SAUMI NA TARO VAKAIVOLATABU

E rogoca na Kalou na masu kece?

Na Kalou e rogoca na nodra masu na veimatatamata. (Same 145:​18, 19) E uqeti keda na nona Vosa na iVolatabu meda talaucaka vua na leqa cava ga eda sotava. (Filipai 4:​6, 7) Ia eso na masu e sega ni rogoca na Kalou. Kena ivakaraitaki, na masu e dau wiligusutaki.​—Wilika Maciu 6:7.

E sega tale ga ni rogoca na nodra masu o ira era nakita mera beca nona lawa. (Vosa Vakaibalebale 28:9) Kena ivakaraitaki, ena gauna vakaivolatabu, a sega ni rogoca na Kalou na nodra masu na Isireli era dauvakadavedra. Koya gona, e tiko na ivakatagedegede meda muria me qai rogoca na Kalou na noda masu.​—Wilika Aisea 1:15.

Na cava meda cakava me rogoci kina noda masu?

Me rogoca na Kalou noda masu, e gadrevi na vakabauta. (Jemesa 1:​5, 6) E dodonu meda vakadeitaka ni bula dina o koya, e kauaitaki keda tale ga. Ena dei na noda vakabauta nida vulica na iVolatabu, baleta ni tu kina e levu na ivakadinadina kei na vosa ni yalayala e rawa ni vakaukauataka na noda vakabauta.​—Wilika Iperiu 11:​1, 6.

E dodonu meda masu mai vu ni lomada, meda yalomalumalumu tale ga. A yalomalumalumu mada ga na Luve ni Kalou o Jisu ni masu vei Tamana. (Luke 22:​41, 42) Koya gona e bibi meda kila vinaka na ivakatagedegede ni Kalou ena iVolatabu me rawa ni salavata kei na nona inaki na ka eda masulaka.​—Wilika 1 Joni 5:14.

Me ikuri ni ivakamacala raica na wase 17 ni ivola Na Cava Sara Mada e Kaya na iVolatabu?, tabaka na iVakadinadina i Jiova

Rawa ni download ena www.dan124.com

[iYaloyalo ena tabana e 16]

Na cava e sega kina ni rogoca na Kalou eso na masu?