IVAKAMACALA NI TIKINIVOLATABU

Jeremaia 29:11—“Au Kila na ka au Nanuma Tiko me Baleti Iko”

SARAVA/ROGOCA

“‘Niu kila vinaka na ka au nanuma tiko me baleti kemuni,’ e kaya o Jiova, a ‘na nanuma moni tikovakacegu moni kua ni rarawa, meu solia vei kemuni na inuinui kei na ka moni namaka ena gauna se bera mai.’”—Jeremaia 29:11, iVakadewa ni Vuravura Vou.

“‘Au kila vinaka na ka au nanuma tiko me baleti kemuni, e kaya na TURAGA, ‘na nanuma moni tikovakacegu moni kua ni rarawa, meu solia vei kemuni na inuinui kei na ka moni namaka ena gauna se bera mai.’”—Jeremaia 29:11, New International Version.

iBalebale ni Jeremaia 29:11

E yalataka na Kalou o Jiova ni na solia vei ira nona dauveiqaravi na vakacegu ena veigauna se bera mai. E volai na vosa qori vei ira na tamata ena gauna sa oti, ia e yaga tale ga vei keda nikua. O koya “na Kalou . . . na vu ni noda inuinui.” (Roma 15:13) E vola o koya na yalayala qori ena iVolatabu, me rawa ni “noda na inuinui” ena veigauna se bera mai.—Roma 15:4.

iKotokoto ni Jeremaia 29:11

Na veivosa qo e okati tiko ena ivola e vakau vei ira na Isireli era kau vakavesu e Papiloni. b (Jeremaia 29:1) E kaya vei ira na Kalou nira na vesu tu ena dua na gauna balavu. E vinakati gona mera tara nodra vale, teitei, qai qarava nodra vuvale. (Jeremaia 29:4-9) E tomana: “Ni cava na 70 na yabaki e Papiloni, au na golevi kemuni, au na vakayacora vinaka na noqu vosa ni iyalayala meu vakalesui kemuni mai [Jerusalemi].” (Jeremaia 29:10) E yalataka vei ira na Kalou ni na sega ni guilecavi ira, ena vakalesui ira tale ga e Jerusalemi.—Jeremaia 31:16, 17.

E dina tu ga na Kalou ena nona yalayala vei ira na Isireli. Me vaka ga e parofisaitaka, e vakavuai Papiloni o Sairusi na Tui Perisia. (Aisea 45:1, 2; Jeremaia 51:30-32) A vakadonuya o Sairusi mera lesu na Jiu ina nodra vanua. Era qai lesu tale i Jerusalemi ni oti e 70 na yabaki nodra kau vakavesu.—2 Veigauna 36:20-23; Esera 3:1.

Nikua, e veivakadeitaki na yalayala ena Jeremaia 29:11 vei ira na nuitaka tu na yalayala ni Kalou. Qori e okati kina na bula vakacegu e vuravura ni sa veiliutaki o Jisu Karisito ena Matanitu ni Kalou.—Same 37:10, 11, 29; Aisea 55:11; Maciu 6:10.

Rai Cala me Baleta na Jeremaia 29:11

Rai cala: E tu nona “inakinaki” na Kalou vei keda yadua.

Ka dina: Na Kalou e vakalaivi ira na tamata mera digia na sala era via muria. Na ka e kaya ena Jeremaia 29:11 e baleti ira na Isireli era kau vakavesu e Papiloni. E vinakata gona mera vakila na vakacegu ena veigauna se bera mai. (Jeremaia 29:4) Ia e vakalaiva na Kalou mera vakatulewataka yadua sara ga ke ra vinakata mera vakila nona yalayala. (Vakarua 30:19, 20; Jeremaia 29:32) O ira na vakasaqara na Kalou e dodonu me vu mai lomadra nodra masu.—Jeremaia 29:12, 13.

Rai cala: Na Kalou ena vakalougatataki ira nona tamata ena iyau.

Ka dina: Na vosa “sautu” e laurai ena Jeremaia 29:11 ena so na iVolatabu, e vakadewataki mai ena vosa vakaIperiu e kena ibalebale na vakacegu, bula vinaka, kei na bula. E yalataka na Kalou vei ira na Isireli era kau vakavesu, nira na vakila na vakacegu kei na bula vinaka. Era na nona tamata tiko ga, ena vakalesui ira tale ga i Jerusalemi.—Jeremaia 29:4-10.

Wilika na Jeremaia wase 29, kena ivakamacala e ra kei na idusidusi ena iVolatabu.

a O Jiova na yaca ni Kalou.—Same 83:18.

b E kaya The Expositor’s Bible Commentary me baleta na Jeremaia 29:11: “Qo e dua na yalayala totoka ena iVolatabu. E vakaraitaka o Yahweh [Jiova] nona yalololoma vei ira na kau vakavesu, e vukei ira tale ga me donu nodra rai, kei na inuinui ena veigauna se bera mai.”—Volume 7, tabana e 360.