IVAKAVUVULI VAKAIVOLATABU: “O cei ena tiko e na nomuni vale [na Kalou]? . . . O koya sa lako vakadodonu, ka kitaka nai valavala dodonu, ka vosa dina tiko mai na vu ni yalona.”​—Same 15:1, 2.

KENA YAGA: Taleitaki vakalevu o koya e daudina qai dodonu nona ivalavala. Ia vakacava ke tukuni me lasu se cakacaka vakailoa me rawaka kina, qai sega ni tobo? Sa na qai laurai kina na ivakarau ni lomana.

E kaya o Raijieli, e dau voli iyaya ni kabani: “Ra via vaqumi au eso na dauvolivolitaki. Era yalataka keu volivoli vei ira, ena soli lo vei au eso na ilavo a dodonu me soli ina kabani. Ia au sega ni vakadonuya niu vakasamataka na ivakasala vakaivolatabu. Rogoca qori noqu boso, sa qai nuitaki au ga vakalevu.”

Ke a rawai ena veivaqumi qori o Raijieli, de dua ena rawata kina eso na ka, ia ena lekaleka wale sara na kena yaga. Vakacava me qai kila nona boso? Ena vakacakacakataki Raijieli tiko ga? Vakacava na kabani ena via lai cakacaka kina e muri? A bibi vei Raijieli na nona lewaeloma, me kua tale ga ni beci. E kaya na Vosa Vakaibalebale 22:1: “A ka me digitaki na rogo vinaka, ia nai yau levu e segai; a ka me digitaki na loloma [“veidokai,” NW], na siliva kei na koula e segai.”

O Jessie tale ga e daudina ena nona cakacaka, e nuitaki qai taleitaki koya nona boso. Yaga vakacava vua? E lai manidia sara kina ni kabani, sega ni vakaosoosotaki vakalevu ena cakacaka. Levu gona na gauna e vakayagataka vei watina kei ratou na luvena, vaka kina nona veika vakayalo.

Nira dau vaqara tamata cakacaka eso na kabani, so era dau taleitaka ga mera vakacakacakataki ira na kilai nira daudina. Kena ivakaraitaki, e dua na manidia mai na Yatu Filipaini e volavola ina valenivolavola ni tabana ni iVakadinadina i Jiova e kea, veisureti tiko vei ira na iVakadinadina i Jiova mera kere cakacaka yani. E kaya nira “dau gumatua, cakacaka vakadodonu, ra qai yalodina.” Ia me vakavinavinakataki ga kina na Kalou o Jiova, e vakavulici keda meda “cata na ka ca” da qai “vinakata na ka vinaka.”​—Emosi 5:15.