O Estelle * e vitu na luvena, eratou vuvale daulotu. E kaya: “Au tukuna vua na italatala niu via vuli iVolatabu.” Ia a sega ni vukei koya na italatala, mani vakatulewataka me kua ni lai lotu. E tomana: “Eratou vola mai na iliuliu ni lotu meu vakauta tiko ga yani na noqu soli. Au lai vakasamataka: ‘Eratou sega ni via kila noqu sega ni dau lako yani i lotu, ratou vinakata ga na ilavo.’”

E kaya o Angelina, e dua na marama daulotu: “Ena dua na gauna ni lotu, ena veisoliyaki vakatolu na veleti ni soli, qai vinakati me keimami soli. Era vinakata ga na ilavo. Au mani veinanuyaka: ‘Qo e sega ni vakalou.’”

Vakacava na veimatalotu ena nomu yasayasa, era dau vakayagataka e levu na iwalewale mera rawa ilavo kina? E salavata kei na ka e kaya na iVolatabu na ka era cakava?

E kaya o Jisu, a tauyavutaka na lotu vaKarisito: “E soli wale vei kemudou, dou solia wale tale ga.” (Maciu 10:8) E sega ni dodonu me saumi na itukutuku e tu ena iVolatabu, me tu vakarawarawa tale ga vei ira era via kila.

Ia e vakailavotaki vakacava na ivavakoso ena imatai ni senitiuri?

Na tamata yadua ena solia “na ka e vakadeitaka e lomana, me kua ni cakava ena voraki se vuturi, baleta na Kalou e taleitaki koya e solia na ka ena marau.” (2 Korinica 9:7) E kaya na yapositolo o Paula: “Keitou cakacaka ena bogi kei na siga me kua kina ni keitou vakaicolacolataka e dua vei kemuni ena levu na ka vakailavo ena neitou tukuna vei kemuni na itukutuku vinaka ni Kalou.” (1 Cesalonaika 2:9) E dau cula valelaca o Paula me tokona na nona cakacaka vakaitalatala.—Cakacaka 18:2, 3.

Era dau soqoni na iVakadinadina i Jiova ena dua na vale veiganiti, e vakatokai me Kingdom Hall se Vale ni Soqoni. Era qarava vakacava na ka me saumi? Era sega ni dau veisoliyaka na veleti ni soli se ra kere ilavo. O ira era marautaka na ituvatuva vakayalo ena soqoni era rawa ni biuta nodra cau ena kato ni cau e tu ena Vale ni Soqoni.

Na taba ni mekesini qo kei na kena vakau e gadrevi kina na ilavo. Ia o na sega ni rogoca se raica nira kere ilavo me vakailavotaki kina nodra cakacaka. E kena inaki ga me vakatakila na ka dina ena iVolatabu.

Cava o nanuma: Na nodra cakava qori na iVakadinadina i Jiova era sa muria tiko na ka e tukuna o Jisu kei na ka era cakava na lotu vaKarisito taumada?