Sa dua na ka na levu ni kakana vakayalo e vakarautaki vei keda nikua ena iyaya vakalivaliva. Ia ena levu na vanua e veiyasai vuravura, era sega ni ceguva rawa na tacida na isau ni internet. Ena so tale na vanua e boko na nodra livaliva, e berabera na internet, se sa sega sara ga.

 Ia e levu na tacida era sa downloadtaka rawa ena gauna qo ena nodra iyaya vakalivaliva na vidio kei na ivola, ke sega mada ga na internet! E rawa vakacava?

 E vakarautaki vei ira na ivavakoso e sega se berabera kina na internet e dua na misini lailai na yacana na JW Box. E tiko kina na wifi e voli mai na dua na kabani, sa qai porokaramutaka na Tabana ni Kompiuta e Peceli. E qai biu kina na ivola, na vidio kei na ka kece e tu ena jw.org. Na kena isau e rauta ni 75 na dola na ilavo ni Merika.

 Era sa na qai gole na mataveitacini ena Vale ni Soqoni, era sa qai vakayagataka na wifi ena JW Box me sema na nodra iyaya vakalivaliva me rawa nira downloadtaka na ivola kei na vidio. E rawa mada ga ni sema ena wifi qori na iyaya vakalivaliva sa ka makawa se sau lailai. Ia vakacava ke sega na internet ena dua na ivavakoso, ena biu tiko ga vakacava na ka vovou mai na noda website ina JW Box? E tiko ga na gauna ena vakauta kina na valenivolavola ni tabana na USB e tiko kece kina na ka vovou qori, na kena isau e rauta ni 4 na dola na ilavo ni Merika.

 E yaga vakacava na JW Box vei ira na mataveitacini? Qo na ka e kaya o Nathan Adruandra, e dua na tama e tiko mai na Democratic Republic of Congo: “Dua na gauna balavu noqu saga meu downloadtaka na drama ‘I Jiova, . . . Au Nuitaki Kemuni’ kei na Nanuma na Wati Loti. Ia e sega tu ga ni rawa, au yalolailai sara ga. Ia na gauna qo au sa downloadtaka rawa ina noqu talevoni, sa rawa kina vei keirau vakaveiwatini me keirau vakavulici rau kina vakavinaka na gone.”

 Qo na ka e kaya e dua na tacida tagane e lai veivuke ena kena vakarautaki na JW Box ena so na ivavakoso e Nigeria: “Era kaya na tacida ni qori e dua na iloloma talei mai vei Jiova. Dua na ka nodra marau nira sa rawa ni downloadtaka rawa na ivola kei na vidio mai na iVukevuke ni Veivakavulici.”

 Sa vakau e sivia e 1,700 na JW Box vei ira na mataveitacini e Aferika, Veiyanuyanu ena Wasa Pasifika, kei Sauca Amerika. Sa tuvanaki tale tiko ga ena gauna qo me vakau ina levu tale na ivavakoso. E saumi vakacava na veika kece qori? Ena nomuni cau moni tokona kina na cakacaka e veiyasai vuravura, e levu na cau qori e biu ena donate.dan124.com. Vinaka vakalevu na nomuni veitokoni.