ERA qoroya na dauvakadidike ena veigauna sa oti na irairai ni bebe ukutaki se na yacana vakaPeritania na painted lady (Vanessa cardui), ia era vaqaqa se cava e yacovi ira ni cava na vulaikatakata. Era mate beka ni tekivu na vulaililiwa? E vakavotui e dua na itukutuku vakasakiti ena vakadidike vou e qai caka ga qo. E laurai nira dau vuka vakayabaki ena kedrau maliwa o noca Urope kei Aferika.

Era vakayagataka na dauvakadidike na misini vereverea me toboka na vanua e vukaca na bebe ra qai veidutaitaka kei na ka era tukuna eso tale mai na veiyasa i Urope. Era dikeva ni gauna e oti kina na vulaikatakata, era vuka ina sauca na qeleqeleni bebe qo; era vuka tubu me 500 na mita, e dredre kina meda raici ira. E donui ira na cagi e 45 na kilomita dua na aua na kena totolo me kauti ira i Aferika. Na nodra vuka vakayabaki qo e rauta ni 15,000 na kilomita na kena yawa, tekivu mai ena noca ni vanua batabata ena Arctic me yacova sara na sauca ena ra kei Aferika. Qo e voleka ni vakaruataka na nona vuka vakayabaki na bebenitoga ni Nocamerika. Ena taura e ono na yatukawa ni bebe ukutaki mera vuka i Aferika ra qai lesu i Urope.

E vakamacalataka o parofesa Jane Hill ena University of York mai Igiladi: “Era sega ni cegu na bebe ukutaki, nira vakaluveni oti era na tomana tale na nodra ilakolako.” Era cakava qori e veiyabaki ena nodra ilakolako balavu mai noca kei Urope i Aferika qai lesu tale.

E tukuna o Richard Fox, na manidia ni vakadidike ena isoqosoqo e taqomaka na bebe na Butterfly Conservation, ‘Na manumanu lailai qo e sega mada ga ni dua na karamu na kena bi, e vaka toka ga e dua na matanisuka lailai na nona mona, e sega tale ga ni vuli vei ira na bebe sa vukaca oti na ilakolako qo, ia se rawa ga ni vuka mai na dua na yasa i vuravura ina dua tale.’ E tomana, “A nanumi tu ni manumanu lailai qo e muria tu ga vakamataboko na matanicagi me yacova sara nona mate ena vulaililiwa e Peritania,” ia e dikevi “ni bebe ukutaki e kenadau sara ena ilakolako yawa.”