Cava e Kaya na iVolatabu me Baleta na Nodrau Tiko Vata e Rua Rau se Bera ni Vakamau?

SARAVA/ROGOCA

Kena isau vakaivolatabu

E kaya na iVolatabu ni vinakata na Kalou meda “vakatabui [keda] mai na veiyacovi tawadodonu.” (1 Cesalonaika 4:3) Me vaka e cavuti ena iVolatabu, na “veiyacovi tawadodonu” e okati kina na lasaituba, veiyacovi vakamataqali vata kei na nodrau veiyacovi e dua na tagane kei na yalewa ni rau se bera ni vakamau.

Cava e bibi kina vua na Kalou me rau vakamau na veiwatini?

E tauyavutaka na Kalou na ituvatuva ni vakawati. E tauyavutaka na Kalou na vakawati ni vakaduavatataki rau na imatai ni veiwatini. (Vakatekivu 2:22-24) E sega ni nona inaki me rau tiko vata na tagane kei na yalewa rau qai sega tu ni veidinadinati me rau vakamau.
E kila na Kalou na ka e vinaka duadua vei keda. E tauyavutaka na vakawati me rau dei kina o yalewa kei tagane, me yaga ena vuvale taucoko, me taqomaki tale ga. Dikeva mada e dua na ivakatautauvata rawarawa qo. Me vaka ga nona vakarautaka na daubuli yaya na idusidusi me sema kina na iyaya e volia, e vakarautaka tale ga na Kalou na idusidusi me marautaki kina na bula vakavuvale. Ena yaga tu ga na ivakatagedegede ni Kalou vei ira na muria.—Aisea 48:17, 18.

O na kila ena idusidusi e vakarautaka na daubuli yaya na sala mo sema kina na iyaya o volia, e vakarautaka tale ga na Kalou na idusidusi me marautaki kina na bula vakavuvale
Na veiyacovi ena taudaku ni vakamau ena vakilai kina e levu na leqa. Kena ivakaraitaki, ena rawa ni yaco kina na bukete e sala, dewa na mate ca ni veiyacovi, kei na lomabibi.
E vinakata na Kalou me rau vakaluveni na veiwatini ni rau veiyacovi. E ka tabu vua na Kalou na bula, e nona iloloma tale ga na vakaluveni. E vinakata na Kalou meda rokova na iloloma qori nida doka na ituvatuva ni vakawati.—Iperiu 13:4.

E donu me rau tiko vata e rua ni se bera na vakamau me rau vakatovotovotaka kina na bula vakawati?

Ena sega ni dei na vakawati ke rau tiko vata e rua ena loma ni dua na gauna qai sega tu ni rau veidinadinati. Ia ena qaqaco nodrau ivau ni vakawati ke rau dei ena nodrau veidinadinati, rau qai cakacaka vata me wali kina na leqa. a Ena dei ga nodrau veidinadinati ni rau vakamau.—Maciu 19:6.

Cava me rau cakava na veiwatini me dei kina nodrau vakawati?

E sega ni dua na vakawati me taucoko. Ia ke rau muria na veiwatini na ivakasala vakaivolatabu, ena rawa ni marautaki nodrau bula vakawati. Qo eso na ivakasala vakaivolatabu:

Kauaitaka na ka e vinakata o watimu, sega ni ka o vinakata.—1 Korinica 7:3-5; Filipai 2:3, 4.
Drau dau veidokai, drau veilomani tale ga.—Efeso 5:25, 33.
Vulica mo dau qarauna na gusumu.—Vosa Vakaibalebale 12:18.
Dau vosovoso, qai dau totolo tale ga ni veivosoti.—Kolosa 3:13, 14.