ULUTAGA LEVU | RAI NI KALOU ME BALETA NA IVALU
Rai ni Kalou me Baleta na iValu ena iMatai ni Senitiuri
E vakasaurarataki vakalevu e dua na matatamata. Era tautauvata ga kei ira na tukadra na Jiu ena imatai ni senitiuri nira masu wasoma me vakabulai ira na Kalou. Era vinakata mera vakabulai mai na nona veivakalolomataki o Roma. Oti ra qai rogoca na veika me baleti Jisu. Vakacava, ena vakadinadinataka ni o koya na Mesaia sa tukuni makawa tu mai? Sa rauta me levu era “nuitaka ni na vakabulai Isireli” mai na nodra veivakalolomataki na kai Roma. (Luke 24:21) Ia e sega ni yaco qori. Ena 70 G.V., era curubotei Jerusalemi na sotia ni Roma ra qai vakarusa na koro kei na kena valenisoro.
Na cava e yaco? Na cava e sega ni vala kina na Kalou ena vukudra na Jiu, me vaka ga na gauna e liu? Se cava e sega ni vakadonuya kina mera vala mera sereki mai na nodra vakalolomataki tu? Vakacava, sa veisau na rai ni Kalou? Sega. Ia e dua na veisau levu e yaco me baleti ira na Jiu. Era a cakitaki Jisu na Luve ni Kalou ni Mesaia. (Cakacaka 2:36) E tinia kina na matanitu qo na nona veiwekani talei kei na Kalou.—Maciu 23:37, 38.
Sa sega ni qai taqomaki ira na Jiu se na nodra Vanua Yalataki na Kalou. Era sega tale ga ni rawa ni tukuna na Jiu ni vakadonuya na Kalou na nodra vakaitavi ena ivalu se me tokoni ira kina. Me vaka sa tukuna oti tu o Jisu, sa sega ni qai vakalougatataki se vakadonuya na Kalou na matanitu vakayago o Isireli, sa sosomitaki ga ena dua na matanitu vou, e matanitu vakayalo, qai kilai e muri ena iVolatabu me “Isireli ni Kalou.” (Kalatia 6:16; Maciu 21:43) Na ivavakoso lumuti ni lotu vaKarisito e vakadinadinataki me Isireli vakayalo ni Kalou. E tukuni vakadodonu vei ira ena imatai ni senitiuri: ‘Qo oni sa nona tamata na Kalou.’—1 Pita 2:9, 10.
Nira sa ‘nona tamata na Kalou’ na lotu vaKarisito ena imatai ni senitiuri, vakacava ena vala ena vukudra me vakabulai ira mai na nodra veivakalolomataki na kai Roma? Se vakadonuya mera valuti ira na veivakalolomataki tiko? Sega. Na vuna? Na ivalu e vakadonuya na Kalou, o koya sara ga e lewa na gauna me vakayacori kina, me vaka ga eda raica ena ulutaga sa oti. A sega ni vala ena vukudra na lotu vaKarisito ena imatai ni senitiuri na Kalou, se vakadonuya mera vakaitavi ena so tale na ivalu. E matata ni se sega ni gauna qori me vala kina na Kalou me vakaotia na veika ca kei na veivakalolomataki.
Me vakataki ira gona na dauveiqaravi ni Kalou ena gauna makawa, era wawa na lotu vaKarisito ena imatai ni senitiuri me yacova na nona gauna lokuci na Kalou me vakaotia kina na veika ca kei na veivakalolomataki. Ena gauna mada ga qori, e sega ni vakadonuya na Kalou mera valuti ira na kedra meca. E vakamatatataka qori o Jisu Karisito ena nona veivakavulici. Kena ivakaraitaki, a sega ni dusimaki ira nona imuri mera vakaitavi ena ivalu, ia e kaya vei ira: “Lomani ira tiko ga na kemudou meca, masulaki ira tale ga era vakacacani kemudou.” (Maciu 5:44) Ni tukuna tiko o Jisu na gauna ena valuti Jerusalemi kina na mataivalu ni Roma ena imatai ni senitiuri, e vakaroti ira nona tisaipeli mera dro, mera kua ni tiko se mera via vala. Era qai muria nona ivakasala.—Luke 21:20, 21.
E uqeti tale ga vakalou o Paula me vola: “Ni kua ni sauma na ca e caka vei kemuni, . . . ni volai: ‘E noqu na veisausaumi, au na sauma,’ e kaya o Jiova.” (Roma 12:19) A cavuqaqataka tiko ga o Paula na ka a tukuna na Kalou ena vica na senitiuri sa oti me vaka e volaitukutukutaki ena Vunau ni Soro 19:18 kei na Vakarua 32:35. Me vaka e laurai ena ulutaga sa oti, dua na sala e veisausaumi kina na Kalou ena vukudra na nona dauveiqaravi ena gauna makawa, oya me vukei ira mera valuti ira na kedra meca. E vakaraitaka gona o Paula ni se sega ni veisau na rai ni Kalou me baleta na ivalu. Ena imatai ni senitiuri, se raica tiko ga na Kalou na ivalu me sala dodonu e veisausaumi kina ena vukudra na nona dauveiqaravi me vakaotia na veivakacacani kece kei na veika ca. Ia me vaka na gauna makawa, na Kalou ga ena lewa na gauna me vakayacori kina na ivalu, kei koya me vakaitavi kina.
E matata vakasigalevu ni sega ni vakadonuya na Kalou mera vakaitavi ena ivalu na lotu vaKarisito ena imatai ni senitiuri. Vakacava nikua, sa bau vakadonuya na Kalou e dua na ilawalawa me vakaitavi ena ivalu? Se kena gauna qo me yavala na Kalou me vala ena vukudra na nona dauveiqaravi? Cava sara mada na rai ni Kalou me baleta na ivalu nikua? Ena qai saumi ena ulutaga tarava.
