E sega ni vakamatatataka na iVolatabu na ka e vauca na nona vakamatei e dua me cegu kina nona rarawa (euthanasia). a Ia na ivakamacala ni iVolatabu me baleta na bula kei na mate ena veivuke me donu tiko ga na rai. E tabu na veivakamatei, ia e sega ni dua na ivakaro e vauca na veika me vakayacori me vakabalavutaki kina nona bula e dua sa voleka ni mate.

 E vakaraitaka na iVolatabu ni Kalou e Dauveibuli, na “ivurevure ni bula.” (Same 36:9; Cakacaka 17:28) Na bula e ka talei vua na Kalou. Qori na vuna e vakatabuya kina na veivakamatei se na kuna. (Lako Yani 20:13; 1 Joni 3:15) E kaya tale ga na iVolatabu ni dodonu meda qaqarauni me taqomaki kina noda bula kei na nodra bula eso tale. (Vakarua 22:8) Kena ibalebale e vinakata na Kalou meda vakamareqeta na isolisoli ni bula.

Vakacava ke tauvimate bibi e dua?

 E vakatabuya na iVolatabu na nona vakamatei e dua e sa voleka ni mate se sa kilai tu ga ni na mate. E vakadinadinataki qori ena ka e yaco vei Saula na Tui Isireli. Gauna e mavoa levu kina ena ivalu, e kerei koya e dau cola nona iyaragi me vakamatei koya. (1 Samuela 31:3, 4) E sega ni via cakava qori o koya e dau colata na iyaragi i Saula. Ia e lasutaka e dua tale na tagane ni a vakayacora na ka e vinakata o Saula. Ni vakatotomuria o Tevita na rai ni Kalou me baleta na bula, a totogitaka kina na tagane e kaya ni veivakamatei.—2 Samuela 1:6-16.

E dodonu me vakabalavutaki na bula se mani iwalewale cava e muri?

 E sega ni vakarota na iVolatabu me vakabalavutaki na nona bula e dua sa voleka ni mate. Ia e veivuke ga ena rai donu me tiko vei keda. Ena vuku ni noda ivalavala ca, e keda meca kina o mate. (Roma 5:12; 1 Korinica 15:26) Eda sega ni via mate, ia sega ni dodonu meda rerevaka na mate ni yalataka tu na Kalou na inuinui ni veivakaturi. (Joni 6:39, 40) O koya e doka na bula ena qara na veiqaravi vakavuniwai vinaka duadua. Ia e sega ni okati e keri na nomu digia na veiqaravi vakavuniwai e via vakabalavutaki kina na nona bula e dua sa voleka ni mate.

Vakacava o koya e vakamatei koya ga, ena vosoti se sega?

 E sega ni tukuna na iVolatabu ni na sega ni vosoti o koya e vakamatei koya ga. E ivalavala ca bibi ke vakamatei koya ga e dua. b Ia e kila vinaka tu na Kalou ni so na ka e rawa ni vakavuna me via vakamatei koya ga e dua, me vaka na mate ni mona, lomaocaoca vakasivia, se mate ni kawa. (Same 103:13, 14) E veivakacegui ena iVolatabu na Kalou ena gauna ni rarawa. E kaya na iVolatabu “nira na vakaturi mai na yalododonu kei ira na sega ni yalododonu.” (Cakacaka 24:15) Qori e vakaraitaka ni na yaga tale ga na inuinui ni veivakaturi vei ira era cala bibi, wili kina o koya e vakamatei koya ga.