E itukuni wale ga na italanoa e tukuna o Jisu me baleta na turaga vutuniyau, kei Lasarusa. (Luke 16:19-31) Ia rau vakaibalebaletaka e rua na ilawalawa: (1) ira na iliuliu ni lotu Jiu dokadoka ena gauna i Jisu, kei (2) ira na vakaloloma ia era yalomalumalumu ni muria na itukutuku i Jisu.

Ena ulutaga qo

•  Cava e kaya o Jisu me baleta na turaga vutuniyau kei Lasarusa?

•  A yaco dina na italanoa qo?

•  E tokona na ivakavuvuli me baleti eli na italanoa qo?

•  Cava na ibalebale ni talanoa qo?

 Ena Luke wase 16, e talanoataka tiko o Jisu e rua na tagane a qai yaco na veiveisau levu ena nodrau bula.

 Qo na ka e talanoataka: E marautaka tu na turaga vutuniyau na nona bula. Ia o Lasarusa e daukerekere qai mai toka ena nona matamata na turaga vutuniyau, ni via kania na tikitiki ni kakana e lutu mai nona teveli. Toso na gauna, e mate o Lasarusa ra qai kauti koya na agilosi me lai dabe e yasa i Eparama. E mate tale ga na turaga vutuniyau e lai bulu sara. E tukuni ni rau se vakilai rau tu ena gauna rau mate kina. E vakararawataki ena bukawaqa na turaga vutuniyau, qai kerei Eparama me kaya vei Lasarusa me tonia na iqaqaloniligana ena wai me rawa ni vakabatabatataki kina na yamena. Ia e sega ni vakadonuya o Eparama na nona kerekere, qai kaya vua ni sa veisau na nodrau bula. Sa wasei rau tale ga e dua na qakilo levu ena sega ni rawa ni rau takosova.

 Sega. E tukuna ga o Jisu na vosa vakatautauvata qo meda vuli kina. Era vakadinata mada ga qori na dau dikeva na iVolatabu. Kena ivakaraitaki, e volai ena dua na itabataba ni iVolatabu i Luther ena 1912, ni italanoa qo e vosa vakatautauvata. E volai tale ga ena dua na ivakamacala e ra ni Jerusalem Bible ni Katolika, ni “talanoa qo e vosa vakatautauvata, era cavuti kina na tamata era sega ni bula dina.”

 Vakacava e vakavulica tiko o Jisu na bula ni oti na mate? Eso era na vakararawataki i eli ena gauna era mate kina? Rau tiko tale ga mai lomalagi o Eparama kei Lasarusa? E tiko e levu na ivakadinadina e sega ni tokona qori.

 Kena ivakaraitaki:

•   Ke vakararawataki ena bukawaqa na turaga vutuniyau, sa na rawa ni mamaca na wai e tiko ena iqaqalo ni liga i Lasarusa ena cawa ni katakata.

•   Ke sa kama dina na turaga vutuniyau ena bukawaqa, ena sega ni rawa ni vakaotia na nona karamaca na wai ena iqaqalo ni liga i Lasarusa.

•   Gauna e tukuna tiko kina o Jisu na italanoa qo, e se bera ni dua e gole i lomalagi. Kena ibalebale, a sega ni bula tu mai lomalagi o Eparama.—Joni 3:13.

 Sega, qo e vosa vakatautauvata ga. Ia eso era kaya ni vakaibalebaletaka nodra kau i lomalagi na tamata vinaka, kei na nodra vakararawataki i eli na tamata ca. a

 Vakacava e dina qori? Sega.

 Na ivakavuvuli ni eli e sega ni tokona ena ka e tukuna na iVolatabu me baleta na kedra ituvaki na mate. Kena ivakaraitaki, e sega ni kaya na iVolatabu ni gauna era mate kina na tamata vinaka era na lako kece i lomalagi, se era na vakararawataki na tamata ca ena bukawaqa mai eli. Ia e kaya ga: “Era kila na bula tiko nira na mate, ia o ira na mate era sega sara ga ni kila e dua na ka.”—Dauvunau 9:5.

 Na kena yaco na veiveisau levu vei rau na ilawalawa qo.

 Na turaga vutuniyau, e vakaibalebaletaki ira na iliuliu ni lotu vakaJiu era “matamatailavo.” (Luke 16:14) Era kila na ka e tukuna o Jisu, ia era tusaqata na ka e vakavulica. Era beci ira tale ga na tauvanua.—Joni 7:49.

 O Lasarusa, e vakaibalebaletaki ira na tauvanua era ciqoma na veika e vakavulica o Jisu, ra qai dau cati vei ira na iliuliu ni lotu vakaJiu.

 E veisau vakalevu na ituvaki e yaco vei rau na ilawalawa qori.

•   Era nanuma na iliuliu ni lotu vakaJiu ni vakadonui ira na Kalou. Ia e besetaki ira na Kalou qai sega ni vakadonuya na nodra sokalou, e vaka ga era mate tu. Na vuna? Nira sega ni ciqoma na itukutuku i Jisu. E vaka ga e vakararawataki ira tu na veika e vunautaka o Jisu kei ira na nona imuri.—Maciu 23:29, 30; Cakacaka 5:29-33.

•   Era sa vakadonui na tauvanua ra dau vakalolomataki vei ira na iliuliu ni lotu. Levu era vakabauta na itukutuku vakaivolatabu i Jisu, ra qai vakila na kena yaga. Era na bula tawamudu tale ga.—Joni 17:3.