E kaya na Kalou vei Atama: ‘O na mate dina ena siga o kana kina [mai na vunikau].’ (Vakatekivu 2:17) Ena sega ni vakaibalebale na ivakaro qori ke nona inaki na Kalou me qase qai mate o Atama. E kila vinaka o Atama ni na bula tiko ga ke sega ni kana mai na vunikau qori.

E sega ni vakatautaki nodrau bula o Atama kei Ivi ena vunikau qori, ni levu tale tu na vunikau ena were me rau digia. (Vakatekivu 2:9) Na nodrau muria na ivakaro qori, rau na vakadinadinataka kina nodrau talairawarawa vua e vakavuna nodrau bula. Rau vakaraitaka tale ga ni dodonu ga me dusimaki rau na Kalou.

Meda railesuva mada e dua na veivosaki e vakayacori makawa sara qai veisautaka vakalevu na noda bula. E vakayagataka o Setani na Tevoro e dua na gata me vakasavuya na nona itukutuku lasutaki. E kaya na iVolatabu: “Vei ira kece na manumanu kila ni vanua e bulia na Kalou o Jiova, e qaseqase duadua na gata. Mani kaya vua na yalewa: ‘E kaya sara ga na Kalou mo drau kua ni kana mai na vunikau kece e tu ena were?’”—Vakatekivu 3:1.

E sauma o Ivi: “E rawa ni keirau kania na vuata mai na vunikau ena were. Ia e kaya na Kalou me baleta na vuata mai na vunikau e tu ena lomadonu ni were: ‘Drau kua ni kana mai kina, kua, drau kua ni tara, de drau mate.’” Oti sa qai tukuna tale na gata vua: “Drau na sega dina ni mate. E kila na Kalou ni siga ga drau kana kina, ena rai na matamudrau, drau na vaka na Kalou, drau na kila na ka vinaka kei na ka ca.”—Vakatekivu 3:2-5.

E vakabauta o Ivi na lasu e tukuni vua. E vakaraica matua sara na vunikau. Dua na ka nona mateca qai via tovolea sara ga! Mani dodoka yani na ligana qai betia e vica na vuana me kania. E vakamacalataka sara na iVolatabu: “Oti ni tiko tale ga o watina, e solia eso vua, mani kania o koya.”—Vakatekivu 3:6.

E dau rarawa na Kalou ni raica nira nakita na luvena na nodra talaidredre vua! Ia na cava e qai cakava? E kaya vei Atama: “O na . . . suka ina qele, ni o vu ga mai kina. Ni o kuvuniqele ga, o na suka mo kuvuniqele tale.” (Vakatekivu 3:17-19) Qori na vuna “na yabaki kece ni bula i Atama e 930, sa qai mate.” (Vakatekivu 5:5) A sega ni lako i lomalagi o Atama, se lai bula tale tiko ena dua na vuravura ni yalo. A sega tale ga ni bula tu eliu ni bera ni buli koya ena kuvuniqele o Jiova. Na gauna e mate kina, sa sega ni dua na ka e vakila e suka ga me  kuvuniqele tale. Dua dina na ka vakaloloma ni sa mai yalani kina nona bula!

Ni rau nakita nodrau talaidredre o Atama kei Ivi, rau sega kina ni bula uasivi, se rawata na bula tawamudu. Taumada e veisautaka sara ga nodrau bula vakayago, rau ivalavala ca, qai sega ni uasivi. E sega ni yalani ga vei rau na revurevu ni nodrau talaidredre, rau vakadewa tale ga ina nodrau kawa na itotogi qori. E kaya na Roma 5:12: “Ena vuku ni dua ga na tamata [o Atama] e curu kina i vuravura na ivalavala ca, kei na mate ena vuku ni ivalavala ca.”

E vakamacalataka na iVolatabu ni ivalavala ca kei na mate e vaka na “iubi e ubia kece tu na lewe ni veivanua, kei na iubi e ologi ira tu na veimatanitu kece.” (Aisea 25:7) Na iubi qori e ologi keda kece na kawatamata me vaka na kabu poisoni e sega ni dua e rawa ni dro bula kina. Io era “mate tiko na tamata kece ena vuku i Atama.” (1 Korinica 15:22) Eda rawa ni taroga tale ga kina na taro i Paula: “O cei ena vakabulai au mai na yago e vakavuna tiko na noqu mate?” E rawa ni dua e cakava qori?—Roma 7:24.