Ena nodratou ilakolako mai Jutia i Kalili o Jisu kei na nona tisaipeli, eratou gole ina vualiku ni takosovi na yasayasa vaka Samaria. Eratou wawale sara ga, ratou mani lai cegu toka volekata na korolevu o Saika, ena yasa ni toevu a rairai kelia o Jekope se sauma na kena keli ena vica na senitiuri yani e liu. Na toevu va qori e rawa ni laurai volekata na korolevu o Nablus ena gauna qo.

A vakacegu toka volekata na toevu o Jisu ni ratou lai voli kakana na nona tisaipeli ina dua na koro voleka. E lai taki wai sara yani e dua na yalewa ni Samaria. E kaya vua o Jisu: “Rawa ni dua na mequ?”​—Joni 4:7.

Era sega ni dau veiyaloni na Jiu kei na kai Samaria ni sa vakawakana tu vei ira na veivakaduiduitaki. E kurabui gona na marama ni Samaria qai taroga: “Na cava oni kere wai kina vei au ni oni Jiu, o yau na yalewa ni Samaria?” E sauma o Jisu: “Ke o kila na loloma soli wale ni Kalou o na kilai koya tale ga e kaya vei iko, ‘Rawa ni dua na mequ?’ Ke o kerea vua, ena qai solia vei iko na wai ni bula.” E kaya vua o yalewa: “Kemuni, e sega mada ga na nomuni vokete, qai titobu na toevu. Oni na qai kauta mai vei na wai ni bula oni kaya tiko? Vakacava, oni uasivia na tukai keimami o Jekope, e solia vei keimami na toevu qo, e gunu kina o koya, o ira na luvena, kei na nona manumanu?”​—Joni 4:9-12.

E kaya o Jisu: “O koya e gunuva na wai qo ena viagunu tale. Ia o koya ena gunuva na wai au na solia ena sega ni viagunu tale, na wai au na solia vua ena vaka na waivure e lomana, ena tovure tiko ga me rawati kina na bula tawamudu.” (Joni 4:13, 14) A wawale o Jisu, ia e sega ni tu suka me vakamacalataka vua na yalewa ni Samaria na ka dina ena rawati kina na bula.

E kaya sara na yalewa: “Ni solia mai na wai qori meu kua ni viagunu tale se mai taki wai tale i ke.” E veisautaka o Jisu na veitalanoa qai kaya vua: “Lako, lai kacivi watimu mai.” E tukuna o yalewa: “E sega na watiqu.” Sa wacava nona kidacalataka na ka e kila tu o Jisu ni kaya vua: “E dina na ka o tukuna, ‘E sega na watiqu.’ O sa vakawati oti vakalima, na tagane tale ga drau tiko vata qo e sega ni watimu.”​—Joni 4:15-18.

E vakadinata na ka e tukuna o Jisu qai tukuna ena kurabui: “Kemuni, au sa qai kila ni oni parofita.” E kauaitaka na veika vakayalo o yalewa qai laurai qori ena nona kaya: “Era dau sokalou na tukai keimami [kai Samaria] ena ulunivanua qo, [ulunivanua o Kirisimi, e toka voleka ga] oni [ira na Jiu] kaya ni dodonu ga meda lai sokalou i Jerusalemi.”​—Joni 4:19, 20.

Ia e vakaraitaka o Jisu ni sega ni bibi na vanua ni sokalou ni kaya: “Sa voleka mai na gauna oni na sega ni qarava na Tamada ena ulunivanua qo se mai Jerusalemi.” Oti e kaya tale vei yalewa o Jisu: “Sa roro mai na gauna, sa kena gauna sara ga qo, mera sokalou kina vakayalo vei Tamada o ira era sokalou dina, ena yavutaki tale ga ena dina nodra sokalou, ni o ira sara ga qo e qara o Tamada mera qaravi koya.”​—Joni 4:21, 23, 24.

E sega ni bibi vei Tamada na vanua ni sokalou,  e bibi ga na nodra ivakarau ni sokalou o ira era sokalou dina. E qoroqoro sara ga o yalewa qai kaya: “Au kila ni na lako mai na Mesaia, o koya e vakatokai na Karisito. Ni yaco mai o koya ena tukuna vakamatata vei keimami na ka kece.”​—Joni 4:25.

E tukuna sara o Jisu e dua na itukutuku bibi: “O yau sara ga qori, o koya e vosa tiko yani qo.” (Joni 4:26) Vakasamataka mada ya! E mai taki wai ena sigalevu tutu na yalewa qo qai veivakurabuitaki na sala e vakaraitaka kina o Jisu nona lomani koya. E tukuna vakadodonu sara ga vei yalewa na ka e sega ni se tukuna vua e dua tale​—ni o koya na Mesaia.

Ni ratou lesu mai na voli kakana mai Saika na tisaipeli i Jisu, eratou raica ni veivosaki tiko kei na dua na yalewa ni Samaria ena toevu i Jekope eratou a veibiu kina. Ni ratou yaco yani na tisaipeli, e biuta tu mai o yalewa na nona saqa wai qai gole ina koro.

E lai tukutuku sara i Saika o yalewa ena veika e vakamacalataka vua o Jisu. Sega tale ni lomalomarua ni tukuna vei ira: “Ni mai raica mada e dua na tagane e tukuna vei au na ka kece au dau cakava.” Me rawa ni uqeti ira mera lako, sa qai taroga: “Sega ni o koya qo na Karisito?” (Joni 4:29) Qori e dua na taro bibi se vakavu kauai sara mai na gauna i Mosese. (Vakarua 18:18) E uqeti ira na lewe ni koro mera lai raici Jisu sara ga.

Eratou cikevi Jisu nona tisaipeli me kania na kakana eratou kauta yani. Ia e kaya o Jisu: “E tiko na qau kakana meu kania, ia dou sega ni kila.” Eratou veinanuyaka qori na tisaipeli ratou qai veitarogitaka: “E dua e kauta mai na kena?” Sa qai vakamacalataka vakavinaka vei ratou o Jisu: “Na qau kakana meu cakava na loma i koya e talai au mai, meu vakaotia tale ga nona cakacaka.”​—Joni 4:32-34.

Se vo tu e va na vula me qai caka na tatamusuki, sega gona ni vakaibalebaletaka tiko o Jisu na  tamusuki ni sila. Ia e vakaibalebaletaka tiko na tatamusuki vakayalo, ni a tukuna tale: “Dou tacake mo dou raica na were, ni sa matua vinaka tu me tamusuki. O koya e tatamusuki sa taura tiko na kena isau, sa kumuna tale tiko ga na vuata me baleta na bula tawamudu, me rau marau vata kina o koya na daukakaburaki kei koya na dautatamusuki.”​—Joni 4:35, 36.

Sa rairai kila tu o Jisu na ka ena yaco ena nodrau veitalanoa kei na yalewa ni Samaria. Era sa vakabauti Jisu rawa e levu mai Saika ena nona ivakamacala mada ga na yalewa qori, ni tukuna tiko vei ira na lewenikoro: “E tukuna vei au na ka kece au dau cakava.” (Joni 4:39) Nira yaco ina toevu, era kerei Jisu me se kua ni lako me vakamacala tale vei ira. E vakadonuya o Jisu qai tiko tale e Samaria me rua na siga.

Nira vakarorogo tiko vei Jisu na kai Samaria, e levu tale era mai vakabauta. Era kaya vua na yalewa: “Na neimami mai vakabauta qo e sega ni vu mai na ka o tukuna, keimami sa rogoci koya sara ga, keimami kila tale ga ni o koya ga qo na ivakabula kei vuravura.” (Joni 4:42) E ivakaraitaki vinaka vei keda na yalewa ni Samaria, e bibi me veiuqeti noda ivakamacala me baleti Karisito mera via kila kina e levu tale na ka o ira na vakarorogo!

Nanuma tiko ni se vo e va na vula me qai caka na tatamusuki​—rairai na tatamusuki ni varile e dau caka ena yasayasa qo ena vulaitubutubu. Sa donuya toka qo na vula o Noveba se Tiseba. Kena ibalebale ni oti na Lakosivia ni 30 G.V., eratou tiko voli mai Jutia me vula walu se sivia o Jisu kei na nona tisaipeli, ratou veivakavulici qai veipapitaisotaki. Sa mua qo na ilakolako ina vualiku ena nodratou koro mai Kalili. Cava ena sotavi e kea?