara vakalevu ina neitou vuvale nona vulica na iVolatabu. Na gauna qo keirau vakila tiko na marau ena neirau bula vakawati.’”