Na Leqa e Tarai Vuravura Taucoko
“Au dau nuiqawaqawa, ke sega mada ga ni dua na ka e vakavuna.”
“Niu marau sara tu ga, au na lomaleqa vakasauri. Au sa dau namaka tu ga ni gauna au marau kina, ena vakasauri noqu rarawa.”
“Au saga meu kauaitaka ga na siga yadua. Ia eso na gauna e vakasauri ga noqu nuiqawaqawataka e levu na ka.”
Qori na ka eratou tukuna eso eratou vakila na dredre ni mate ni vakasama. Vakacava o dau vakila tale ga qori? Se dua o lomana e sotava tiko qori?
Mo nuidei ni sega ni o iko ga. Levu nikua era vakila na ituvaki dredre e vauca na vakasama, se o ira na wekadra lomani.
Macala ga nida bula tu ena gauna e ‘duatani sara, e vakilai kina e levu na ka dredre.’ Qori e vakavuna e levu na rarawa kei na mate ni vakasama. (2 Timoci 3:1) E laurai ena dua na vakadidike, ni dua ina veiyawalu na lewenivanua e vuravura raraba e tauvi ira na mate ni vakasama. Ni veitauvi na COVID-19 ena yabaki 2020, e tubu kina ena 26 na pasede na iwiliwili ni lewenivanua era nuiqawaqawa. O ira na lomabibi e tubu ena 28 na pasede.
E vinaka meda kila na iwiliwili va qori. Ia e bibi sara meda kila na sala me vinaka tiko ga kina noda vakasama, kei ira tale ga eda lomana.
Cava meda kauaitaka kina noda vakasama?
Ni vinaka na ivakarau ni noda vakasama eda na mamarau qai qarava vinaka noda itavi. Eda rawa ni vosota kina na veika lalai eda lomaocaocataka, eda na gugumatua, qai marautaka na bula.
Na mate ni vakasama . . .
-
E SEGA ni bale vua e tauvi koya.
-
IA e dua na mataqali mate e vakavuna na rarawa, vakaleqa na ivakarau ni rai, na lomada, kei na noda itovo.
-
E rawa ni vakadredretaka noda veimaliwai, kei na noda qarava na itavi e veisiga.
-
E rawa ni tauvi keda kece. E sega ni vakatau ena noda yabaki, ivakarau vakavanua, matatamata, yavusa, lotu, ivakatagedegede ni vuli se ka vakailavo.
Qara nodra veiqaravi na vuniwai
Ke o vakila tiko o iko se dua o lomana e levu na veisau, me vaka nomu itovo, sega ni moce vinaka se kana vinaka, rarawa vakabalavu, nuiqawaqawa, se lomabibi, de dua e vinaka mo raici ira na kenadau mo kila na vu ni leqa, kei na kena iwali. Ia o na kunea i vei na veivuke qori?
E tukuna o Jisu Karisito na tamata vuku duadua a bau bula: “E sega ni yaga na vuniwai vei ira na bula vinaka, e yaga ga vei ira na tauvimate.” (Maciu 9:12) Kena ibalebale, ena yaga vakalevu vei ira na tauvi mate ni vakasama nodra qaravi vakavuniwai, ra gunuva tale ga na kena wainimate. E rawa ni vakalailaitaka na leqa qai vukei ira mera mamarau, ra qarava vinaka tale ga nodra itavi. Koya gona, e ka vakayalomatua me qaravi totolo na mate qo ke sa dede qai vaka vu leqa. a
Na iVolatabu e sega ni ivola vakavuniwai, ia na kena ivakasala e rawa ni yaga ena noda vakasama. Keimami uqeti iko mo dikeva mada ena vica na ulutaga tarava na sala e yaga kina na iVolatabu ena noda vakasama.
a E sega ni vakatututaka na Vale ni Vakatawa e dua na mataqali veiqaravi vakavuniwai. Ni bera gona nida vakatulewa, e bibi meda dui dikeva yadua na veiqaravi meda digia.
Rawa ni o Wilika Tale ga
SAUMI NA TARO VAKAIVOLATABU
Ena Walia na iVolatabu Noqu Lomabibi?
Tolu na sala e vakarautaka na Kalou me walia na lomabibi.
ESSENTIAL BIBLE TEACHINGS
Na cava e Vakatara Tiko Kina na Kalou na Rarawa?
Levu era vakataroga na cava sa rui levu kina na veicati kei na rarawa. E tiko ena iVolatabu na kena isau veivakacegui.
YADRA TIKO!
Mate ni Vakasama Vei Ira na iTabagone—Cava e Kaya na iVolatabu?
E tu ena iVolatabu na ivakasala ena yaga vei ira na itabagone era tauvi mate ni vakasama
BALETI KEIMAMI
Kerea mo Sikovi
Veivosakitaka na isau ni dua na nomu taro mai na iVolatabu, se mo vulica eso tale na ka me baleti ira na iVakadinadina i Jiova.
