IVAKAMACALA NI TIKINIVOLATABU
Roma 12:2—“Me Veisautaki na Nomuni iTovo ni Vakavoui na Nomuni Vakasama”
“Kua ni muria na ivakarau ni veika vakavuravura qo, me veisautaki na nomuni itovo ni vakavoui na nomuni vakasama, moni vakadinata kina ni vinaka, e yaga, qai uasivi na loma ni Kalou.”—Roma 12:2, iVakadewa ni Vuravura Vou.
“Kua ni vakaitovotaki iko ena itovo ni vuravura qo. Ia me vakavoui taucoko na nomu vakasama. O na qai kila rawa kina na loma ni Kalou—e yaga, e vinaka qai uasivi.”—Roma 12:2, New International Version.
iBalebale ni Roma 12:2
O ira era via vakamarautaka na Kalou e dodonu mera cata na veivakamuai cala, mera veisautaka tale ga na nodra ivakarau. Na Kalou e sega ni vakasaurarataki ira mera veisau. Ia era cakava qori nira lomani koya, era kila tale ga ni nona ivakaro e vinaka, e rawarawa qai yaga vakalevu.—Aisea 48:17.
“Kua ni muria na ivakarau ni veika vakavuravura qo.” Na “ivakarau ni veika vakavuravura qo,” ya na isoqosoqo era muria na ivakatagedegede, itovo kei na ivakarau e sega ni salavata kei na ka e vinakata na Kalou se na nona rai. (1 Joni 2:15-17) Era vakasaurarataki ira na tamata mera moica se veisautaka nodra itovo kei na ivalavala. Ia me rawa ni vakadonui na sala era qarava kina na Kalou, e dodonu mera vorata na veivakamuai ni vuravura. Ke sega era rawa sara ga ni bucina na itovo ena vakaleqai ira tale, ena vakacudruya tale ga na Kalou.—Efeso 2:1-3; 4:17-19.
“Me veisautaki na nomuni itovo ni vakavoui na nomuni vakasama.” E bibi me veisautaki noda vakasama, na lomada, noda rai kei na ka eda dau vinakata. Qo e dua na veisau levu, na ibalebale ni vosa vaKirisi “me veisautaki,” e tautauvata na nona veisautaki koya e dua na banuve ina bebe. O ira era qarava na Kalou e dodonu mera “sulumaka na itovo vou.”—Efeso 4:23, 24; Kolosa 3:9, 10.
“Moni vakadinata kina ni vinaka, e yaga, qai uasivi na loma ni Kalou.” E vinakata na Kalou, o ira na qaravi koya e dodonu mera vakadeitaka na ka era vakabauta. Era na cakava qori nira vulica nona Vosa, ra muria, mera vakila tale ga na yaga ni nodra muria na ivakatagedegede ni Kalou. Era vakadinata sara ga ni vinaka na sala i Jiova.—Same 34:8.
iKotokoto ni Roma 12:2
E vakamacalataki ena Roma wase 12, na ka e okati ena sokalou e vakadonuya na Kalou. E tara na basoga kece ni noda bula, e vinakati tale ga meda vakayagataka noda “yalomatua.” Meda kua ni vakabauta vakamataboko se vakacalai. (Roma 12:1, 3) E okati tale ga kina na ivakasala yaga ena sala meda vakaraitaka kina na itovo vakalou, noda veimaliwai kei ira eso tale, kei na ka meda cakava nida vakalolomataki.—Roma 12:9-21.
Rawa ni o Wilika Tale ga
ESSENTIAL BIBLE TEACHINGS
E Vakadonuya na Kalou na Sokalou Kece?
Levu era vakabauta ni sega ni bibi na lotu o digia.
SAUMI NA TARO VAKAIVOLATABU
Cava na Loma ni Kalou Vei Au?
E vinakati na cakamana se vosa mai na Kalou meu kila kina na lomana? Raica mada na kena isau vakaivolatabu.
VAKAMACALATAKI NA TIKINIVOLATABU
iVakamacala ni Vosa Vakaibalebale 3:5, 6—“Kua ni Ravi ena Nomu Yalomatua”
Sala cava o na vakaraitaka kina ni o nuitaka na Kalou qai kua ni nuitaki iko ga?
SAUMI NA TARO VAKAIVOLATABU
Cava e Kaya na iVolatabu me Baleta na Galala ni Vakatulewa? Sa Lewa Oti tu na Kalou?
Era vakabauta e levu ni sa lewai oti tu na nodra bula. Vakacava ena vakatau ena ka eda digia na noda rawaka?
IVAKAVUVULI VAKAIVOLATABU
iVukevuke ni Vuli iVolatabu
Digia na iwalewale ena rawa ni vukei iko me yaga, qai marautaki nomu vulica na iVolatabu.
IVAKAVUVULI VAKAIVOLATABU
Tovolea na Vuli Qo
Na vuli iVolatabu qo ena sega ni saumi qai tiko e dua mo drau na veivosakitaka na iVolatabu.
