Ka era tukuna e levu: Era sega ni solevutaka na Kirisimasi na iVakadinadina i Jiova nira sega ni vakabauti Jisu.

 Kena dina: Keimami lotu vaKarisito. Keimami vakabauta nida na vakabulai ena vuku i Jisu duadua ga.—Cakacaka 4:12.

 Ka era tukuna e levu: Oni vakaleqa na duavata vakavuvale ni oni vakavulici ira na lewena mera kua ni solevutaka na Kirisimasi.

 Kena dina: Keimami kauaitaki ira dina na vuvale, keimami vakayagataka na iVolatabu me vaqaqacotaki kina na vuvale.

 Ka era tukuna e levu: Oni sega ni tokona na “yalo ni Kirisimasi” e yalosavu, na veiyaloni e vuravura taucoko, kei na caka vinaka vei ira tale eso.

 Kena dina: Keimami saga me keimami dau yalosavu qai veiyaloni e veisiga. (Vosa Vakaibalebale 11:25; Roma 12:18) Kena ivakaraitaki, na iwalewale ni neimami soqoni kei na cakacaka vakavunau e salasalavata kei na ivakaro i Jisu: “E soli wale vei kemudou, dou solia wale tale ga.” (Maciu 10:8) Kena ikuri, keimami gumatuataka na kena vunautaki ni Matanitu ni Kalou e noda inuinui duadua ga me kauta mai na veiyaloni e vuravura.—Maciu 10:7.

•   A vakarota o Jisu meda vakananuma na nona mate, sega ni siga e sucu kina.—Luke 22:19, 20.

•   Era sega ni solevutaka na Kirisimasi na yapositolo kei na imuri taumada i Jisu. E tukuna na New Catholic Encyclopedia ni “tauyavutaki na Kirisimasi ena 243 G.V.,” qori ni oti e dua na senitiuri na nodratou mate na yapositolo.

•   E sega ni tu e dua na ivakadinadina ni a sucu ena ika25 ni Tiseba o Jisu; e sega ni volatukutukutaki ena iVolatabu na tikinisiga a sucu kina.

•   Keimami vakabauta ni sega ni vakadonuya na Kalou na Kirisimasi ni yavutaki ena ivakavuvuli kei na ivalavala butobuto.—2 Korinica 6:17.

 E levu era sa kila ni Kirisimasi e yavutaki ena ivalavala butobuto qai sega ni tokona na iVolatabu, ia era se solevutaka ga. De dua era na taroga: Cava era vakabibitaka kina me kua ni solevutaki na Kirisimasi? Cava mera vakavuna kina e levu na veivosaki?

 E uqeti keda na iVolatabu meda “yalomatua.” (Roma 12:1, 2) E vakavulici keda meda raica vakabibi na ka dina. (Joni 4:23, 24) Koya gona, keimami kauai ena nodra nanuma eso me baleti keimami, ia keimami na vakamuria na ivakavuvuli vakaivolatabu, veitalia ke keimami cati.

 Keimami vakatulewataka me keimami kua ni solevutaka na Kirisimasi, ia keimami kila nida na dui vakatulewa ga kina. Keimami sega tale ga ni tarova na nodra solevutaka na Kirisimasi eso tale.