IVAKAMACALA NI TIKINIVOLATABU
Joni 14:6—“O Yau na Sala na Dina kei na Bula”
“E kaya vua o Jisu: ‘O yau na sala, na dina, kei na bula. Ena vukuqu ga ena qai torovi Tamaqu rawa kina e dua.’”—Joni 14:6, iVakadewa ni Vuravura Vou.
“E sauma o Jisu, ‘O yau na sala, na dina, kei na bula. Ena vukuqu ga ena qai torovi Tamaqu rawa kina e dua.’”—Joni 14:6, New International Version.
iBalebale ni Joni 14:6
Ke dua e via sokaloutaka na Tamada na Kalou o Jiova a, e dodonu me kila na itavi bibi nei Jisu.
“O yau na sala.” O Jisu e vakarautaka “na sala” dodonu meda torova kina na Kalou. Kena ivakaraitaki, e dodonu meda masu vua na Kalou ena yaca i Jisu. (Joni 16:23, 24) Nona mate o Jisu e rawa kina meda veiyaloni kei na Kalou, se me vakadonui keda o koya. (Roma 5:8-11) O Jisu tale ga e kotora na ivakaraitaki mera muria na via vakamarautaka na Kalou.—Joni 13:15.
“O yau . . . na dina.” O Jisu e dau tukuna na ka dina, e bulataka tale ga. (1 Pita 2:22) Nida rogoca na ka e tukuna, eda rawa ni vulica kina na ka dina me baleta na Kalou. (Joni 8:31, 32) O Jisu tale ga “na dina” ni vakayacora na parofisai vakaivolatabu. Ena vukuna e yaco kina na vosa ni yalayala ni Kalou.—Joni 1:17; 2 Korinica 1:19, 20; Kolosa 2:16, 17.
“O yau. . . na bula.” O Jisu e solia nona bula me rawa nira bula tawamudu o ira na vakabauti koya. (Joni 3:16, 36) E vu ni “bula” tale ga vei ira sa mate, ni na vakaturi ira tale mai.—Joni 5:28, 29; 11:25.
“Ena vukuqu ga ena qai torovi Tamaqu rawa kina e dua.” O ira na via veiwekani voleka kei na Kalou e dodonu mera doka na itavi bibi i Jisu. Era na cakava qori nira masu vua na Kalou ena yaca i Jisu, mera doka kina na nona itutu. (Joni 15:16) Era kila nira na rawata ga na bula ena vukui Jisu.—Cakacaka 4:12; Filipai 2:8-11.
Veitikina wavolita Joni 14:6
E volai ena Joni wase 13 ina 17 na nona itatau o Jisu vei ratou na 11 nona yapositolo yalodina, ena bogi ni bera nona mate. E uqeti ratou ena wase 14 me ratou cakacakataka nodratou vakabauti koya kei Tamana, me ratou lomani rau qai talairawarawa tiko ga vei rau. (Joni 14:1, 12, 15-17, 21, 23, 24) E vakamacalataka na nodrau dau veivolekati kei Tamana ena veigauna kece. (Joni 14:10, 20, 28, 31) Dina ga ni sa voleka ni lesu i lomalagi, ia e tukuna vei ratou ni na sega vakadua ni laivi ratou. (Joni 14:18) E yalataka tale ga vei ratou e dua na “dauveivuke,” e kaya ni qori “na yalo tabu ena tala mai o Tamaqu ena yacaqu.” (Joni 14:25-27) Na veika kece qo e vakarautaki ira kina nona imuri o Jisu ena veika dredre ena vakarau yaco.
Rawa ni o Wilika Tale ga
SAUMI NA TARO VAKAIVOLATABU
Cava Meda Masu Kina ena Yaca i Jisu?
Dikeva ni noda masu ena yaca i Jisu e rokovi kina na Kalou, e dokai tale ga kina o Jisu.
ESSENTIAL BIBLE TEACHINGS
Na Cava a Mate Kina o Jisu?
E raica vakabibi na iVolatabu na mate i Jisu. Vakacava, e tiko na inaki ni nona mate?
SAUMI NA TARO VAKAIVOLATABU
E Rawa Vakacava ni “Kedra iVoli e le Levu” na iSoro i Jisu?
E veisereki vakacava mai na ivalavala ca na ivoli?
VAKAMACALATAKI NA TIKINIVOLATABU
iVakamacala ni Joni 3:16—“Na Levu ni Nona Lomani Vuravura na Kalou”
E vakaraitaka vakacava na Kalou ni lomani keda vakayadudua qai vinakata meda rawata na bula?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
