O sa domona tiko e dua, drau mani vakatulewataka mo drau veibuku me kilai kina ke rawa ni drau isa ni vakawati vinaka. Cava gona mo namaka ni toso tiko nomudrau veivosaki?

Ena ulutaga qo

•  Mo drau veivosaki vakadodonu

•  Namaka ni na duidui na nomudrau rai

•  Namaka ni na vakavu lomaocaoca na veibuku

 Ni levu na gauna drau vakayagataka vata, drau na veikilai vinaka tale ga. O na kila na veika me baleti koya ni o raica na nona itovo, se na ka e cakava ena duidui ituvaki.

 Ia e tiko eso na ka mo drau veivosakitaka vakadodonu. Ena gauna vata qori, mo drau lewa vinaka na ivakarau ni lomamudrau, qai dei tiko ga ena veika drau sa vakatulewataka.

 Qo eso na ulutaga mo drau veivosakitaka:

•   iLavo. Vakacava e tiko nomu dinau? E dau dredre mo vakayagataka vakavuku na ilavo? Ke drau mani vakawati, drau na vakatulewataka vakacava na ilavo drau rawata kei na kena drau vakayagataka?

•   Bula vakayago. O bulabula vinaka? O tauvimate bibi ena dua na gauna sa oti?

•   iSausau. Cava eso nomu isausau? E tautauvata nomu isausau kei koya drau veibuku tiko? Ke drau mani vakawati, vakacava o na marau tiko ga ke o sega ni rawata nomu isausau qori?

•   Vuvale. Vakacava o qarava tiko e dua nomu lewenivuvale ena gauna qo? O na rawa ni cakava qori ena dua na gauna mai muri? O via vakaluveni? Ke vaka kina, me vica na luvemu?

 Ni drau veivosakitaka na ulutaga va qori, mo vosa vakadodonu qai dina ena ka kece. Kua ni vunitaka se veisautaka na ka o tukuna me rawa ni o taleitaki kina.—Iperiu 13:18.

 Vakasamataka mada: Cava o via kila me baleti koya drau veibuku tiko? Cava e dodonu me kila o koya me baleti iko? Ena yaga vakacava nomudrau veivosaki vakadodonu ena gauna qo ke mani drau vakatulewataka mo drau vakamau?

 iVakavuvuli vakaivolatabu: “Mo dau tukuna na ka dina.”—Efeso 4:25, New Century Version.

 “Ena rairai kaya o yalewa, ‘Keirau na veimusumusuki ena ono na vula mai qo,’ ia o tagane ena rairai vinakata me dua na yabaki. Ena ituvaki qori, ena rawa ni mosi na lomai yalewa se veilecayaki ni vinakata me totolo nodrau vakamau. E bibi gona mo drau veivosakitaka vata na ka drau vakasamataka tiko.”—Ariana, dua na yabaki nona vakawati.

 Eda duidui kece. Kua gona ni nanuma ni drau na duavata se tautauvata nomudrau rai ena ka kece. Kena ivakaraitaki, ena rawa ni vakamua na nomu rai na nomu isususu kei na nomu itovo.

 Vakasamataka mada: Ke duidui nomudrau rai ena so na ka lalai mada ga, vakacava o dau yalorawarawa mo drau duavata ke sega ni beci kina na ivakavuvuli vakaivolatabu?

 iVakavuvuli vakaivolatabu: “Me kilai na nomuni yalorawarawa.”—Filipai 4:5.

 “Ke o nanuma ni veiganiti mo drau vakawati, ena tiko ga na duidui. Ena vinakati mo drau veiyaloni tiko ga. Ia e bibi sara na itovo drau vakaraitaka ni basika na duidui.”—Matthew, lima na yabaki nona vakawati.

 E macala ga ni o na vakayagataka e levu nomu gauna ena veibuku, e rawa ni vakavu lomaocaoca tale ga. Cava gona e rawa ni vukei iko?

 Mo yalana eso na ka. Kua ni kauaitaka tu ga nomu veibuku o lai guilecavi ira kina nomu itokani, se na itavi mo qarava. O Alana sa lima na yabaki nona vakawati, e kaya: “Oti nomu vakamau, o na vinakata mo veimaliwai tiko ga kei ira nomu itokani. Era na vinakata tale ga mera veimaliwai kei iko. Mo dau nanumi ira ena gauna mada ga o veibuku kina.”

 Nanuma tiko, oti nomu vakamau ena vinakati mo veiraurautaka na ka kece ena nomu bula. Ena vinaka mo tovolea qori ena gauna o veibuku kina.

 Vakasamataka mada: Vakacava e dau sivia na gauna o vinakata me vakayagataka o nomu itau vei iko, se o vinakata me kauaitaki iko vakalevu? Vakacava e dau namaka vakasivia vei iko na ka? Drau na veiraurautaka vakacava na ka mo drau namaka me kua kina ni drau lomaocaoca?

 iVakavuvuli vakaivolatabu: “E vagauna na ka kece ga.”—Dauvunau 3:1.

 “Ke rau vakayagataka na gauna ga ni veivakamarautaki me rau veimaliwai kina, ena rawa ni rau kidroataka eso tale na ka ni oti nodrau vakamau. Ena yaga gona vakalevu ke rau cakava vata ena gauna qo eso na itavi me vaka na volivoli, cakacaka ni vale, qai sokalou vata. Ena dei kina nodrau bula vakawati.”—Daniel, rua na yabaki nona vakawati.

 Nanuma tiko, e vakaiyalayala ga na gauna ni veibuku. Na gauna qori o na vakadeitaka kina mo vakawati se sega. Ena vakamacalataki ena Wase 3 eso na ka mo vakasamataka tiko ni bera ni o vakatulewataka qori.